ސްރީލަންކާގެ ބަނދަރުގައި ތާށިވެފައި ހުރި ރާއްޖެއަށް ގެންނަންޖެހޭ ކޮންޓެއިނަރުތައް ކްލިއާކޮށް، ރާއްޖެއަށް މުދާ ގެނައުމުގެ މަސައްކަތް ހަލުވިކަމާއެކު ކުރިއަށްދާކަމަށް އިޤަތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުހައްމަދު ސައީދު ހާމަކުރައްވައިފިއެވެ.
ވަޒީރު ވިދާޅުވީ މި މަހުގެ 8 ވަނަ ދުވަހާ ހަމައަށް ލަންކާ ބަނދަރުގައި 4,241 ކޮންޓެއިނަރު ތާށިވެފައި ހުރި ނަމަވެސް، ސަރުކާރުގެ ކުންފުނިތައް ގުޅިގެން ކުރި މަސައްކަތުން މިހާރު އެ އަދަދު 1,741 އަށް ދަށްކުރެވިފައިވާ ކަމަށެވެ.
މި މަސައްކަތަކީ މޯލްޑިވްސް ޕޯޓްސް ލިމިޓެޑް (އެމްޕީއެލް)، އެސްޓީއޯ އަދި މޯލްޑިވްސް ސްޓޭޓް ޝިޕިންގ (އެމްއެސްއެސް) ގުޅިގެން ކުރިއަށްގެންދާ މަސައްކަތެކެވެ. ރާއްޖެއަށް މުދާ ގެނައުމަށް ހަމަޖެހިފައިވާ ތާވަލަށް ބަލާއިރު، ކުރިއަށް އޮތް ދުވަސްތަކުގައި ޖުމްލަ 2,500 ކޮންޓެއިނަރު ރާއްޖެއަށް އައުމަށް ވަނީ ހަމަޖެހިފައެވެ. މީގެ ތެރޭގައި އޭޕްރީލް 12 އިން 14 އަށް އެކި ދުވަސްމަތިން ގެންނަ ޝިޕްމަންޓްތައް ހިމެނޭއިރު، މިހާރުވެސް މާލޭ ބަނދަރުގައި އޮތް އުޅަނދެއްގައި 1,200 ކޮންޓެއިނަރުގެ މުދާ އެބަހުއްޓެވެ.
މިއަހަރުގެ ފުރަތަމަ ކުއާޓަރުގައި ރާއްޖޭގެ އިމްޕޯޓް 19 އިންސައްތަ އިތުރުވެފައިވާކަން ފާހަގަކުރައްވަމުން ވަޒީރު ވިދާޅުވީ، މީގެ މައިގަނޑު ސަބަބަކީ އިގްތިސާދީ ކުރިއެރުމާއި، ފަތުރުވެރިން އަންނަ މިންވަރު އިތުރުވުމުގެ އިތުރުން ރަމަޟާން މަހާ ދިމާވުން ކަމަށެވެ. "އަސާސީ ކާބޯތަކެތި ހުސްނުވެ ލިބޭނެކަން ކަށަވަރުކުރުމަށްޓަކައި ޗައިނާ، އިންޑިއާ، ތައިލެންޑް އަދި ވިއެޓްނާމް ހިމެނޭހެން 7 މާކެޓަކުން މުދާ ގެނައުމުގެ އިންތިޒާމުތައް ފޮރިން މިނިސްޓްރީއާ ގުޅިގެން ދަނީ ހަމަޖައްސަމުން،" ވަޒީރު ވިދާޅުވިއެވެ.
މުދާ ގެނައުމުގައި ދިމާވި މި ގޮންޖެހުމަކީ މެދުއިރުމައްޗާއި ގަލްފުގެ ހަމަނުޖެހުންތަކާ ގުޅިގެން ދިމާވި ކަމެއްކަން ފާހަގަކުރައްވައި، ވަޒީރު ވިދާޅުވީ މިކަން ހައްލުކުރުމަށް ލަންކާގެ ކަމާގުޅޭ އިދާރާތަކާއެކު ގިނަ މަޝްވަރާތަކެއް ކުރެވުނު ކަމަށެވެ. ކަނޑުމަގުން މުދާ ގެނައުމުގެ އިތުރުން، ވައިގެ މަގުން މުދާ އެތެރެކުރާ މިންވަރުވެސް އިތުރުވެފައިވާކަމާއި، ތެލުގެ ޝިޕްމަންޓްތައް އެއްވެސް ދަތިކަމެއް ނެތި ލިބެމުންދާކަން ސަރުކާރުން ވަނީ ކަށަވަރުކޮށްދީފައެވެ.
މީގެ އިތުރުން ޗައިނާއާއެކު އޮތް މިނިވަން ވިޔަފާރީގެ އެއްބަސްވުމުގެ ސަބަބުން މުދާ ގެނައުމުގައި އިތުރު ފަސޭހަތަކެއް ލިބޭނެކަންވެސް ވަޒީރު ފާހަގަކުރެއްވިއެވެ. ތާށިވެފައިވާ މުދަލުގެ ތެރޭގައި އަމިއްލަ ވިޔަފާރިވެރިންގެ ކާބޯތަކެއްޗާއި އަސާސީ ބާވަތްތައް ހިމެނޭތީ، ވިޔަފާރިވެރިންގެ ކަންބޮޑުވުންތަކަށް ހައްލު ހޯދައިދިނުމަށް ސަރުކާރުން ވަރަށް ގާތުން މަސައްކަތް ކުރަމުންދާ ކަމުގެ ޔަގީންކަން ވަޒީރު ވަނީ ދެއްވާފައެވެ.