މާލެ ސަރަހައްދުގެ ދަތުރުފަތުރުގެ ނިޒާމު ހަރުދަނާކޮށް، ތިމާވެއްޓާ ރައްޓެހި ދަތުރުފަތުރުގެ ހިދުމަތެއް ފޯރުކޮށްދިނުމަށް އެމްޓީސީސީން އަލަށް ފަށާ “މާލެ ޓެކްސީ” ހިދުމަތުގައި ތިން މޮޑެލްއެއްގެ އިލެކްޓްރިކް ވެހިކަލް (އީވީ) ބޭނުންކުރުމަށް ނިންމައިފިއެވެ. މި ހިދުމަތަކީ މާލޭގެ ވައި ނުސާފުވުން ކުޑަކޮށް، ދެމެހެއްޓެނިވި އަދި ސިއްހަތަށް ފައިދާހުރި މާހައުލެއް ބިނާކުރުމަށް އެޅޭ މުހިންމު ފިޔަވަޅެކެވެ.
މާލޭގެ ހަނި މަގުތަކާއި ގޯޅިތަކުގައި ދުއްވުމަށް ހާއްސަކޮށްގެން “ލުމިން” މޮޑެލްގެ 70 ކާރު މި ހިދުމަތުގައި ބޭނުންކުރާނެއެވެ. ސައިޒުން ކުޑަ މި ކާރުތަކަކީ ޔޫ-ޓާން ނެގުމަށް ފަސޭހަ، އަދި އެއްފަހަރާ ތިން ފަސިންޖަރުންނަށް ދަތުރުކުރެވޭނެ އުޅަނދުތަކެކެވެ. މިއީ މާލޭގެ ޓްރެފިކް ތޮއްޖެހުމަށް ބަލައި، ހާއްސަކޮށް ފަރުމާކޮށްފައިވާ އުޅަނދުތަކެކެވެ.
މާލެ، ހުޅުމާލެ އަދި އެއާޕޯޓާ ދެމެދު ދަތުރުކުރުމަށް ހާއްސަކޮށްގެން އެމްޓީސީސީން ބޭނުންކުރާނީ “ޑީޕަލް އެސްފައިވް” އަދި “ޑީޕަލް އެސްސެވަން” މޮޑެލްގެ ކާރުތަކެވެ. މީގެ ތެރޭގައި އެސްފައިވްގެ 60 ކާރު އަދި އެސްސެވަންގެ 20 ކާރު ހިމެނެއެވެ. މި އުޅަނދުތަކަކީ ގިނަ އަދަދަކަށް ލަގެޖު އުފުލޭނެ ޖާގަ އޮތް، ތަނަވަސް އަދި އަރާމު އީވީ ކާރުތަކެކެވެ.
ކަސްޓަމަރުންނާއި ޑްރައިވަރުންގެ ރައްކާތެރިކަން ކަށަވަރުކުރުމަށްޓަކައި ހުރިހާ ކާރެއްގައިވެސް 360 ޑިގްރީ ސެކިއުރިޓީ ކެމެރާ އާއި ހާއްސަ ސެންސަރުތައް ހަރުކޮށްފައި ހުންނާނެއެވެ. މީގެ އިތުރުން، ހުރިހާ ކާރެއްގައިވެސް ކަސްޓަމަރުންނަށް އަރާމު ދަތުރެއް ކޮށްލެވޭނެ ފަދަ ލެދަރު ސީޓުތަކާއި ޒަމާނީ ވަސީލަތްތައް ހިމެނޭނެ ކަމަށް އެމްޓީސީސީން މައުލޫމާތުދެއެވެ.
މި ހިދުމަތް ދިނުމަށް ހަމަޖެހިފައިވަނީ ހާއްސަ މޯބައިލް އެޕްލިކޭޝަނެއް މެދުވެރިކޮށް 24 ގަޑިއިރުއެވެ. އެޕް މެދުވެރިކޮށް ދަތުރުތައް އެސައިން ކުރާތީ، ޑްރައިވަރުން ވަކި ތަންތަނަށް ނޫނީ ދަތުރު ނުނަގާ މައްސަލައަށް ދާއިމީ ހައްލެއް ލިބިގެންދާނެއެވެ. އަދި މި ޓެކްސީ ލައިންގެ ޑްރައިވަރުން ތިބޭނީ ހާއްސަ ޔުނިފޯމެއްގައި ކަމަށްވެސް އެ ކުންފުނިން ބުނެއެވެ.