މާދަމާ ބާއްވާ އިންތިޚާބުތަކުގައި ވޯޓުލުމުގެ ހުރިހާ ކަމެއްވެސް ހިނގާނީ މިނިވަންކަމާއި އިންޞާފުވެރިކަމާއެކުކަން ކަށަވަރުކުރުމުގެ ގޮތުން ކުރަންޖެހޭ ހުރިހާ ކަމެއް ކޮށްފައިވާކަމަށް އިލެކްޝަންސް ކޮމިޝަންގެ ރައީސް މުޙައްމަދު ޒާހިދު ވިދާޅުވެއްޖެއެވެ. މި އިންތިޚާބުގައި ދެލައްކަ ނުވަދިހަ ހާހަށްވުރެ ގިނަ މީހުންނަށް ވޯޓުލުމުގެ ޙައްގު ލިބިގެންވެއެވެ.
ހޮނިހިރު ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ އިތުރުން ރައްޔިތުންގެ ޚިޔާލު ހޯދުމުގެ އާންމު ވޯޓަށް އިލެކްޝަންސް ކޮމިޝަނުން މިހާރު ވަނީ ހުރިހާ ތައްޔާރީތަކެއް ވެފައެވެ. ކޮމިޝަންގެ ރައީސް ވިދާޅުވީ، އިންތިޚާބުތަކުގެ ވޯޓުލުމުގެ ކަންކަން ނުރަނގަޅު އެންމެހާ ނުފޫޒަށް ލެނބުމެއް ނެތި ކުރިއަށްދާނެ ކަމުގެ ޔަގީންކަން އަރުވާ ކަމަށެވެ.
މި މަސައްކަތުގައި ދައުލަތުގެ މުއައްސަސާތަކާއި، ސަރުކާރުގެ ވުޒާރާތަކާއި، ސިޔާސީ ޕާޓީތަކުގެ އިތުރުން ރައްޔިތުންގެ ފަރާތުން ލިބެމުންދާ އެއްބާރުލުން ޒާހިދު ފާހަގަކުރެއްވިއެވެ. "ވޯޓުލުމުގެ އެންމެހައި ކަންތައްތައް އިންޞާފުވެރިކަމާއި، އަމާންކަމާއެކު ކުރިއަށް ގެންދިޔުމަށްޓަކައި، ދައުލަތުގެ މުއައްސަސާތަކާ، ސަރުކާރުގެ ވުޒާރާތަކާ، ސިޔާސީ ޕާޓީތަކުންނާ، ޖަމްޢިއްޔާ ޖަމާޢަތްތަކުންނާ، ޢާންމު ރައްޔިތުން މިހާތަނަށް ދެއްވާފައިވާ އެއްބާރުލެއްވުމަށް އިޚްލާޞްތެރިކަމާއެކު ޝުކުރު ދަންނަވަން،" ޒާހިދު ވިދާޅުވިއެވެ.
މިފަހަރުގެ ލޯކަލް ކައުންސިލްތަކުގެ އިންތިޚާބުގައި 225 ދާއިރާއަކުން 678 މަޤާމަށް 1,368 ކެންޑިޑޭޓުން ވާދަކުރެއެވެ. އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ 225 ދާއިރާއަކުން 678 މަޤާމަށް 1,593 ކެންޑިޑޭޓުން ވާދަކުރެއެވެ. މި އިންތިޚާބުތަކުގައި ޖުމުލަ 294,876 ރައްޔިތުންނަށް ވޯޓުދިނުމުގެ ޙައްޤު ލިބިފައިވާއިރު، މުޅި ރާއްޖޭގައި 588 ވޯޓުލާ މަރުކަޒު ވަނީ ޤާއިމުކޮށްފައެވެ.
އިންތިޚާބުގެ ކަންކަން އޮބްޒާވްކުރުމަށްޓަކައި 1,626 ލޯކަލް އޮބްޒާވަރުންނާއި 38 ބައިނަލްއަޤްވާމީ އޮބްޒާވަރުން ހަރަކާތްތެރިވާނެއެވެ. މީގެ އިތުރުން ކެންޑިޑޭޓުންގެ މަންދޫބުންގެ ގޮތުގައި 4,021 ފަރާތަކާއި، އިންތިޚާބު މޮނީޓަރ ކުރުމަށް 3,275 ފަރާތެއް ރާއްޖޭގެ އެކި ކަންކޮޅުތަކުގައި ހަރަކާތްތެރިވާނެ ކަމަށް އިލެކްޝަންސް ކޮމިޝަނުން މަޢުލޫމާތު ދެއެވެ.