މާލޭގެ މަޖީދީމަގުގައި ހުންނަ ނަލަހިޔާ ރެޒިޑެންސްގެ އެޕާޓްމަންޓަކުން ގިނަ އަދަދެއްގެ ފައިސާ ވަގަށް ނެގި މައްސަލައިގެ ތަހުގީގު ނިންމައި، ތުހުމަތު ކުރެވޭ މީހުންގެ މައްޗަށް ދައުވާ ކުރުމަށް ފޮނުވުމުގެ މަސައްކަތް ފުލުހުން ފަށައިފިއެވެ.
މިދިޔަ މާރިޗު މަހުގެ 16 ވަނަ ދުވަހުގެ ހަވީރު 17:49 އެހައިކަންހާއިރު ފުލުހުންނަށް ރިޕޯޓުކުރި މި ވައްކަމުގެ މައްސަލައިގައި ޖުމްލަ 4,000,000 (ހަތަރު މިލިއަން) ދިވެހި ރުފިޔާ ވަގަށް ނަގާފައިވާ ކަމަށް ފުލުހުން މައުލޫމާތު ދެއެވެ. ނަމަވެސް، މިހާތަނަށް ފުލުހުންނަށް ހޯދިފައިވަނީ އޭގެ ތެރެއިން އެންމެ 50,000 (ފަންސާސް ހާސް) ރުފިޔާއެވެ.
މި ވައްކަމުގެ މައްސަލައިގައި ޖުމްލަ ފަސް މީހަކަށް ތުހުމަތު ކުރެވޭއިރު، އޭގެ ތެރެއިން ހަތަރު މީހަކު ވަނީ ހައްޔަރުކޮށްފައެވެ. ފުލުހުން ވަނީ އެ މީހުންގެ ވަނަވަރު އާންމުކޮށްފައެވެ. ހައްޔަރުކޮށްފައިވާ މީހުންނަކީ:
- މުޙައްމަދު ނޫރު އަޙްމަދު (40 އ)، ކަސްތޫރިމާގެ / ޅ.ނައިފަރު
- މުޙައްމަދު އަފްރާޙް (40 އ)، މޫންލައިޓްވިލާ / ސ.މީދޫ
- އިސްމާޢީލް ޢާޞިފް (36 އ)، ދާރުލް އައްވަލް / ރ.މަޑުއްވަރި
- އަޙްމަދު ފާރިސް (39 އ)، މ. އޭސިއާ / މާލެ
ފުލުހުން ބުނި ގޮތުގައި މި މައްސަލައިގައި ތުހުމަތު ކުރެވޭ ފަސްވަނަ މީހާ ހޯދުމުގެ މަސައްކަތް މިހާރުވެސް ދަނީ ކުރަމުންނެވެ. އަދި ހައްޔަރުކުރި ހަތަރު މީހުން މިވަގުތު ތިބީ ބަންދުގައެވެ.
މި މައްސަލައިގެ ތަހުގީގުގެ ބޮޑު ބައެއް މިހާރު ނިމިފައިވާކަން ފާހަގަކުރަމުން ފުލުހުން ބުނީ، ތަހުގީގު މަރުހަލާ މުޅިން ފުރިހަމަކޮށް، މައްސަލައިގައި ދައުވާކޮށްދިނުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ފޮނުވުމުގެ އެންމެ ފަހުގެ މަސައްކަތްތައް ކުރަމުންދާ ކަމަށެވެ.