ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްދުވަހެއްގައި ބޭއްވުމާމެދު ރައްޔިތުންގެ ހިޔާލު ހޯދުމަށް ނަގާ އާއްމު ވޯޓާ ގުޅޭގޮތުން ގާނޫނީ ގޮތުން ކަން އޮތް ގޮތުގެ ސައްހަ މައުލޫމާތު ފޯރުކޮށްދިނުމަށް ރާއްޖޭގެ ފުންނާބު އުސް ގާނޫނީ ވަކީލުންނާއެކު ހާއްސަ ހަރަކާތްތަކެއް އައްޑޫ ސިޓީގައި ބޭއްވުމަށް ނިންމައިފި އެވެ. މި ހަރަކާތަކީ އައްޑޫ ސިޓީގެ ގިނަ އަދަދެއްގެ ރައްޔިތުން އެދެމުންދާތީ ކުރިއަށް ގެންދާ ހަރަކާތެކެވެ.
މި ކެމްޕެއިން ހަރަކާތަކީ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ޓިކެޓުގައި އައްޑޫ ސިޓީގެ މޭޔަރުކަމަށް ކުރިމަތިލައްވާ މުޝްރިފް އަލީގެ ކެމްޕެއިން ޓީމުން އިސްނަގައިގެން ކުރިއަށް ގެންދާ ހަރަކާތެކެވެ. މި ހަރަކާތުގައި ރައްޔިތުންނަށް މައުލޫމާތު ފޯރުކޮށްދެއްވުމަށް ވަޑައިގަންނަވާނީ ކުރީގެ ބަންޑާރަނައިބު އަލްއުސްތާޛާ އާއިޝަތު އާޒިމާ ޝުކޫރު އަދި ކުރީގެ ބަންޑާރަނައިބު އަލްއުސްތާޛާ ފާތިމަތު ދިޔާނާ ސައީދު އެވެ.
މާދަމާ އަށް ތާވަލުކުރެވިފައިވާ މި ހަރަކާތްތައް އައްޑޫ ސިޓީގެ އެކި އަވަށްތަކުގައި ކުރިއަށްދާނެ އެވެ. އެގޮތުން މާދަމާ ހެނދުނު 10:00 ގައި ފޭދޫ ކަސްޓަމްސް އޮޑިޓޯރިއަމްގައި މަރަދޫ، ފޭދޫ އަދި މަރަދޫފޭދޫގެ ރައްޔިތުންނަށް ހާއްސަ ބައްދަލުވުމެއް ބޭއްވުމަށް ވަނީ ހަމަޖެހިފަ އެވެ. މީގެ އިތުރުން ހިތަދޫ ރައްޔިތުންނަށް ހާއްސަ ބައްދަލުވުން މާދަމާ މެންދުރުފަހު 14:00 ގައި ހިތަދޫގައި ބާއްވާއިރު، ހުޅުމީދޫގެ ރައްޔިތުންނަށް ހާއްސަ އިވެންޓް އޮންނާނީ މާދަމާ ރޭ އެ އަވަށުގަ އެވެ.
މުޝްރިފްގެ ކެމްޕެއިން ޓީމުން މައުލޫމާތުދޭ ގޮތުގައި، މި ހަރަކާތުގެ މައިގަނޑު ބޭނުމަކީ ދެ އިންތިހާބު އެއްކޮށްލުމާ ގުޅޭގޮތުން ނަގާ ފެންނަ ނުފެންނަ ވޯޓުގެ ގާނޫނީ އިޖުރާއަތްތަކާ މެދު ރައްޔިތުންގެ މެދުގައި ހުރި ކަންބޮޑުވުންތަކަށް ގާނޫނީ މާހިރުންގެ އެހީތެރިކަމާއެކު ސައްހަ ޖަވާބު ހޯދައިދިނުމެވެ.
އައްޑޫ ސިޓީގެ ވީހާވެސް ގިނަ ރައްޔިތުން މި ހަރަކާތުގައި ބައިވެރިވެ، ގާނޫނީ ވަކީލުންގެ ފަރާތުން މައުލޫމާތު އޮޅުންފިލުވުމަށް ކޮންގްރެސް ޕާޓީން ވަނީ އިލްތިމާސްކޮށްފަ އެވެ. މި ބައްދަލުވުންތަކަކީ ކުރިއަށް އޮތް އިންތިހާބުތަކާ ގުޅޭ މުހިންމު ނިންމުންތަކަށް ރައްޔިތުން ހޭލުންތެރިކުރުވުމަށް ކުރިއަށްގެންދާ މުހިންމު މަސައްކަތެކެވެ.