ހައި އެޗީވަރސް ސްކޮލަރޝިޕްގައި ރާއްޖޭގައި ތިބެގެން ކިޔަވާ ދަރިވަރުންނަށް، މިހާރު ދެމުންދާ ސްޓައިޕެންޑުގެ އިތުރަށް 6000 ރުފިޔާގެ އެލަވަންސެއް ދިނުމަށް މަތީ ތަޢުލީމާ ބެހޭ ވުޒާރާއިން ނިންމަވައިފިއެވެ. މިއީ އޭލެވެލް ނިންމާ ނަތީޖާ ރަނގަޅު ދަރިވަރުން ރާއްޖޭގައި ތިބެގެން މަތީ ތަޢުލީމު ހާސިލުކުރުމަށް ބާރުއެޅުމުގެ ގޮތުން ސަރުކާރުން ގެނައި މުހިންމު ބަދަލެކެވެ.
ހައި އެޗީވަރސް ސްކޮލަރޝިޕް ލިބޭ މިންގަނޑަށް ވެސް މިހާރު ވަނީ ބަދަލުތަކެއް ގެނެސްފައެވެ. އައު އުސޫލުގެ ދަށުން، އޭ ލެވެލްގެ 5 މާއްދާގެ ތެރެއިން އެއް މާއްދާއިން "އޭ ސްޓަރ" އަދި ބާކީ 4 މާއްދާއިން "އޭ" ގްރޭޑް ލިބުމުން މި ސްކޮލަރޝިޕް ކާމިޔާބު ކުރެވޭނެއެވެ. މީގެ އިތުރުން، އޯލެވެލް އިނގިރޭސި މާއްދާއިން މަދުވެގެން "ސީ" ފާހެއް އޮންނަން ޖެހޭނެ ކަމަށް ވުޒާރާއިން ބަޔާންކުރެއެވެ.
ރައީސުލްޖުމްހޫރިއްޔާ ދެއްވާ ޚާއްޞަ ސްކޮލަރޝިޕްގެ ދަށުން ދެން ކިޔަވަން ފުރުޞަތު ދޭނީ ރާއްޖޭގެ "ޓްރެއިނިންގ ނީޑްސް ރިކުއަޔަރމަންޓް" ލިސްޓުގައި ހިމެނޭ ދާއިރާތަކުންނެވެ. ނަމަވެސް، މިދިޔަ އަހަރު އޭލެވެލް ނިންމި ދަރިވަރުންނަށް އެކުދިން ބޭނުންވާ ކޮންމެ ދާއިރާއަކުން ކިޔެވުމުގެ އިސްތިސްނާ ފުރުޞަތެއް ވަނީ ދީފައެވެ. މީގެ ކުރިން 2024 ވަނަ އަހަރު އެކުލަވާލި އުޞޫލުގައި އޮންނަ ގޮތުން، މި ސްކޮލަރޝިޕް ލިބޭ ދަރިވަރުންނަށް ދުނިޔޭގެ ކޮންމެ ޔުނިވަރސިޓީއެއްގައި ބޭނުން ރޮނގަކުން ކުރިއަށް ދިއުމުގެ ފުރުޞަތު އޮވެއެވެ.
މި ސްކޮލަރޝިޕްތަކުގެ ދަށުން ތަޢުލީމު ހާސިލުކުރާ ދަރިވަރުން، ކިޔަވައި ނިމުމުން 4 އަހަރާއި 7 އަހަރާ ދެމެދުގެ މުއްދަތަކަށް ސަރުކާރަށް ޚިދުމަތް ކުރަން ޖެހެއެވެ. "ޚިދުމަތް ނުކުރާ ފަރާތްތަކުން ސަރުކާރުން ސްކޮލަރޝިޕަށް ކުރި ޚަރަދު، ކަނޑައަޅާ ގޮތެއްގެ މަތިން އަނބުރާ ދައްކަން ޖެހޭނެ" ކަމަށް އައު އުޞޫލުގައި ބަޔާންކޮށްފައިވެއެވެ.
މި ބަދަލުތަކަކީ ރާއްޖޭގެ މަތީ ތަޢުލީމީ ނިޒާމު ހަރުދަނާކޮށް، ޤައުމަށް ބޭނުންވާ ދާއިރާތަކުން މީހުން ބިނާކުރުމަށް ސަރުކާރުން ކުރަމުންދާ މަސައްކަތުގެ ބައެކެވެ.