ރާއްޖެއަށް މިހާރު އަންނަމުންދާ ތަރައްގީއަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ ބޭނުންތައް ފުއްދައިދިނުމަށް އެއްވެސް މަޑުޖެހުމެއް ނެތި ކުރައްވަމުން ގެންދަވާ މަސައްކަތްޕުޅުގެ ނަތީޖާ ކަމަށް ބޭންކް އޮފް މޯލްޑިވްސް (ބީއެމްއެލް)ގެ ސީއީއޯ މުހައްމަދު ޝަރީފު ވިދާޅުވެއްޖެއެވެ.
ހުޅުމާލޭގެ ދެވަނަ ފިޔަވަހީގައި 1،190 ފްލެޓް އެޅުމުގެ ބިންގާ އެޅުމުގެ ރަސްމިއްޔާތުގައި ވާހަކަދައްކަވަމުން ޝަރީފު ފާހަގަކުރެއްވީ، ސަރުކާރުން އިޖުތިމާއީ ހައްލުތައް ހޯދައިދިނުމަށް ދިވެހި ކުންފުނިތަކާ ހަވާލުކޮށްގެން ބާރުމިނުގައި މަޝްރޫއުތައް ހިންގަމުންދާ ކަމަށެވެ. މިއީ ރައްޔިތުންގެ ލާބަޔާއި މަންފާއަށްޓަކައި ސަރުކާރުން އިސްކަންދޭ މިންވަރު ހާމަވާ ކަމެއްގެ ގޮތުގައި އޭނާ ސިފަކުރެއްވިއެވެ.
މި މަޝްރޫއުތަކަށް ބޭންކިން އުސޫލުތަކުގެ ތެރެއިން ކޮންޓްރެކްޓަރު ފައިނޭންސިންގ ހަމަޖައްސައިދީފައިވަނީ އޭގެ ސަބަބުން ރާއްޖޭގެ ކޮންސްޓްރަކްޝަން ދާއިރާއަށާއި ބޭންކުގެ ކަސްޓަމަރުންނަށް ބޮޑެތި މަންފާތަކެއް ކުރާނެތީ ކަމަށް ޝަރީފު ވިދާޅުވިއެވެ. މިފަދަ ފުރުސަތުތަކުގެ ސަބަބުން ކުންފުނިތަކުގެ ގާބިލުކަން އިތުރުވެ، ކުދި އަދި މެދު ފަންތީގެ ވިޔަފާރިތަކަށް އާ ފުރުސަތުތައް ހުޅުވިގެންދާނެކަން އޭނާ ފާހަގަކުރެއްވިއެވެ.
މީގެ އިތުރުން، މިފަދަ މަޝްރޫއުތަކުގެ ސަބަބުން މުޅި އިގްތިސާދުގައި ފައިސާ ދައުރުވާ މިންވަރު އިތުރުވެ، ގައުމީ އުފެއްދުންތެރިކަމަށް ހެޔޮ ބަދަލުތަކެއް އަންނާނެ ކަމަށް ބީއެމްއެލްގެ ސީއީއޯ ވިދާޅުވިއެވެ.
ރައީސް މުއިއްޒު ގެންގުޅުއްވާ "އެންމެނަށް ބޯހިޔާވަހިކަން" ކަށަވަރުކޮށްދެއްވުމުގެ ސިޔާސަތަކީ ދިވެހި އާއިލާތަކަށް އުފާވެރި ދިރިއުޅުމެއް ހޯދައިދިނުމަށް ކުރައްވާ މުހިންމު މަސައްކަތެއްކަން ޝަރީފު ފާހަގަކުރެއްވިއެވެ. އޭނާ ވިދާޅުވީ ބޯހިޔާވަހިކަމަކީ ރައްޔިތުންގެ އެންމެ އަސާސީ އެއް ބޭނުން ކަމަށާއި، އެކަން ހައްލުކުރުމަށް ސަރުކާރުން ކުރާ މަސައްކަތަށް ބޭންކުގެ ފުރިހަމަ އެއްބާރުލުން ލިބޭނެ ކަމަށެވެ.
ރާއްޖޭގެ އިގްތިސާދީ އަދި އިޖުތިމާއީ ކުރިއެރުމަށް ރައީސުލްޖުމްހޫރިއްޔާ ގެންގުޅުއްވާ ހަރުދަނާ ސިޔާސަތުތަކަށްޓަކައި ޝަރީފު ވަނީ އެމަނިކުފާނަށް ޝުކުރު އަދާކުރައްވާފައެވެ. މި ރަސްމިއްޔާތުގައި ސަރުކާރުގެ އިސްވެރިންނާއި ކަމާގުޅޭ ދާއިރާތަކުގެ ބޭފުޅުން ބައިވެރިވެވަޑައިގެންނެވިއެވެ.