ގަސްތުގައި އޮޅުވާލުމުގެ ނިޔަތުގައި އަދި ބައެއް ފަހަރު ނޭނގިތިބެވެސް ޞައްޙަ ނޫން އަދި ޙަޤީގަތާ ޚިލާފު ވާހަކަތައް ސޯޝަލް މީޑިއާގެ އެކި މަންސަތަކުގައި ފަތުރާކަމަށާއި، އެގޮތަށް ޢަމަލުނުކުރުމަށް ދުނިޔޭގެ ޞިއްޙަތު ދުވަހުގެ ޚިތާބުގައި ޞިއްޙީ ވަޒީރު ޢަބްދުﷲ ނާޒިމް އިބްރާހީމް އިލްތިމާސްކުރައްވައިފިއެވެ. މިއަދު އާއްމުކުރެއްވި ޚިތާބުގައި ވަޒީރު ވިދާޅުވީ، ޞިއްޙީ ކަންކަމާއި ގުޅޭގޮތުން އެކި މަންސަތަކުގައި ފަސޭހަކަމާއެކު އަދި ފަރުވާލެއް ނެތި މި ޒަމާނުގައި ދޮގު މަޢުލޫމާތު ފަތުރަމުންދާ ކަމަށެވެ.
ވަޒީރު ނާޒިމް ފާހަގަކުރެއްވި ގޮތުގައި، ވަކީން ޚާއްޞަކޮށް ބަލިބައްޔާއި، ބަލި ޖެހުމާއި ފެތުރުމާއި، އަދި ބަލިތަކުން ފަރުވާ ހޯދުމާ ގުޅޭގޮތުން ސާބިތުނުހިފޭ ޔޯލަ ވާހަކަ ދެއްކުމާއި، ވެކްސިންއާއި ޑޮކްޓަރީ ފަރުވާއާ ގުޅޭގޮތުން ކަނޑައެޅިގެން ދޮގު މަޢުލޫމާތު ފެތުރުން ވަނީ އިތުރުވެފައެވެ. “ބޭހުގެ ބަދަލުގައި އެވެނި ކަމެއް ކުރުމަށް ނުވަތަ މިވެނި އެއްޗެއް ބޭނުންކުރުމަށް ވަކާލާތުކުރާކަން ފާހަގަކުރެވޭ” ވަޒީރު ވިދާޅުވިއެވެ.
މިފަދަ ޢަމަލުތަކަކީ ވަރަށް ޒިންމާދާރުކަން ކުޑަ، އަދި ބައެއް ފަހަރަށް މީހުންގެ ފުރާނައަށް ނުރައްކާވާ ފަދަ ކަންކަން ކުރިމަތިވެދާނެ ކަންކަން ކަމަށް ވަޒީރު ސިފަކުރެއްވިއެވެ. އެހެންކަމުން، އަމިއްލަ ނަފްސާއި އާއިލާގެ ޞިއްޙީ ދުޅަހެޔޮކަމާ ގުޅޭ މުހިއްމު ނިންމުންތަކުގައި، ޞިއްޙީ އިދާރާތަކާއި ޚިދުމަތްތެރިންގެ ލަފައާއި އިރުޝާދަށް އިތުބާރުކުރުމަށް އެމަނިކުފާނު ބާރުއެޅުއްވިއެވެ.
ރާއްޖޭގެ ޞިއްޙީ ނިޒާމާ ގުޅޭގޮތުން ވާހަކަދައްކަވަމުން ވަޒީރު ވިދާޅުވީ، މިއީ ޒަމާނީ މެޑިކަލް ސައިންސާއި ވަސީލަތްތަކުގެ މައްޗަށް ބަރޯސާވެފައިވާ، ތަމްރީނު ލިބިފައިވާ ޤާބިލް ޚިދުމަތްތެރިން މަސައްކަތްކުރާ ހަރުދަނާ ނިޒާމެއް ކަމަށެވެ. ރާއްޖޭގައި ބަލިތަކުން ދިފާއުވުމާއި ބައެއް ބަލިތައް ނައްތާލުމުގައި ހޯދާފައިވާ ކާމިޔާބީތަކަކީ ސާބިތުހިފޭ ފަންނީ މަޢުލޫމާތަށް އިތުބާރުކުރުމުގެ ނަތީޖާކަންވެސް އެމަނިކުފާނު ފާހަގަކުރެއްވިއެވެ.
ޚިތާބު ނިންމަވާލައްވަމުން ވަޒީރު ވަނީ، ކޮންމެ މީހަކުވެސް އެމީހެއްގެ ޞިއްޙީ ދުޅަހެޔޮކަމާ ގުޅޭ މުހިއްމު ހެޔޮ ބަދަލުތަކެއް ގެނައުމަށް މަސައްކަތްކޮށް، ޞިއްޙީ ގޮތުން ނުރަނގަޅު އާދަތައް ދޫކޮށްލުމަށް މުޅި މުޖުތަމަޢަށް އިލްތިމާސްކުރައްވާފައެވެ.