މިދިޔަ ހޮނިހިރު ދުވަހު ބޭއްވި ލޯކަލް ކައުންސިލް އިންތިޚާބުގައި ކ. އަތޮޅުގެ ނުވަ ރަށުގެ ތެރެއިން ހަ ރަށެއްގެ ރަށު ކައުންސިލްގެ ރައީސް ކަމުގެ މަޤާމު ކޮންގްރެސް ޕާޓީގެ ކެންޑިޑޭޓުން ކާމިޔާބުކޮށް، އެ އަތޮޅުގައި އެ ޕާޓީއަށް އޮތް ބޮޑު ތާއީދު ދައްކާލައިފިއެވެ.
މި އިންތިޚާބުގައި ކޮންގްރެސް ޕާޓީން ވަނީ ކ. ކާށިދޫ، ތުލުސްދޫ، ހުރާ، ހިންމަފުށީ، ގުޅި، މާފުށީ އަދި ގުރައިދޫ ކައުންސިލްގެ ރައީސް ކަމުގެ މަޤާމުތައް ހޯދާފައެވެ. މީގެ ތެރެއިން ގިނަ ރަށްތަކެއްގެ ކައުންސިލްގެ ފުލް މެޖޯރިޓީވެސް ކާމިޔާބުކުރީ ކޮންގްރެސް ޕާޓީންނެވެ.
ތަފްސީލީ ނަތީޖާއަށް ބަލާއިރު، ކާށިދޫ ކައުންސިލްގެ ރައީސް ކަމަށް އިންތިޚާބުވި ސަބާހް މުހައްމަދު 485 ވޯޓް ހޯއްދެވިއިރު، އެ ރަށުގެ ފުލް މެޖޯރިޓީވެސް ލިބުނީ ކޮންގްރެސްއަށެވެ. ތުލުސްދޫ ކައުންސިލްގެ ރައީސްގެ މަގާމުގައި މިހާރުވެސް ހުންނެވި އަސްލަމް މޫސާ 364 ވޯޓާއެކު ދެވަނަ ދައުރެއް ކަށަވަރު ކުރެއްވިއިރު، ހުރާ ކައުންސިލްގެ ރައީސް ކަމަށް އިންތިޚާބުވި އިޙްސާން ޖަމީލް ވަނީ 544 ވޯޓް ހޯއްދަވާފައެވެ. މި ދެ ރަށުގެ އަންހެނުންނަށް ޚާއްސަ ގޮނޑިތައްވެސް ކާމިޔާބުކުރީ ކޮންގްރެސް ޕާޓީންނެވެ.
ހިންމަފުށީ ކައުންސިލްގެ ރައީސް ކަމަށް ޙަސަން ފާޢިޒު 386 ވޯޓާއެކު އިންތިޚާބުވިއިރު، އެ ކައުންސިލްގެ ބާކީ ދެ ގޮނޑިވެސް ކާމިޔާބުކުރީ އެ ޕާޓީންނެވެ. ގުޅި ކައުންސިލްގެ ރައީސް ކަމުގެ މަޤާމު މުޙައްމަދު ޙުމައިދު ހޯއްދެވިއިރު، މާފުށީ ކައުންސިލްގެ ރައީސް ކަމަށް އިންތިޚާބުވީ މިހާރުވެސް އެ ކައުންސިލްގެ ނައިބު ރައީސްގެ މަޤާމުގައި ހުންނެވި އަލީ ޝަމްޢޫން އެވެ. ޝަމްޢޫން ވަނީ 705 ވޯޓް ހޯއްދަވާފައެވެ.
ގުރައިދޫ ކައުންސިލްގެ ރައީސް ކަމަށް އިންތިޚާބުވި އިބްރާހިމް ޝަލީޒް މަޤާމު ކަށަވަރު ކުރެއްވީ ވޯޓަކާ ނުލައެވެ. ޝަލީޒްގެ އިތުރުން އެ ކައުންސިލްގެ ހުރިހާ ގޮނޑިއެއްވެސް ކާމިޔާބުކުރީ ކޮންގްރެސް ޕާޓީގެ ކެންޑިޑޭޓުންނެވެ.