ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން އަލަށް ގެނައި ހެވީ ވެހިކަލްތައް އަންނަ ހަފުތާގެ ތެރޭގައި އަތޮޅުތަކަށް ފޮނުވަން ފަށާނެ ކަމަށް އެ ކުންފުނިން ހާމަކޮށްފިއެވެ.
ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ރާއްޖޭގެ އެކި ރަށްރަށުގައި ހިންގާ މަޝްރޫއުތައް އަވަސްކުރުމަށްޓަކައި ޗައިނާއިން ގެނައި 230 ހެވީ ވެހިކަލްގެ ތެރެއިން، ފުރަތަމަ ބުރުގައި 20 ރަށަކަށް އަންނަ ހަފުތާގައި އުޅަނދުތައް ފޮނުވަން ފަށާނެއެވެ. މި އުޅަނދުތަކުގެ ތެރޭގައި އެސްކަވޭޓަރާއި، ފޯކްލިފްޓާއި، ޑަމްޕް ލޮރީގެ އިތުރުން 4 ތާރު ޕްލާންޓް ހިމެނެއެވެ.
އާރްޑީސީން މައުލޫމާތު ދޭ ގޮތުގައި، މި އުޅަނދުތައް ރަށްރަށަށް ފޮނުވުމުގެ ކުރިން ކުރަންޖެހޭ ރެޖިސްޓްރީ ކުރުމުގެ މަސައްކަތްތައް މިހާރު ދަނީ ބާރުސްޕީޑުގައި ކުރަމުންނެވެ. މި އުޅަނދުތައް މައިގަނޑު ގޮތެއްގައި ފޮނުވުމަށް ހަމަޖެހިފައިވަނީ މިހާރުވެސް މަގު ހެދުމުގެ މަސައްކަތް ހިނގަމުންދާ ރަށްރަށަށެވެ. މީގެ އިތުރުން ރަށްރަށުގައި ހިނގާ އެހެނިހެން މަޝްރޫއުތަކަށްވެސް ބޭނުންޖެހޭ ހާލަތްތަކުގައި މި އުޅަނދުތައް ބޭނުންކުރެވޭނެ އިންތިޒާމު ހަމަޖެހިގެންދާނެއެވެ.
މާލެ ސަރަހައްދުގައި މި ވަސީލަތްތައް ބޭނުންކޮށްގެން އެންމެ ބޮޑު އިސްކަމެއް ދޭނީ ގުޅިފަޅުގެ ޔުޓިލިޓީ ހިދުމަތްތައް ގާއިމުކުރުމަށެވެ. ގުޅިފަޅުގެ އިންފްރާސްޓްރަކްޗަރ މަސައްކަތްތަކަށް ބޭނުންވާ މެޝިނަރީތައް ލަފާކުރި ތާރީޚަށްވުރެ މާ އަވަހަށް ލިބުމާ ގުޅިގެން، އެ ސަރަހައްދުގެ މަސައްކަތްތައް މިއަހަރުގެ ތެރޭގައި ފެށޭނެ ކަމަށް އާރްޑީސީން ލަފާކުރެއެވެ.
މީގެ އިތުރުން، ގިރާވަރުފަޅުގެ ބިން ހިއްކުން ނިމުމުން 2026 ވަނަ އަހަރު އެތަނުގެ މަސައްކަތްތައް ފެށުމަށްވެސް ވަނީ ރޭވިފައެވެ. ސަރުކާރުން އުންމީދު ކުރަނީ މި އައު ވަސީލަތްތަކާއެކު ރާއްޖޭގެ ތަރައްގީގެ މަޝްރޫއުތަކަށް ބޮޑު އަވަސްކަމެއް ލިބި، މަސައްކަތްތައް ހަލުވިކަމާއެކު ކުރިއަށްދާނެ ކަމަށެވެ.