ބީއެމްއެލްގެ ސަބްސިޑިއަރީ ކުންފުނި، ބީއެމްއެލް އެފޯޑަބަލް ހޯމް ލީސިން ކޮމްޕެނީން ހުޅުމާލޭގައި އިމާރާތްކުރާ އަގުހެޔޮ ފްލެޓުތަކުގެ ތެރެއިން ބެއިޖިން އަރބަން ކޮންސްޓްރަކްޝަން ގްރޫޕް (ބީޔޫސީޖީ) އާ ހަވާލުކޮށްގެން ކުރިއަށްގެންދާ 1,190 ހައުސިންގ ޔުނިޓްގެ ބިންގާއަޅައި އަމަލީ މަސައްކަތް ރަސްމީކޮށް ފަށައިފިއެވެ.
މި މަޝްރޫއުގެ ބިންގާ އެޅުމަށް ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒެވެ. މި ރަސްމިއްޔާތުގައި އިމާރާތް ކުރުމާއި ގެދޮރުވެރި ކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބާއި، ބީއެމްއެލްގެ ޗެއާޕަރސަން އަހުމަދު އަލީ ހަބީބާއި، ސީއީއޯ މުހައްމަދު ޝަރީފްގެ އިތުރުން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގް ޝިއަންހުއާ އަދި ބީޔޫސީޖީގެ އިސްވެރިން ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާހަކަދައްކަވަމުން ބީއެމްއެލްގެ ސީއީއޯ މުހައްމަދު ޝަރީފު ވިދާޅުވީ، މީގެ ކުރިން ރާއްޖޭގައި މިފަދަ ބޮޑު މަޝްރޫއެއް މިހާ އަވަސް މިނެއްގައި ތަފާތު ކޮންޓްރެކްޓަރުންނާ ހަވާލުކޮށްގެން ކުރިއަށް ގެންގޮސްފައި ނުވާ ކަމަށެވެ. އަދި މި މަޝްރޫއު 2028 ވަނަ އަހަރުގެ މެދުތެރޭގައި އެއްކޮށް ނިންމާލެވޭނެ ކަމަށް އޭނާ ލަފާކުރެއްވިއެވެ. ޝަރީފު އިތުރަށް ވިދާޅުވީ "މަސައްކަތުގެ މި ބާރު މިނަކީ ދިވެހި އެތައް ހާސް އާއިލާތަކަށާއި، އަދި އަޅުގަނޑުމެންނަށްވެސް އުއްމީދާއި އުފަލާއި ހިތްހަމަޖެހުން ގެނުވާނެކަމެއް" ކަމަށެވެ.
ބޭންކުގެ ދައުރާ ގުޅޭގޮތުން ވާހަކަދައްކަވަމުން ޝަރީފު ފާހަގަކުރެއްވީ، ގައުމީ ބޭންކެއްގެ އެންމެ އިސް މަސްއޫލިއްޔަތަކީ ހަމައެކަނި މާލީ ފައިދާ ހޯދުން ނޫން ކަމަށާއި، ގައުމުގެ އިޖުތިމާއީ އަދި އިގްތިސާދީ ތަރައްގީއަށް އިންވެސްޓްކޮށް ރައްޔިތުންގެ ދިރިއުޅުމުގެ ފެންވަރު މަތިކުރުން ކަމަށެވެ. މި މަޝްރޫއުގެ ސަބަބުން ބޯހިޔާވަހިކަމަށް ބޭނުންވެފައިވާ ގިނަ ރައްޔިތުންތަކަކަށް އަތްފޯރާފަށުގައި ރައްކާތެރި ބޯހިޔާވަހިކަމެއް ލިބިގެންދާނެކަން އޭނާ ފާހަގަކުރެއްވިއެވެ.
ޖުމްލަ 3,260 ފްލެޓް އެޅުމަށް ހަމަޖެހިފައިވާ މި ބިޔަ މަޝްރޫއުގެ ދަށުން، މިދިޔަ ހަފުތާއެއްހާ ދުވަސްތެރޭގައި 1,706 ހައުސިންގ ޔުނިޓުގެ މަސައްކަތް ވަނީ ފަށާފައެވެ. މިރޭ ބިންގާ އެޅި 1,190 ޔުނިޓާއެކު، މިހާތަނަށް ޖުމްލަ 2,896 ޔުނިޓްގެ އަމަލީ މަސައްކަތް މިވަނީ ފެށިފައެވެ.
މި މަސައްކަތް ހަވާލުކޮށްފައިވާ ބީޔޫސީޖީ އަކީ ބައިނަލްއަގުވާމީ ގޮތުން ބޮޑެތި މަޝްރޫއުތައް ހިންގާ ތަޖުރިބާކާރު ކުންފުންޏެކެވެ. އެ ކުންފުނިން ރާއްޖޭގައި މީގެ ކުރިން ހިންގާފައިވާ ފާހަގަކޮށްލެވޭ މަޝްރޫއުތަކުގެ ތެރޭގައި ވެލާނާ އިންޓަރނޭޝަނަލް އެއާޕޯޓުގެ ތަރައްގީގެ މަސައްކަތްތައް ހިމެނެއެވެ.