ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ މަގާމުން ރިޓަޔަރ ކުރެއްވުމަށް އަންގާފައިވާ ކަމަށް ބުނެ ފަތުރަމުންދާ ވާހަކަތަކަކީ ދޮގު މައުލޫމާތެއް ކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ. ފުލުހުން ބުނި ގޮތުގައި ފަރުހާދު ފިކުރީ އަދިވެސް ހުންނެވީ އެ މަގާމުގައި މުއައްސަސާއަށް ޚިދުމަތް ކުރެއްވުމުގައެވެ.
މި މައުލޫމާތަކީ ސަރުކާރާ އިދިކޮޅު ބައެއް ނޫސްތަކާއި ސިޔާސީ އެކްޓިވިސްޓުން ފަތުރަމުންދާ ހަގީގަތާ ޚިލާފު ވާހަކަތަކެއް ކަމަށް ފުލުހުން ފާހަގަކުރެއެވެ. ފުލުހުންގެ މުއައްސަސާއިން ބުނީ ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ މަގާމުން ރިޓަޔަރ ކުރެއްވުމަށް އަންގަވާފައިވާ ކަމަށް ބުނެ ފަތުރަމުންދާ މައުލޫމާތަކީ ސައްހަ މައުލޫމާތެއް ނޫން ކަމަށެވެ.
ފުލުހުން އިތުރަށް ބުނީ ފަރުހާދު ފިކުރީ މިހާރުވެސް ހުންނެވީ ޑެޕިއުޓީ ކޮމިޝަނަރ އޮފް ޕޮލިސްގެ މަގާމުގައި، މުއައްސަސާގެ ޚިދުމަތުގައި ކަމަށެވެ. މިކަމާ ގުޅިގެން ސަރުކާރާ ދެކޮޅު ބައެއް ނޫސްތަކާއި ސިޔާސީ އެކްޓިވިސްޓުން ދަނީ ދޮގު ވާހަކަތަކެއް ފަތުރަމުންނެވެ.
ފަރުހާދު ފިކުރީ އަކީ ކުރީގެ ކޮމިޝަނަރު އިސްމާއީލް ނަވީން ރިޓަޔަރ ކުރެއްވުމާ ގުޅިގެން، އައު ކޮމިޝަނަރަކު އައްޔަނު ކުރެވެންދެން ފުލުހުންގެ ޚިދުމަތް ވަގުތީ ގޮތުން ހިންގެވުމާ ހަވާލުވެވަޑައިގެން ހުންނެވި ބޭފުޅާކަންވެސް ފާހަގަކޮށްލެވެއެވެ.