"އޭއައި އަކީ އޭގެ ޒާތުގައި މީހާގެ ސިކުނޑި ބަލިކަށި ކުރާ އެއްޗަކަށް ނުހަދައި އެއާއެކު ތިމާގެ ސިކުނޑި ތަރައްގީ ކުރުމަކީވެސް ހަމަ އަހަރެމެން އިންސާނުންގެ އިޚްތިޔާރާއި ބާރުގައި އޮތް ކަމެކެވެ. އެހެނީ ކޮންމެ އެއްޗެއްގައި ކޮންމެ ވާހަކައެއް އޮތަސް އޭއައިވެސް ތައްޔާރު ކުރީ ހަމަ މި އިންސާނާގެ ސިކުނޑިން ބުއްދީގެ ބޭނުން ކޮށްގެން އިންސާނީ ފިކުރުގައިކަމަށް ވާތީއެވެ. އޭއައި އުފެއްދީ އިންސާނަކަށް ވާއިރު އޭއައި އިންސާނަކަށްވުރެ ސްމާޓް ވާނެ އެއްގޮތެއްވެސް ނޯންނާނެތާ އެވެ. ކުރަންޖެހޭ ހަމައެކަނި ކަމަކީ ތިމާގެ ސިކުނޑި ކަންނެތްކޮށް ބަލިކަށި ކޮށްލުމުގެ ބާރު އޭއައި އަށް ދިނުމުގެ ބަދަލުގައި އޭގެ މަސައްކަތް އެއަށް ދޭށެވެ. އަދި ތިމާގެ މަސައްކަތް ތިމާ ކުރުމުން އޭއައި އޮންނާނީ ޚުދު ތިމާގެ ކޮންޓްރޯލުގައިކަން ޔަގީނެވެ."
ޒުވާން ޖީލު ނުވަތަ ‘ޖެން-ޒީ، ގެ މެދުގައި އާޓިފިޝަލް އިންޓެލިޖެންސް (އޭއައި) އާމެދު ނުރުހުންތެރިކަން އިތުރުވަމުން ދިޔަ ނަމަވެސް، ‘ޖެން-ޒީ، މި ޓެކްނޮލޮޖީ ބޭނުންކުރާ މިންވަރު ދުވަހުން ދުވަހަށް އިތުރުވަމުންދާ ކަން ދާދިފަހުން ކުރި ސާވޭއަކުން ވަނީ ހާމަވެގެން ގޮސްފަ އެވެ.
ގެލަޕް އިން ފެބްރުއަރީ މަހުގެ ފަހުކޮޅު 14 އަހަރާއި 29 އަހަރާ ދެމެދުގެ 1,572 މީހުން ބައިވެރިކޮށްގެން ކުރި މި ސާވޭއިން ދައްކާ ގޮތުގައި، އޭއައިއާ މެދު ނުރުހުންވާ މީހުންގެ އަދަދު ވަނީ ވޭތުވެދިޔަ އަހަރު ހުރި 22 އިންސައްތައިން 31 އިންސައްތައަށް މައްޗަށް ގޮސްފައެވެ. ހަމައެއާއެކު، މި ޓެކްނޮލޮޖީއާ މެދު އޮތް ފޯރި ނުވަތަ "އެކްސައިޓްމަންޓް" ވަނީ 36 އިންސައްތައިން 22 އިންސައްތައަށް ދަށްވެފައެވެ.
މިފަދަ ނުރުހުންތަކެއް ހުރި ނަމަވެސް، އޭއައި ބޭނުންކުރާ މިންވަރަށް ބަދަލެއް ނާދެއެވެ. ސާވޭގެ ބައިވެރިންގެ 51 އިންސައްތަ މީހުން ކޮންމެ ދުވަހަކު ނުވަތަ ކޮންމެ ހަފުތާއަކު އޭއައި ބޭނުންކުރާއިރު، މިއީ މިދިޔަ އަހަރުގެ 47 އިންސައްތައާ އަޅާބަލާއިރު ކުޑަ ކުރިއެރުމެކެވެ. މިއިން ދޭހަވަނީ، އޭއައިއާ މެދު އިތުބާރު ކުޑަވި ނަމަވެސް، އެއީ ކޮންމެހެން ބޭނުންކުރަންޖެހޭ އެއްޗެއްގެ ގޮތުގައި ޒުވާނުން ބަލައިގަންނަމުންދާ ކަމެވެ.
މަސައްކަތުގެ މާހައުލުގައި އޭއައި ބޭނުންކުރުމާ މެދު ވެސް ބޮޑެތި ކަންބޮޑުވުންތަކެއް ވަނީ ފާހަގަކުރެވިފައެވެ. ޖެން-ޒީގެ މަސައްކަތްތެރިންގެ 48 އިންސައްތަ މީހުން ގަބޫލުކުރާ ގޮތުގައި އޭއައިގެ ސަބަބުން ލިބޭ ފައިދާއަށްވުރެ އޭގެ ނުރައްކާ ބޮޑެވެ. މީގެ ތެރޭގައި ވަޒީފާގެ ރައްކާތެރިކަން ގެއްލުމާއި، ފާޑުކިޔައިގެން ވިސްނުމުގެ ގާބިލުކަން (critical thinking) ކުޑަވެގެންދިއުން ހިމެނެއެވެ.
