އައްޑޫ ސިޓީގެ މޭޔަރުކަމަށް ޕީއެންސީގެ ފަރާތުން ވާދަކުރައްވާ ކެންޑިޑޭޓް މުޝްރިފް އަލީ، އައްޑޫގެ ބޯހިޔާވަހިކަމުގެ ދާއިރާގައި ހުރި ބޮޑެތި ކަންބޮޑުވުންތަކަށް ނިމުމެއް ގެނެސްދެއްވާނެ ކަމަށް ވައުދުވެވަޑައިގެންފިއެވެ. މުޝްރިފް ވިދާޅުވި ގޮތުގައި މޭޔަރުކަމަށް ހޮވިވަޑައިގެންފި ނަމަ، މަގާމާ ހަވާލުވެވަޑައިގަންނަވާ ފުރަތަމަ 6 މަސްދުވަހުގެ ތެރޭގައި މި މައްސަލަތައް ހައްލުކޮށްދެއްވާނެއެވެ.
މުޝްރިފް ފާހަގަކުރެއްވި ގޮތުގައި އައްޑޫގެ ގިނަ ރައްޔިތުންނަށް ގޯތި ލިބުނުކަމުގެ ލިޔުން ދީފައިވީ ނަމަވެސް، އޭގެ ތެރެއިން ގިނަ ބަޔަކަށް އަދިވެސް ބިން ހަވާލުކޮށް އިން ވަކިކޮށްދެވިފައެއް ނުވެއެވެ. މީގެ ތެރޭގައި މީގެ އެތައް އަހަރެއް ކުރިން ދޫކޮށްފައިވާ ބިންތައް ވެސް ހިމެނޭކަން އޭނާ ފާހަގަކުރެއްވިއެވެ. މީގެ އިތުރުން، ބިންތަކުގެ އިން ވަކިކޮށްދިނުމުގައި ވަކި ބަޔަކަށް އިސްކަންދޭ ކަމަށާއި، ގާތްގުޅުން އޮންނަ ނުވަތަ ސިޔާސީ މަންފާ ލިބޭ މީހުންނަށް ނޫނީ އެކަން ކޮށްނުދޭ ކަމުގެ ޝަކުވާ ރައްޔިތުން ކުރަމުންދާ ކަމަށް އޭނާ ވިދާޅުވިއެވެ.
އައްޑޫ ސިޓީގެ ހިތަދޫ އާއި ފޭދޫގައި ހުރި ބޯހިޔާވަހިކަމުގެ ސީރިއަސް މައްސަލަތަކަށް މުޝްރިފް ވަނީ އަލިއަޅުވާލައްވައިފައެވެ. މިގޮތުން ފޭދޫއިން ދޫކޮށްފައިވާ ބައެއް ބިންތަކަކީ ކަރަންޓުގެ މައި ކޭބަލްތަކުގެ މަތިން ދޫކޮށްފައިވާ ނުރައްކާތެރި ބިންތަކެއްކަމާއި، އަހަރެއް ވީއިރުވެސް އެކަމަށް ހައްލެއް ލިބިފައިނުވާކަން އޭނާ ފާހަގަކުރެއްވިއެވެ.
މީގެ އިތުރުން ކުރީގެ ގަބުރުސްތާނުތައް ހުރި ސަރަހައްދުތަކުން ބައެއް އާއިލާތަކަށް ގޯތި ދޫކޮށްފައިވާ މައްސަލައާއި، އެ ގޯތިތައް ބަދަލުކޮށްދިނުމަށް އެދި އާދޭސްކުރާތާ ގިނަ ދުވަސްތަކެއް ވީއިރުވެސް ކައުންސިލުން އެކަމަށް އިޖާބަދީފައި ނުވާކަމުގެ ޝަކުވާ މުޝްރިފް ވަނީ ފާޅުކުރައްވާފައެވެ.
މުޝްރިފްގެ މޭޔަރުކަމެއްގައި ބޯހިޔާވަހިކަމުގެ މައްސަލަތައް ހައްލުކުރާނީ ދެފުށް ފެންނަ، އިންސާފުވެރި ނިޒާމެއްގެ ތެރެއިން ކަމަށް އޭނާ ވިދާޅުވިއެވެ. އަދި އައްޑޫގެ ރައްޔިތުންނަށް ހަމަހަމަކަމާއެކު ބޯހިޔާވަހިކަން ކަށަވަރުކޮށްދިނުމަށްޓަކައި ތަފާތު މަޝްރޫއުތައް ފައްޓަވާނެ ކަމުގެ ޔަގީންކަން އޭނާ ވަނީ ދެއްވާފައެވެ.