މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ދުނިޔޭގެ އިޤްތިޞާދަށް ނޭދެވޭ އަސަރުތަކެއް ކޮށް، ބައެއް ތަކެތި ލިބުމުގައި ދަތިތަކެއް ހުރިނަމަވެސް، ރާއްޖެއަށް ބޭނުންވާ ތެލާއި އަސާސީ މުދާ މިހާތަނަށް ދަތިކަމެއް ނެތި ލިބެމުން އަންނަކަމަށް ސަރުކާރުން ހާމަކޮށްފިއެވެ. މިކަން ހާމަކުރެއްވީ މެދުއިރުމަތީގެ ހަމަނުޖެހުންތަކާ ގުޅިގެން ދިވެހި ރައްޔިތުންނަށް ކުރިމަތިވެދާނެ ދަތިތައް ޙައްލުކުރުމަށް ރައީސުލްޖުމްހޫރިއްޔާ އުފައްދަވާފައިވާ ވަޒީރުންގެ ޚާއްސަ ކޮމިޓީންނެވެ.
ކޮމިޓީގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވީ، ހަނގުރާމަ ކުރިއަށްދާ މި ދަނޑިވަޅުގައި ދުނިޔޭގެ އިޤްތިޞާދަށް ގޮންޖެހުންތައް ކުރިމަތިވަމުންދާ ކަމީ ފެންނަން އޮތް ޙަޤީގަތެއް ކަމަށެވެ. ނަމަވެސް ރާއްޖެއަށް ބޭނުންވާ ކާބޯތަކެއްޗާއި، ތެލާއި، ބޭސް ފަދަ ޒަރޫރީ ސާމާނު މެދުނުކެނޑި ލިބޭނެ އިންތިޒާމް ހަމަޖެއްސުމަށް ގިނަ ޤައުމުތަކާއެކު ރަސްމީ މުޢާމަލާތްތައް ކުރެވެމުންދާ ކަމަށް ވަޒީރު ވިދާޅުވިއެވެ.
“ޒަރޫރީ ބޭނުންތަކަށް ބޭނުންވާ ތަކެތި ސަޕްލައި މެދުނުކެނޑި ދެމެހެއްޓެނިވި ގޮތެއްގައި ރައްޔިތުންނަށް ފޯރުކޮށްދިނުމަށް އަޅަންޖެހޭ ހަމަ ހުރިހާ ފިޔަވަޅުތަކެއް ވެސް ސަރުކާރުން ގެންދަނީ އަޅަމުންކަން އަޅުގަނޑު ފާހަގަކުރަން. ނަތީޖާއެއްގެ ގޮތުން ރާއްޖެއަށް ބޭނުންވާ ތެލާއި އަސާސީ މުދާ ދަތިތަކެއް ނެތި މިހާތަނަށް ރާއްޖޭގެ ބާޒާރުން ލިބެންހުރިކަން ފާހަގަކުރަން” ޑރ. ޚަލީލް ވިދާޅުވިއެވެ.
މީގެ އިތުރުން، އިޤްތިޞާދީ ގޮންޖެހުންތަކުން އަރައިގަތުމަށްޓަކައި ދައުލަތުގެ ޚަރަދުތައް ރިވިއުކޮށް، ޚަރަދު ކުޑަކުރުމުގެ ފިޔަވަޅުތައް އަޅަމުންދާކަން ވަޒީރު ފާހަގަކުރެއްވިއެވެ. މިގޮތުން ފިނޭންސް މިނިސްޓްރީން މިހާރުވެސް ބައެއް ފިޔަވަޅުތައް އަޅާފައިވާ ކަމަށާއި، ކުރިއަށް އޮތް ތަނުގައި އިތުރު ތަފްސީލުތައް ހާމަކުރައްވާނެ ކަމަށް ވިދާޅުވިއެވެ.
ފަތުރުވެރިކަމުގެ ސިނާޢަތުގެ އިތުރުން، ކޮންސްޓްރަކްޝަން ދާއިރާއަށް ބޭނުންވާ މެޓީރިއަލްސް ހޯދުމުގައި ކުރިމަތިވެދާނެ ދަތިތަކަށް ހައްލު ހޯދުމަށް އެކުވެރި ޤައުމުތަކާ ގުޅިގެން މަސައްކަތް ކުރަމުންދާ ކަމަށްވެސް ވަޒީރު ވިދާޅުވިއެވެ. މިގޮތުން ބައެއް ކުންފުނިތަކާއި އެޤައުމުތަކާ ގުޅުވައިދިނުމުގެ މަސައްކަތް މިހާރު ވަނީ ކުރެވިފައެވެ.
ނޫސްވެރިންގެ ބައްދަލުވުން ނިންމަވާލައްވަމުން ވަޒީރު ވިދާޅުވީ، މުދާ ބޭލުމުގައި މޯލްޑިވްސް ޕޯޓްސް ލިމިޓެޑް (އެމްޕީއެލް) އަށް ކުރިމަތިވާ ދަތިތައް ހައްލުކުރުމަށްޓަކައި އެ ކުންފުންޏާއެކު މަޝްވަރާތައް ފަށާފައިވާ ކަމަށެވެ. މިއީ މުދާ ސަޕްލައި ކުރުމުގެ ނިޒާމު ހަރުދަނާކުރުމަށް ކުރެވޭ މުހިންމު މަސައްކަތެއްގެ ގޮތުގައި ވަޒީރު ސިފަކުރެއްވިއެވެ.