ތައުލީމީ ދާއިރާއަށް ބަލާއިރު، ސާވޭގެ ބައިވެރިންގެ ތެރެއިން ކޮންމެ 10 މީހަކުން 8 މީހުން ކަންބޮޑުވުން ފާޅުކޮށްފައިވަނީ އޭއައިގެ އެހީގައި މަސައްކަތްތައް އަވަހަށް ނިންމާލެވުމުގެ ސަބަބުން، އާ އެއްޗެހި ދަސްކުރުމަށް ހުރަސް އެޅިދާނެތީއެވެ. މީގެ ސަބަބުން ކުރިއަށް އޮތް ތަނުގައި ކެރިއަރު ބިނާކުރުމަށާއި ހުނަރު ތަރައްގީކުރުމަށް ނޭދެވޭ އަސަރުކޮށްފާނެ ކަމަށް ގިނަ ބަޔަކު ގަބޫލުކުރެއެވެ.
ޖުމްލަކޮށް ބަލާއިރު، ޒުވާނުންގެ މެދުގައި އޭއައިއާ މެދު އޮތީ ފުށުއަރާ އިހުސާސްތަކެކެވެ. އެއްކޮޅުން އެއީ ކޮންމެހެން ބޭނުންކުރަންޖެހޭ ވަސީލަތެއްގެ ގޮތުގައި ބަލައިގަންނައިރު، އަނެއްކޮޅުން އޭގެ ސަބަބުން އިންސާނުންގެ މަސައްކަތުގެ ފެންވަރު ދަށްވެ، ވަޒީފާގެ ފުރުސަތުތައް ހަނިވެދާނެ ކަމުގެ ބިރުވެރިކަން ވަނީ އިންތިހާއަށް ބޮޑުވެފައެވެ.
އެހެންނަމަވެސް ހަގީގަތަކީ ޒުވާނުންގެ މެދުގައި ދެއްކުންތެރިކަމަށް ކިތަންމެ ނުރުހުންތެރިކަމެއް ދެއްކި ނަމަވެސް އޭއައި ބޭނުން ކުރުމަކީ އެމީހުންނަށް މަޖުބޫރުވުމަށްވުރެ އެމީހުންގެ އިޚްތިޔާރަކަށް ވާކަމެވެ. ސަބަބަކީ ޒަމާނުގެ ތަރައްގީއާއެކު ކުރިއަށްދިއުމަށްޓަކައި ޓެކްނޮލޮޖީއާ އެއްހަމައެއްގައި ފިޔަވަޅު ހަމަކުރަމުންކުރިއަށް ދިއުމަށް އަދުގެ ޒުވާނުންގެ ނަޒަރުގައި އެންމެ ފުރަތަމަ އެއްޗަކީ އޭއައި ނުވަތަ އާޓިފިޝަލް އިންޓެލިޖެންސް ބޭނުންކޮށްގެން އަވަސް ކަމާއެކު ކުރިއަށް ދިއުމެވެ. އިހުގެ މީހުންނާ އަޅާ ބަލާއިރު އަދުގެ ޒުވާނުންނަކީ ޖޯޝާއި އަވަސްކަމުގައި ކޮންމެ ކަމެއްވެސް ވަގުތުން ނިންމާލުމުގެ ފޯރި ހިފާފައި ތިބި ބައެކެވެ. މީގެވެސް ހެޔޮގޮތުގައި ބޭނުން ހިފިދާނެ ކަމީ ޝައްކެއް އޮތް ކަމެއް ނޫނެވެ.
ސަބަބަކީ އޭއައި އަކީ އޭގެ ޒާތުގައި މީހާގެ ސިކުނޑި ބަލިކަށި ކުރާ އެއްޗަކަށް ނުހަދައި އެއާއެކު ތިމާގެ ސިކުނޑި ތަރައްގީ ކުރުމަކީވެސް ހަމަ އަހަރެމެން އިންސާނުންގެ އިޚްތިޔާރާއި ބާރުގައި އޮތް ކަމެކެވެ. އެހެނީ ކޮންމެ އެއްޗެއްގައި ކޮންމެ ވާހަކައެއް އޮތަސް އޭއައިވެސް ތައްޔާރު ކުރީ ހަމަ މި އިންސާނާގެ ސިކުނޑިން ބުއްދީގެ ބޭނުން ކޮށްގެން އިންސާނީ ފިކުރުގައިކަމަށް ވާތީއެވެ. އޭއައި އުފެއްދީ އިންސާނަކަށް ވާއިރު އޭއައި އިންސާނަކަށްވުރެ ސްމާޓް ވާނެ އެއްގޮތެއްވެސް ނޯންނާނެތާ އެވެ. ކުރަންޖެހޭ ހަމައެކަނި ކަމަކީ ތިމާގެ ސިކުނޑި ކަންނެތްކޮށް ބަލިކަށި ކޮށްލުމުގެ ބާރު އޭއައި އަށް ދިނުމުގެ ބަދަލުގައި އޭގެ މަސައްކަތް އެއަށް ދޭށެވެ. އަދި ތިމާގެ މަސައްކަތް ތިމާ ކުރުމުން އޭއައި އޮންނާނީ ޚުދު ތިމާގެ ކޮންޓްރޯލުގައިކަން ޔަގީނެވެ. ޚިޔާލަކީ ތަފާތު އެއްޗެކެވެ. މިއީވެސް ހަމަ ޚިޔާލެކެވެ!…