ގއ.އަތޮޅު ތަޢުލީމީ މަރުކަޒުގައި ހިނގި އަލިފާނުގެ ހާދިސާއާ ގުޅިގެން، އެ ސްކޫލުގެ ކިޔެވުން މެދުނުކެނޑި ކުރިއަށްގެންދިއުމަށް ބޭނުންވާ މުހިންމު ސާމާނު ތަޢުލީމީ ވުޒާރާއިން ފޯރުކޮށްދީ، އިންތިޒާމުތައް ހަމަޖެއްސުމުގެ މަސައްކަތް ފަށައިފިއެވެ.
ބުރާސްފަތި ދުވަހުގެ ރޭ ދަންވަރު ހިނގި މި އަލިފާނުގެ ބޮޑު ހާދިސާގައި އެ ސްކޫލުގެ ޕްރައިމަރީ ޓީޗަރުންގެ ސްޓާފްރޫމާއި، ޕްރިންޓިން ރޫމްގެ އިތުރުން އެއް ކިލާސްރޫމް ވަނީ ބޭނުންނުކުރެވޭ ވަރަށް އަނދާފައެވެ. މި ހާދިސާ ހިނގަން މެދުވެރިވީ ސްޓާފްރޫމުގައި ހުރި އޭސީއެއްގައި ރޯވެގެން ކަމަށް މަޢުލޫމާތު ލިބިފައިވާއިރު، މި ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ.
ތަޢުލީމީ ވުޒާރާއިން ވިދާޅުވި ގޮތުގައި، ހާދިސާ ހިނގިތާ 24 ގަޑިއިރު ނުވަނީސް އެ ވުޒާރާގެ ޓީމެއް ވަނީ ވިލިނގިއްޔަށް ގޮސް ސްކޫލުގެ ހާލަތު ބަލާފައެވެ. އަދި ކިޔަވައިދިނުމުގެ މަސައްކަތްތައް އަލުން ފެށުމަށްޓަކައި އެއަރ ކާގޯ މެދުވެރިކޮށް 10 ކޮމްޕިއުޓަރު ސިސްޓަމާއި، 3 ޕްރިންޓަރުގެ އިތުރުން 15 ފޮށިގަނޑު ޓެކްސްޓް ފޮތް މިހާރު ވަނީ އެ ސްކޫލަށް ފޮނުވާފައެވެ.
ސްކޫލުގެ ހާލަތު ތަޢުލީމީ ވުޒާރާއިން ވަރަށް ގާތުން ބަލަމުންދާއިރު، ދަރިވަރުންގެ ކިޔެވުމަށް ބުރޫނާރާނެހެން އިތުރު އިންތިޒާމުތައް ހަމަޖެއްސުމުގެ މަސައްކަތް މިހާރު ދަނީ ކުރަމުންނެވެ.