ގަތަރު އެއަރވޭސްއިން ރާއްޖެއަށް އަލުން ދަތުރުތައް ފެށުމަކީ ރާއްޖެއަށް އަންނަން ބޭނުންވެފައިތިބި މީހުންނަށް، ޚާއްސަކޮށް ފަތުރުވެރިންނަށް ލިބިގެންދިޔަ އުފާވެރި ޚަބަރެއްކަމަށް ފަތުރުވެރިކަމާއި ތިމާވެއްޓާއި ބެހޭ ވަޒީރު ތާރިޤް އިބްރާހިމް ވިދާޅުވެއްޖެއެވެ. ވަޒީރު މިހެން ވިދާޅުވީ، މީސްމީޑިއާ މަންސަ "އެކްސް" ގައި ކުރެއްވި ޕޯސްޓެއްގައެވެ.
ވަޒީރު ތާރިޤް އިބްރާހިމް ވިދާޅުވީ، ޤަތަރު އެއަރވޭސްގެ ދަތުރުތައް އަލުން ރާއްޖެއަށް ފެށުމަކީ ލިބުނު ވަރަށް ބޮޑު އުފަލެއްކަމަށެވެ. އަދި މިއީ ރާއްޖެއަށް ޒިޔާރަތްކުރަން ބޭނުންވެފައި ތިބި ފަތުރުވެރިންނާއި އެހެނިހެން ދަތުރުވެރިންނަށްވެސް ލިބޭނެ ވަރަށް ބޮޑު ފަސޭހައަކަށް ވާނެކަން ވަޒީރު ފާހަގަކުރެއްވިއެވެ.
ޤަތަރު އެއަރވޭސްއަކީ ރާއްޖެއާއި މުޅި ދުނިޔެއާއި ގުޅުވާލަދޭ މުހިންމު އެއަރލައިނެއްގެ ގޮތުގައި ވަޒީރު ވަނީ ސިފަކުރައްވާފައެވެ. މުޅި ދުނިޔެއާއި ރާއްޖެއާއި ގުޅުވާލަދިނުމަށް އެ އެއަރލައިނުން އަދާކުރާ މުހިންމު ދައުރު ފާހަގަކުރައްވައި، ވަޒީރު ވަނީ އެކަމަށްޓަކައި ޝުކުރު އަދާކުރައްވާފައެވެ.
މެދުއިރުމަތީގައި ހިނގަމުންދާ ހަމަނުޖެހުންތަކާއި ގުޅިގެން ސަލާމަތީ ސަބަބުތަކަށްޓަކައި ޤަތަރު އެއަރވޭސްއިން ރާއްޖެއަށް ކުރަމުން އައި ދަތުރުތައް ވަގުތީގޮތުން މެދުކަނޑާލުމަށްފަހު، އަލުން މިވަނީ ދަތުރުތައް ފަށާފައެވެ. އެ އެއަރލައިނުން ހާމަކޮށްފައިވާ ގޮތުގައި އޭޕްރީލް މަހުގެ 15 ވަނަ ދުވަހާ ހަމައަށް ހަފްތާއަކު 5 ދަތުރު ރާއްޖެއަށް ކުރާނެއެވެ. އަދި ހާލަތަށް އަންނަ ބަދަލުތަކަށް ބަލައި ދަތުރުތައް އިތުރުކުރާނެ ކަމަށްވެސް އެ އެއަރލައިނުން ބުނެފައިވެއެވެ.
ޤަތަރު އެއާވޭސްއިން ރާއްޖެއަށް އެންމެ ފުރަތަމަ ދަތުރުތައް ފަށާފައިވަނީ 18 ޑިސެންބަރު 2001 ގައެވެ. ސަރަޙައްދީ ހަމަނުޖެހުންތަކަށް ކޮންމެވެސް ވަރެއްގެ ލުޔެއް ލިބި، ހަނގުރާމަ މެދުކަނޑާލުމާއިއެކު ގިނަ އެއަރލައިންތަކަކުން ދަނީ އަލުން ރާއްޖެއަށް ދަތުރުތައް ފަށަމުންނެވެ. މީގެ އިތުރުން މި ދުވަސްވަރު ރާއްޖެއަށް އަންނަ ޕްރައިވެޓް ޖެޓްތަކުގެ އަދަދުވެސް އިތުރުވަމުންދާކަން ފާހަގަކުރެވެއެވެ.