މާލެ ސިޓީގެ މޭޔަރު ކަމަށް ވާދަކުރެއްވުމުން ވޯޓް ދެއްވި ހުރިހާ ރައްޔިތުން ކުރެއްވި އިތުބާރާއި ދެއްވި ތާއީދު އަބަދުވެސް ޝުކުރުވެރިކަމާެކު ހަނދާން ބަހައްޓާނެ ކަމަށް ކޮންގްރެސްގެ ޓިކެޓްގައި މާލޭ ސިޓީގެ މޭޔަރު ކަމަށް ވާދަކުރެއްވި މޫސާ އަލީ ޖަލީލް ވިދާޅުވެއްޖެ އެވެ.
މޫސާ އަލީ ޖަލީލް މިހެން ވިދާޅުވީ އިންތިޚާބަށްފަހު އާންމުކުރެއްވި ޝުކުރުގެ މެސެޖުގަ އެވެ. އެ މެސެޖުގައި އޭނާ ވަނީ މާލެ ސިޓީގެ މޭޔަރުކަމުގެ މަޤާމަށް ކޮންގްރެސް ޕާޓީގެ ޓިކެޓްގައި ވާދަކުރުމުގެ ފުރުސަތު ދެއްވި ކަމަށްޓަކައި ރައީސުލްޖުމްހޫރިއްޔާ އަދި ކޮންގްރެސް ޕާޓީގެ ރައީސް ޑރ. މުޙައްމަދު މުޢިއްޒަށް ޚާއްޞަ ޝުކުރެއް އަދާކުރައްވާފަ އެވެ.
މީގެ އިތުރުން، އިންތިޚާބުގެ ތެރޭގައި ދެއްވި ބޮޑު އެހީތެރިކަމަށްޓަކައި ކޮންގްރެސްގެ ލީޑަރޝިޕާއި މެންބަރުންނަށް ވެސް މޫސާ އަލީ ޖަލީލް ވަނީ ނުހަނު އިޚްލާސްތެރިކަމާއެކު ޝުކުރު އަދާކުރައްވާފަ އެވެ.
ރައްޔިތުންނަށް ޝުކުރު އަދާކުރައްވަމުން މޫސާ އަލީ ޖަލީލް ވިދާޅުވީ، “މާލެ ސިޓީގެ މޭޔަރުކަމަށް އަޅުގަނޑަށް ވޯޓް ދެއްވި ހުރިހާ ލޮބުވެތި ރައްޔިތުން އަޅުގަނޑަށް ކުރެެއްވި އިތުބާރާ ދެއްވި ތާއީދު އަބަދުވެސް ޝުކުރުވެރިކަމާއެެކު ހަނދާން ބަހައްޓާނަމެވެ.”
މޫސަގެ މެސެޖުގައި ވަނީ މި އިންތިޚާބުގައި ކާމިޔާބު ހޯއްދެވި ހުރިހާ ކެންޑިޑޭޓުންނަށް މަރުޙަބާ ދަންނަވާފަ އެވެ. އަދި ރާއްޖެއާ ދިވެހި ރައްޔިތުންނަށް އަބަދުވެސް އެދެނީ ފާގަތިކަމާއި ބާއްޖަވެރިކަން ކަމުގައި އޭނާ ވިދާޅުވި އެވެ.