ސައުދީ އަރަބިއްޔާގެ ހަކަތައާ ބެހޭ ފެސިލިޓީތަކަށް ދިން ހަމަލާތަކެއްގެ ސަބަބުން އެ ގައުމުން ދުވާލަކު ތެޔޮ އުފައްދާ މިންވަރު ގާތްގަނޑަކަށް 600،000 ފީފާ މަދުވެ، އީސްޓް-ވެސްޓް ޕައިޕްލައިންގެ މަސައްކަތަށް ބޮޑެތި ބުރޫތަކެއް އަރާފައިވާ ކަމަށް އެ ގައުމުގެ މިނިސްޓްރީ އޮފް އެނާޖީން ހާމަކޮށްފިއެވެ. ސައުދީގެ ރަސްމީ ނިއުސް އެޖެންސީ (އެސްޕީއޭ) އިން ރިޕޯޓްކޮށްފައިވާ ގޮތުގައި މި ހަމަލާތަކުގެ ސަބަބުން ޕައިޕްލައިން މެދުވެރިކޮށް ތެޔޮ ފޮނުވާ މިންވަރު ދުވާލަކު 700،000 ފީފާއަށް ވަނީ ދަށްވެފައެވެ.
މި ހަމަލާތަކުގެ ސަބަބުން ރިޔާޒް، އީސްޓަން ޕްރޮވިންސް އަދި ޔަންބޫ އިންޑަސްޓްރިއަލް ސިޓީގައި ހުރި ތެޔޮ، ގޭސް، ރިފައިނިންގް އަދި ކަރަންޓު އުފައްދާ މުހިންމު މަރުކަޒުތަކުގެ މަސައްކަތްތަކަށް ވަނީ ހުރަސް އެޅިފައެވެ. މި ހަމަލާތަކުގައި ސައުދީގެ ހަކަތައާ ބެހޭ ކުންފުންޏެއްގެ ސެކިއުރިޓީ މުވައްޒަފަކު މަރުވެ، އިތުރު ހަތް މުވައްޒަފަކު ޒަޚަމްވެފައިވާ ކަމަށްވެސް އެސްޕީއޭ އިން ބުނެފައިވެއެވެ.
ކްލެޕަރ އެނަލިސްޓް މެޓް ސްމިތު ވިދާޅުވި ގޮތުގައި، ސްޓްރެއިޓް އޮފް ހޯމްޒް ބަންދުވެފައި އޮތުމުން ސައުދީގެ ތެޔޮ ބޭރުކުރުމަށް އޮތް ހަމައެކަނި މަގަކީ އީސްޓް-ވެސްޓް ޕައިޕްލައިނެވެ. “މި ޕައިޕްލައިންގެ މަސައްކަތްތަކަށް ބުރޫއެރުމަކީ ބައިނަލްއަގުވާމީ ބާޒާރަށް ލިބޭނެ ވަރަށް ބޮޑު ދެރައެއް،” އޭނާ ފާހަގަކުރެއްވިއެވެ. މި ޚަބަރާއެކު ބްރެންޓް ކްރޫޑް ތެލުގެ އަގު ވަނީ 1.2 އިންސައްތަ މައްޗަށް ގޮސް، ފީފާއެއްގެ އަގު 95.92 ޑޮލަރަށް އަރާފައެވެ.
މިނިސްޓްރީގެ މަސްދަރުތަކުން ބުނާ ގޮތުގައި މަނިފާ ތެޔޮ ބިމަށް ދިން ހަމަލާގައި ދުވާލަކު 300،000 ފީފާގެ އުފެއްދުންތެރިކަން ދަށްވެފައިވާއިރު، ޚުރައިސް ފެސިލިޓީއަށް ދިން ހަމަލާގައިވެސް ވަނީ އެވަރުގެ ގެއްލުމެއް ލިބިފައެވެ. މީގެ އިތުރުން ޖުބައިލްގައި ހުންނަ ސަޓޯޕް (SATORP) އާއި ރަސް ތަނޫރާ ރިފައިނަރީ ފަދަ ބޮޑެތި ރިފައިނަރީތަކަށްވެސް މި ހަމަލާތަކުގެ އަސަރު ވަނީ ކޮށްފައެވެ.
ފެބްރުއަރީ މަހުގެ ފަހުކޮޅު ފެށުނު އެމެރިކާ-އިސްރާއީލް އަދި އީރާންގެ ހަނގުރާމައާ ގުޅިގެން ސައުދީއަށް އަމާޒުކޮށް އީރާނުން ގިނަ އަދަދެއްގެ މިސައިލާއި ޑްރޯން ހަމަލާތަކެއް ދީފައިވާ ކަމަށް ސައުދީން ތުހުމަތުކުރެއެވެ. މި ހަމަލާތައް ދީފައިވަނީ ދެ ހަފްތާގެ މުއްދަތަށް އިއުލާންކުރި ހަނގުރާމަ ހުއްޓާލުމުގެ އެއްބަސްވުމަށް އަމަލުކުރަން ފެށިތާ މަދު ގަޑިއިރުތަކެއްގެ ތެރޭގައި ކަމަށް ރިޕޯޓްތައް ބުނެއެވެ.