ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ފަރާތުން މާލެ ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް (ޑަބްލިއުޑީސީ) ކަނޑައަޅާފައިވާ “ބަދަހި އާއިލާ” މެނިފެސްޓޯ ރޭ ރަސްމީކޮށް ލޯންޗުކޮށްފިއެވެ. ސަލްޓަން ޕާކުގެ އޮޑިޓޯރިއަމްގައި ބޭއްވި މި ޚާއްޞަ ރަސްމިއްޔާތު ޝަރަފްވެރިކޮށްދެއްވީ ވަޒީރު އާދަމް ޝަރީފް އުމަރެވެ.
މި މެނިފެސްޓޯ ބިނާވެފައިވަނީ މައިގަނޑު ތިން ދާއިރާއެއްގެ މައްޗަށެވެ. އެއީ “ދިރިއުޅޭނެ ޖާގަ ފަހިކުރުމަށް”، “އޯގާތެރިކަމުގައި އަޅާލުމަށް” އަދި “ފުދުންތެރިކަން އިތުރުކުރުމަށް” މި ތިން ދާއިރާއެވެ. މި މެނިފެސްޓޯ އެކުލަވާލާފައިވަނީ މާލެ ސިޓީގެ ރައްޔިތުންގެ ކަންބޮޑުވުންތަކަށް ރިޢާޔަތްކޮށް، އެކަންކަމަށް ހައްލު ހޯދައިދިނުމުގެ މަޤްޞަދުގައެވެ
ދިރިއުޅޭނެ ޖާގަ ފަހިކުރުމުގެ ދަށުން، މަގުމަތީގެ އަމާންކަން ކަށަވަރުކުރުމާއި، އާއިލީ މައިޒާންތަކާއި ޕާކުތައް އިތުރުކުރުމުގެ އިތުރުން ކޮމިއުނިޓީ ގާޑަންތައް ތަޢާރަފްކުރުމަށް ވަނީ ހިމަނާފައެވެ. އަދި އާއިލާތަކަށް ބޭނުންވާ އެހީތެރިކަން ފޯރުކޮށްދިނުމަށް ސަރުކާރާ ގުޅިގެން ޚާއްޞަ އޮނިގަނޑެއް އެކުލަވާލުމާއި، ކުދިން ބެލެހެއްޓުމަށް ޗައިލްޑް ކެއަރ ޖާގަތަކާއި އިވެންޓްތައް ބޭއްވުމަށް އިންޑޯ ހޯލްތައް ޤާއިމުކުރުން ވެސް މެނިފެސްޓޯގައި ހިމެނެއެވެ.
އޯގާތެރިކަމާއި އަޅާލުމުގެ ދާއިރާއިން އިސްރަށްވެހިންގެ ކަރާމަތާއި ދުޅަހެޔޮކަން އިސްކުރުމާއި، އާންމު ޞިއްޙަތުގެ ނިޒާމް ހަރުދަނާކުރުމަށް ވަނީ ރޭވިފައެވެ. މީގެ އިތުރުން، އަންހެނުންގެ ފުދުންތެރިކަން އިތުރުކުރުމަށްޓަކައި ޚާއްޞަ ކޯޕަރޭޓިވްތައް އުފެއްދުމާއި، ޑިޖިޓަލް ލިޓްރަސީ ކްލާސްތައް ހިންގުމާއި، މަސައްކަތްކުރާ މައިންބަފައިންނަށް ފަސޭހަވާނެ ފަދަ ކޯ-ވޯކިން ސްޕޭސްތައް ޤާއިމުކުރުމަށް ވެސް މެނިފެސްޓޯގައި ވަނީ ހިމަނާފައެވެ.
މި ރަސްމިއްޔާތުގައި ވާހަކަދައްކަވަމުން ބާރަށު ދާއިރާގެ މެންބަރު އިބްރާހީމް ޝުޖާޢު ވިދާޅުވީ، “މި މެނިފެސްޓޯ ތަންފީޒުކުރުމުގައި ޕީއެންސީގެ ފަރާތުން ވާދަކުރައްވާ އާޝިޔަތު އަލައިކާ އަދުދާން ވަރުބަލިކަމެއް ނެތި މަސައްކަތްކުރައްވާނެ” ކަމަށެވެ. އަދި މުޅި ޓީމު ގުޅިގެން މާލޭގެ އަންހެނުންނާއި އާއިލާތަކަށް ދިމާވެފައިވާ މައްސަލަތަކަށް ހައްލު ހޯއްދަވައިދެއްވާނެ ކަމުގެ ޔަގީންކަން ޝުޖާޢު ދެއްވިއެވެ.