ޗިމްޕަންޒީންގެ މެދުގައި ވަރުގަދަ ދާޚިލީ ހަނގުރާމައެއް ހިނގަމުންދާކަމުގެ ހައިރާން ކުރުވަނިވި ހެކި، ސައިންސްވެރިންގެ ހޯދުންތަކުން!

ޔުގެންޑާގެ ކިބާލޭ ނޭޝަނަލް ޕާކުގައި ދިރިއުޅޭ ޗިމްޕަންޒީންގެ ބޮޑު އާއިލާއެއް ދެބައިވެ، އެއްބަޔަކު އަނެއްބަޔަކާ ދެމެދު ކުރިއަށްދާ ވަރުގަދަ ދާހިލީ ހަނގުރާމައެއްގެ ހެކި ސައިންސްވެރިން ފުރަތަމަ ފަހަރަށް ހޯދައިފިއެވެ. 2026 އޭޕްރިލް 9 ގައި "ސައިންސް" ޖާނަލްގައި ޝާއިއުކޮށްފައިވާ މި ދިރާސާއިން ހާމަވާގޮތުގައި، ކުރިން އެކުގައި އުޅުނު މި ޖަނަވާރުތަކުގެ މެދުގައި ހިނގި މި ހަމަނުޖެހުންތަކުގައި މިހާތަނަށް 28 ޗިމްޕަންޒީއަކު ވަނީ މަރުވެފައެވެ.

ޔޫގަންޑާގެ ވާރޭޖަންގަލިތަކުގައި ދިރިއުޅޭ ދުނިޔޭގެ އެންމެ ބޮޑު ވަލު ޗިމްޕަންޒީ ގްރޫޕް، ‘އެންގޯގޯ، މުޖުތަމައުގެ މެދުގައި ބޮޑު ބައިބައިވުމެއް އުފެދި، އެކަކު އަނެކަކާ ދެކޮޅަށް ‘ދާޚިލީ ހަނގުރާމައެއް، ކުރަމުންދާކަން ސައިންސްވެރިން ވަނީ ފާހަގަކޮށްފައެވެ. މިއީ އެއް ސަގާފީ ގްރޫޕެއްގެ ގޮތުގައި އުޅުނު ޗިމްޕަންޒީންތަކެއް ދެބަޔަކަށް ބެހި، ފުރާނައަށް ނުރައްކާވާ ފަދަ ހަތުރުންނަށް ބަދަލުވި ފުރަތަމަ ސާފު މިސާލެވެ.

މި ދިރާސާ ކުރެއްވި ސައިންސްވެރިން ފާހަގަކުރާ ގޮތުގައި، އިންސާނުންގެ މެދުގައި އުފެދޭ ހަނގުރާމަތަކަކީ ނަސްލީ ނުވަތަ ސިޔާސީ ސަބަބުތަކާ ހުރެ ދިމާވާ ކަންކަން ކަމަށް ބެލެވުނަސް، ޗިމްޕަންޒީންގެ މި ބައިބައިވުމުން އެނގެނީ ހަމައެކަނި އިޖުތިމާއީ ގުޅުންތަކަށް އަންނަ ބަދަލުތަކުން ވެސް ބޮޑެތި ކުރިމަތިލުންތައް އުފެދިދާނެ ކަމެވެ. މީގެ ސަބަބުން އިންސާނުންގެ މެދުގައި އުފެދޭ އަނިޔާވެރިކަމުގެ މޮޑެލްތައް އަލުން މުރާޖައާކުރަން ޖެހޭ ކަމަށް ސައިންސްވެރިން ބުނެއެވެ.

އެކުވެރިންގެ މެދުގައި އުފެދުނު ދެކޮޅުވެރިކަން

{މި ހަމަނުޖެހުން ހިނގާފައިވަނީ މަޝްހޫރު "ޗިމްޕް އެމްޕަޔަރ" އިން ފެނިގެންދިޔަ، ގާތްގަނޑަކަށް 200 މެންބަރުން ހިމެނޭ އެންމެ ބޮޑު ޗިމްޕަންޒީ އާއިލާ ކަމަށްވާ "އެންގޯގޯ" ކޮމިއުނިޓީގެ ތެރޭގައެވެ. 2015 ވަނަ އަހަރުގެ ތެރޭގައި މި ގްރޫޕް ވަނީ "ވެސްޓަން" އަދި "ސެންޓްރަލް" ކްލަސްޓާގެ ނަމުގައި ދެބަޔަކަށް ބެހިފައެވެ. ސައިންސްވެރިން ފާހަގަކުރާ ގޮތުގައި މިއީ އާންމުކޮށް ބޭރުގެ ގްރޫޕްތަކާ ކުރާ ހަނގުރާމައާ ހިލާފަށް، އެއް އާއިލާއެއްގެ ތެރޭގައި އުފެދުނު ދެކޮޅުވެރިކަމެކެވެ.}

