ހަށިގަނޑުގެ ބަރުދަން ލުއިކުރުމަށާއި، މަސްތައް ވަރުގަދަ ކުރުމުގެ އިތުރުން ހަންގަނޑު ރީތި ކުރުމާއި ޖިންސީ ކަންކަމުގައި ބޭނުން ކުރުމަށް، ހުއްދަ ނުނަގައި ބޭސް އެތެރެކޮށް ވިއްކާ ފަރާތްތަކާ މެދު ގާނޫނީ ފިޔަވަޅު އަޅާނެ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އިންޒާރު ދީފިއެވެ.
އެމްއެފްޑީއޭއިން ގެޒެޓުގައި ކުރި އިއުލާނެއްގައި ބުނީ، އެކިއެކި ނަންނަމުގައި ބޭސް އިމްޕޯޓް ކުރުމާއި ވިއްކުމަށް ނަގަންޖެހޭ ހުއްދަތައް ނުނަގައި ބޭސް އެތެރެކުރާ މައްސަލަ ފާހަގަކުރެވިފައިވާ ކަމަށެވެ. އަދި މިފަދަ ބޭސްތައް އޮންލައިން މަސްދަރުތަކުގައާއި ބައެއް އާންމު ފިހާރަތަކުން އިޝްތިހާރުކޮށް ވިއްކަމުންދާކަން ވެސް އެ އޮތޯރިޓީއަށް ވަނީ ފާހަގަވެފައެވެ.
އެ އޮތޯރިޓީން ބުނި ގޮތުގައި، ޑޮކްޓަރެއްގެ އިރުޝާދާ ނުލައި މިފަދަ ތަކެތި ގަނެގެން ބޭނުން ކުރުމަކީ އާންމު ސިއްހަތަށް ނުހަނު ބޮޑެތި ގެއްލުންތަކެއް ލިބިދާނެ ކަމެކެވެ. “މިގޮތަށް ހުއްދަ ނުނަގައި ވިއްކާ ބޭސްތަކަކީ އެ އޮތޯރިޓީގެ ފަރާތުން ރައްކާތެރިކަމާއި ފެންވަރު ކަށަވަރުކޮށްފައިވާ ބޭސްތަކެއް ނޫން” ކަމަށް އެމްއެފްޑީއޭއިން ބުންޏެވެ.
މިފަދަ ބޭސްތައް ބޭނުންކުރުމުގެ ސަބަބުން ހިތް ހުއްޓުމާއި، ސްޓްރޯކް ޖެހުން ފަދަ ހިތާމަވެރި ހާދިސާތަކުގެ އިތުރުން ކުއްލި މަރަށް ހުށަހެޅުމުގެ ފުރުސަތު އޮންނާނެ ކަމުގެ އިންޒާރު ވެސް އެ އޮތޯރިޓީން ވަނީ ދީފައެވެ.
އެމްއެފްޑީއޭއިން ބުނީ މިފަދަ ބޭސްތަކަކީ ހަމައެކަނި ހުއްދަ ނަގައިގެން ހިންގާ ފާމަސީތަކުގައި ވިއްކޭނެ ތަކެތި ކަމަށެވެ. އަދި ހުއްދަ ނުނަގައި އިޝްތިހާރުކޮށް ވިއްކާ ޕްރޮޑަކްޓްތައް މާކެޓުން ނެގުމުގެ މަސައްކަތް މިހާރު ފަށާފައިވާ ކަމަށް ވެސް ބުންޏެވެ.
އެ އޮތޯރިޓީގެ ހުއްދަނެތި ބޭސް އިމްޕޯޓްކޮށް، ވިއްކައި އަދި އިޝްތިހާރުކުރާ ފަރާތްތަކާ މެދު ބޭހާއިބެހޭ ގަވާއިދު އަދި ސިއްހީ ޚިދުމަތް ދިނުމުގެ ގާނޫނުގެ ދަށުން ފިޔަވަޅު އަޅަމުން ގެންދާނެ ކަމަށް އެމްއެފްޑީއޭއިން ވަނީ ބުނެފައެވެ. މިކަމާ ގުޅޭ އިތުރު މައުލޫމާތު ބޭނުންވާ ފަރާތްތަކުން އެ އޮތޯރިޓީގެ ހޮޓްލައިން ނަންބަރު 7200321 އަށް ގުޅުމަށް ވަނީ އެދިފައެވެ.