ވިސާކަޕަޓްނަމްގެ ނޭވީ ޓެކްނީޝަނެއް ކަމަށްވާ، އުމުރުން 30 އަހަރުގެ ޗިންތާޑާ ރަވިންދްރާ، އޭނާގެ ލޯބިވެރިޔާ މޯނިކާ ރަހުމްކުޑަ ގޮތަކަށް މަރާލައި ހަށިގަނޑު ބައިބައިކޮށްލި މައްސަލައެއް ފެންމަތިވުމާ ގުޅިގެން އެ ސިޓީގެ މީހުންގެ ހިތުގައި ވަނީ ބިރުވެރިކަމެއް އުފެދިފައެވެ. މި އަނިޔާވެރި އަމަލު ހިންގާފައިވަނީ ގާޖުވާކާ ސަރަހައްދުގައި އޭނާ ކުއްޔަށް ހިފައިގެން އުޅޭ އެޕާޓްމަންޓެއްގައެވެ.ރަވިންދްރާގެ އަނބިމީހާ ވީ އާދަކާދައިގެ މަތިން، ވިހެއުމަށްފަހު އޭނާގެ މައިންބަފައިންގެ ގެއަށް ދުވަސްކޮޅަކަށް ގޮސްފައެވެ..
ރިޕޯޓުތައް ބުނާ ގޮތުގައި ފުލުހުންގެ ތަހުގީގުން، ރަވިންދްރާ ގާޖުވާކާގައި ކުއްޔަށް އުޅޭތާ ގާތްގަނޑަކަށް ދެ އަހަރު ވެއްޖެއެވެ. މަރުގެ ހާދިސާ ހިނގި ދުވަހުގެ މެންދުރުފަހުގެ ވަގުތެއްގައި އޭނާ ވަނީ މޮނިކާ އެ ގެއަށް ގެނެސްފައެވެ. ދެމީހުންގެ މެދުގައި ފެށުނު ބައްދަލުވުން ކުއްލިއަކަށް ހޫނު ބަހުސަކަށް ބަދަލުވިއެވެ. ބަހުސް ޒުވާބަކަށް ބަދަލުވެ، އެންމެ ފަހުން ކަންތައް ދިޔައީ ގޯހުން ގޯހަށެވެ. މި ހަމަނުޖެހުން ފެށުނު ސީދާ ސަބަބު އަދިވެސް ތަހުގީގު ކުރަމުންދާއިރު، މިއީ ކުރިން ރާވައިގެން ހިންގާފައިވާ އަމަލެއް ކަމަށް ހެކިތަކުން ދައްކާ ކަމަށް ރިޕޯޓުތަކުގައި ވަނީ ބުނެފައެވެ. ރިޕޯޓްތައް ބުނާގޮތުގައި މޮނިކާ މަރާލުމުގެ ކުރިން ރަވިންދްރާ ވަނީ ސްރީނަގަރުގެ ފިހާރައަކުން ވަޅި ގަންނަން މަސައްކަތްކޮށް، އެކަން ކާމިޔާބު ނުވުމުން އޮންލައިންކޮށް ވަޅިތަކަކަށް އޯޑަރު ދީފައެވެ.
މޮނިކާ މަރާލުމަށްފަހުވެސް ރަވިންދްރާގެ އަނިޔާވެރިކަން ހުއްޓުމެއް ނާދެއެވެ. ތަޖުރިބާކާރު ތަހުގީގު ކުރާ ފަރާތްތައްވެސް ސިހޭ ފަދަ ގޮތަކަށް، ރަވިންދްރާ ވަނީ އެ އެޕާޓްމަންޓް ތެރޭގައި މޮނިކާގެ ހަށިގަނޑު ތިން ބަޔަކަށް ބުރިބުރިކޮށްލާފައެވެ.
ރަވިންދްރަ، މޮނިކާގެ ހަށިގަނޑު ފޮރުވުމަށް މަސައްކަތް ކުރީ ގޭތެރޭގެ ތަންތަން ބޭނުން ކޮށްގެންނެވެ. އެގޮތުން ހަށިގަނޑުގެ އެއްބައި އައިސްއަލަމާރި ތެރޭގައި ރައްކާކުރިއިރު، އަނެއްބައި ގޯންޏަކަށް އަޅައި އެނދު ދަށުގައި ފޮރުވިއެވެ. އަދި ހެކި ނައްތާލުމުގެ ގޮތުން، މޮނިކާގެ ބޯ، އަދަވިވަރަމްގެ އެކަހެރި ސަރަހައްދަކަށް ގެންގޮސް އަންދާލާފައިވާ ކަމަށް ރިޕޯޓްތައް ބުނެއެވެ.
ހަށިގަނޑުގެ ބައިތައް ފޮރުވުމަށް ގިނަ މަސައްކަތްތަކެއް ކުރި ނަމަވެސް، ފޯނު ކޯލަކަށްފަހު އެކަން ފަޅާއެރިއެވެ. ރަވިންދްރާ އޭނާގެ ރަހުމަތްތެރިއަކަށް ގުޅައި، ކުރެވުނު ކުށަށް އިއުތިރާފުވެ ލަފަޔަކަށް އެދުނެވެ. އެ ރަހުމަތްތެރިޔާގެ ލަފާގެ މަތިން، މި ނޭވީ މުވައްޒަފު ގާޖުވާކާ ޕޮލިސް ސްޓޭޝަނަށް ގޮސް އަމިއްލައަށް ފުލުހުންނާ ހަވާލުވިއެވެ.
އޭގެ ފަހުން ފުލުހުން އެ އެޕާޓްމަންޓަށް ވަދެ ބެލިއިރު، ރަވިންދްރާގެ އިއުތިރާފާ އެއްގޮތަށް ބިރުވެރި މަންޒަރުތައް ފެނިފައިވެއެވެ. އަވަށްޓެރިން ބުނި ގޮތުގައި އެ ހާދިސާ ހިނގި ވަގުތު އެޕާޓްމަންޓުން އެއްވެސް އާދަޔާ ހިލާފު އަޑެއް ނުވަތަ މާރާމާރީއެއްގެ ނިޝާނެއް ފެނިފައެއް ނުވެއެވެ. މޮނިކާގެ އާއިލާއިން އެމީހުންގެ ދަރިފުޅު ވަކިވުމުގެ ހިތާމަ ކުރަމުންދާއިރު، ނޭވީ ޓެކްނީޝަން ރަވިންދްރަ މިހާރު ހުރީ މީހަކު މެރުމާއި ހެކި ނައްތާލުމުގެ ދައުވާގައި ފުލުހުންގެ ބަންދުގައެވެ.