މިއަދު ކުރިއަށްދާ ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ އިތުރުން ރައްޔިތުންގެ ޚިޔާލު ހޯދުމުގެ ވޯޓުލުމުގެ ވަގުތު ހަވީރު 5:00 އާ ހަމައަށް އިތުރުކުރުމަށް އިލެކްޝަންސް ކޮމިޝަނުން ނިންމައިފިއެވެ. މިގޮތަށް ނިންމެވީ މިއަދު މޫސުން ވަރަށް ބޮޑަށް ހޫނުވުމުގެ ސަބަބުން ގިނަ ބަޔަކަށް ވޯޓުލާ މަރުކަޒުތަކަށް ހާޒިރުވުމަށް ދަތިތަކެއް ކުރިމަތިވުމާ ގުޅިގެންނެވެ.
އިލެކްޝަންސް ކޮމިޝަނުގެ ރައީސް މުހައްމަދު ޒާހިދު ވިދާޅުވީ، ވޯޓުލުމުގެ ވަގުތު އިތުރުކުރަން ނިންމީ ހަވީރު ފިނިވާން ފެށުމާއެކު ވޯޓުލާން ނިކުންނަ މީހުންގެ އަދަދު އިތުރުވެ، ކިއުތައް ދިގުވަމުންދާތީ ކަމަށެވެ. "ތިން އިންތިހާބުގެ ވޯޓުލުމުގެ ވަގުތު ހަވީރު 5:00 އާ ހަމައަށް އިތުރުކުރުމަށްް އެ ކޮމިޝަނުން ނިންމީ މިއަދު ހޫނުގަދަވުމުގެ ސަބަބުން ގިނަ ބަޔަކަށް ވޯޓުލުމަށް ހާޒިރުނުވެވުމާ ގުޅިގެން،" ޒާހިދު ވިދާޅުވިއެވެ.
އިލެކްޝަންސް ކޮމިޝަނުން އެންމެ ފަހުން އާންމުކުރި ތަފާސްހިސާބުތަކަށް ބަލާއިރު، މިއަދު މެންދުރުފަހު 2:00 އާ ހަމައަށް ވޯޓުލާފައިވަނީ ވޯޓުލުމުގެ ހައްގު ލިބިފައިވާ އާބާދީގެ 44.75 އިންސައްތަ މީހުންނެވެ. އެއީ ޖުމްލަ 131,947 މީހުންނެވެ. އޭގެ ތެރޭގައި ހިމެނެނީ 63,175 އަންހެނުންނާއި 68,772 ފިރިހެނުންނެވެ. މި އިންތިޚާބުގައި ޖުމްލަ 294,876 މީހުންނަށް ވޯޓުލުމުގެ ޙައްޤު ލިބިގެންވެއެވެ.
ކޮމިޝަނުން ބުނިގޮތުގައި، ވޯޓުލުން ނިންމައި ވޯޓު ފޮށި ބަންދުކުރަން ކުރިން ހަމަޖެހިފައި އޮތް ސުންގަޑި ކަމުގައިވާ 4:00 ކައިރިވަމުން އައިވަރަކަށް ކިއުތަކުގައި ތިބި މީހުންގެ އަދަދު ވަނީ ވަރަށް ބޮޑަށް އިތުރުވެފައެވެ. އިތުރުކުރި ވަގުތު ހަމަވުމަށްފަހު، އެއްވެސް މީހަކަށް ކިއުއަށް އެރުމުގެ ފުރުސަތެއް ނުލިބޭނެއެވެ. ވޯޓު ފޮށިތައް ބަންދުކުރާނީ 5:00 ޖަހާއިރު ކިއުގައި ތިބި މީހުން ވޯޓުލާ ނިމުމުންނެވެ.
މި އިންތިޚާބަށްޓަކައި ރާއްޖޭގެ އެކި ސަރަޙައްދުތަކުގައި ޖުމްލަ 588 ވޯޓުފޮށި ބަހައްޓާފައިވާއިރު، ކޮންމެ މަރުކަޒެއްގައި ތިން ވޯޓުފޮށި ހުންނާނެއެވެ. ވޯޓު ގުނަން ފަށާނީ ފޮށިތައް ބަންދުކުރާތާ 30 މިނެޓް ފަހުން ކަމަށްވެސް އިލެކްޝަންސް ކޮމިޝަނުން މައުލޫމާތު ދެއެވެ. ކޮމިޝަނުން ވަނީ ކިއު ބަންދުކުރުމުގެ ކުރިން ވީހާވެސް ގިނަ ބަޔަކު ވޯޓުލާން ނިކުތުމަށް އިލްތިމާސްކުރައްވާފައެވެ.