އެންގޯގޯ ޗިމްޕަންޒީ ގްރޫޕަކީ އާދަޔާ ހިލާފަށް ބޮޑު ގްރޫޕެކެވެ. މި ގްރޫޕުގައި 200 އެއްހާ ސޫފި ހިމެނޭއިރު، އޭގެ ތެރޭގައި 30 އަށްވުރެ ގިނަ ބޮޑެތި ފިރިހެން ޗިމްޕަންޒީ ހިމެނެއެވެ. މިފަދަ ބޮޑު އާބާދީއެއްގެ ސަބަބުން އެ ސޫފިތަކުގެ މެދުގައި އޮންނަ އިޖުތިމާއީ ގުޅުންތައް ދެމެހެއްޓުމަށް ބޮޑެތި ގޮންޖެހުންތަކަކާ ކުރިމަތިވެފައިވާ ކަމަށް ދިރާސާވެރިން ލަފާކުރެއެވެ.

މި ގްރޫޕު ދެބަޔަކަށް ވަކިވެގެން ދިޔަ މައިގަނޑު ސަބަބަކީ ހަމައެކަނި "އަލްފާ މޭލް" ނުވަތަ އިސްކޮށް ހުރި ފިރިހެން ސޫފި ބަދަލުވުން ކަމަށް ނުވިޔަސް، އެ ބަދަލާއެކު ގްރޫޕުގެ ތެރޭގައި އޮތް ނުތަނަވަސްކަން އިތުރަށް ބޮޑުވެގެން ދިޔަކަން ފާހަގަކުރެވެއެވެ.

މި ދިރާސާގައި ބައިވެރިނުވާ މާހިރެއް ކަމަށްވާ ޖޭމްސް ބްރޫކްސް ވިދާޅުވާ ގޮތުގައި، މި ބަދަލުގެ ސަބަބުން އެހެން ނަސްލުތަކަށާއި އިންސާނުންނަށް ކުރާނެ އަސަރުތައް ދެނެގަތުމަށް އަދި މާ އަވަހެވެ. ނަމަވެސް، މި ދިރާސާއަކީ އިޖުތިމާއީ އަދި ތިމާވެށީގެ ސަބަބުން މިފަދަ ބޮޑެތި ބަދަލުތައް އަންނަ ގޮތް ދެނެގަތުމަށް ލިބުނު މުހިންމު ކުރިއެރުމެކެވެ.

ޔުގެންޑާގެ ކިބާލޭ ނޭޝަނަލް ޕާކުގައި ދިރިއުޅޭ ޗިމްޕަންޒީން މެދުގައި ހިނގި ދާޚިލީ ހަނގުރާމައެއްގެ ހެކި ސައިންސްވެރިން ހޯދައިފި—-ފޮޓޯ:ދަ ޓައިމްސް

އިންސާނީ ތާރީހާ ހުރި ގުޅުން

30 އަހަރުގެ ދިރާސާގެ މައްޗަށް ބިނާކޮށް ނެރުނު މި ރިޕޯޓަކީ އިންސާނުންގެ މެދުގައި ހިނގާ ހަނގުރާމަތަކުގެ އަސްލު ދެނެގަތުމަށް ލިބުނު މުހިންމު ކުރިއެރުމެކެވެ.

["މިފަދަ ހަރުކަށި އަނިޔާވެރިކަމަކީ އެއްވެސް ދީނީ ނުވަތަ ފިކުރީ ސަބަބަކާ ނުލައި، ހަމައެކަނި އިޖުތިމާއީ ގުޅުންތަކަށް އަންނަ ބަދަލުތަކުން އުފެދިދާނެ ކަމެއްކަން މިކަމުން ސާބިތުވޭ،" ދިރާސާގައި ފާހަގަކޮށްފައިވެއެވެ. ސައިންސްވެރިން ލަފާކުރާ ގޮތުގައި ޗިމްޕަންޒީންގެ މެދުގައި މިފަދަ "ދާޚިލީ ނުވަތަ އަހުލީ ހަނގުރާމަ އެއް" އެއް ހިނގުމަކީ ކޮންމެ 500 އަހަރަކުން އެއްފަހަރު ދިމާވާނެ ވަރަށް ނާދިރު ކަމެކެވެ.]