މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ރާއްޖެއަށް ކުރާ ދަތުރުތަކަށް ބޮޑެތި ބުރޫތަކެއް އަރައި، ދުވާލެއްގެ މައްޗަށް ގާތްގަނޑަކަށް 40 ފްލައިޓް ކެންސަލްވަމުންދާ ކަމަށް ދަތުރުފަތުރާއި ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ. މިކަމުގެ ސަބަބުން ރާއްޖެއަށް އެންމެ ގިނައިން ދަތުރުކުރާ އެއާލައިންތައް ކަމަށްވާ ފްލައި ދުބާއީ، އެމިރޭޓްސް، ގަތަރު އެއާވޭސް، އަދި އިއްތިހާދު ފަދަ އެއާލައިންތަކުގެ ޝެޑިއުލް އޮޕަރޭޝަންތަކަށް ބޮޑެތި ގެއްލުންތަކެއް ވަނީ ލިބިފައެވެ.
ވަޒީރު އަމީން ވިދާޅުވީ، ހަނގުރާމައާ ގުޅިގެން ފާއިތުވި 45 ދުވަސްތެރޭ ޖުމްލަ 626 ފްލައިޓް ކެންސަލްވެފައިވާ ކަމަށެވެ. ނަމަވެސް، މި ހާލަތުން އަރައިގަތުމަށް ސަރުކާރުން ކުރަމުންދާ މަސައްކަތުން ބައެއް އެއާލައިންތަކުން މިހާރު ވަނީ އަލުން ދަތުރުތައް ފަށާފައެވެ. އެގޮތުން ގަތަރު އެއަރވޭސް އާއި އެމެރޭޓްސް އިން މިހާރު ދުވާލަކު ދެ ފްލައިޓް އޮޕަރޭޓް ކުރަމުންދާކަން ވަޒީރު ފާހަގަކުރެއްވިއެވެ.
ހާލަތުން އަރައިގަތުމަށް ވަޒީރުންގެ ކޮމިޓީއެއް
މި ހާލަތަށް ހައްލެއް ހޯދުމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ހާއްސަ ވަޒީރުންގެ ކޮމިޓީއެއް އުފައްދަވާފައެވެ. މި ކޮމިޓީގެ މައިގަނޑު މަގްސަދަކީ ފްލައިޓްތައް ކެންސަލްވުމުން ކުރިމަތިވާ ގޮންޖެހުންތަކުން އަރައިގަތުމަށް ކުރަންޖެހޭ މަސައްކަތްތައް ވިލަރެސްކުރުމެވެ. މި މަސައްކަތުގެ ދަށުން މިހާރު ވައިގެ ދަތުރުތައް 25 އިންސައްތަ އިތުރުވެފައިވާ ކަމަށް ސަރުކާރުން ބުނެއެވެ.
ފްލައިޓްތައް މަދުވުމުގެ މައްސަލައަށް ދާއިމީ ހައްލެއް ހޯދުމުގެ ގޮތުން ސަރުކާރުން މިހާރު އަންނަނީ އާ އެއާލައިންތަކާއެކު މަޝްވަރާ ކުރަމުންނެވެ. އެގޮތުން ކުރިއަށް އޮތް ދެ ހަފްތާއެއްގެ ތެރޭގައި އިތިއޯޕިއާ އެއާލައިންސްއާއެކު އެއާ ސާވިސް އެގްރީމެންޓެއްގައި ސޮއިކުރުމަށް ވަނީ ހަމަޖެހިފައެވެ. މިއީ ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށް އެޅޭ މުހިންމު ފިޔަވަޅެއް ކަމަށް ސަރުކާރުން ދެކެއެވެ.
ފަތުރުވެރިން އަންނަ އަދަދު އަލުން އިތުރުވާން ފަށައިފި
ފަތުރުވެރިކަމާ ބެހޭ ވަޒީރު ތޯރިޤް އިބްރާހިމް ވިދާޅުވި ގޮތުގައި، ހަނގުރާމައިގެ ސަބަބުން ފަތުރުވެރިން އަންނަ މިންވަރު ދަށްވި ނަމަވެސް، މިހާރު އެ އަދަދުތައް ވަނީ ރަނގަޅުވާން ފަށާފައެވެ. މިހާރު ދުވާލެއްގެ މައްޗަށް އެވްރެޖްކޮށް 5,103 ފަތުރުވެރިން ރާއްޖެ އަންނަ ކަމަށް އޭނާ ވިދާޅުވިއެވެ.
މި އަހަރުގެ މިހާތަނަށް ހަތް ލައްކައަށް ވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މި ހިނގާ މަހު އެކަނިވެސް 56,136 ފަތުރުވެރިން ވަނީ އައިސްފައެވެ. ސަރުކާރުން އަމާޒު ހިފާފައިވަނީ ވައިގެ މަގުން ކުރާ ދަތުރުތައް އިތުރުކޮށް، ފަތުރުވެރިކަމުގެ ދާއިރާއަށް ކުރިމަތިވެފައިވާ ހުރަސްތައް ނައްތާލުމަށެވެ.