އެއްމެދު އިމާރާތްތައް ހިންގައި ބެލެހެއްޓުމަށްޓަކައި މެނޭޖްމަންޓް ކޯޕަރޭޝަންތައް އެކުލަވާލުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ފަށައިފިއެވެ. މިއީ އެއްމެދު އިމާރާތުގެ ގާނޫނުގެ ދަށުން އެކުލަވާލާފައިވާ “އެއްމެދު އިމާރާތުގެ މެނޭޖްމަންޓް ހިންގުމުގެ ގަވާއިދު” ގެ ދަށުން އުފައްދާ ކޯޕަރޭޝަންތަކެކެވެ.
އެޗްޑީސީން ވިދާޅުވީ ހުޅުމާލޭގައި އިމާރާތްކޮށްފައިވާ އެކިއެކި އެއްމެދު އިމާރާތްތައް ބެހިފައިވާ ގޮތުގެ މަތިން، ވިނަރެސް ފްލެޓުތައް ހިމެނޭ ސްޓްރާޓާ އެކެއް، ދޭއް އަދި ތިނެއްގެ ފުރަތަމަ އަހަރީ އާންމު ޖަލްސާތައް މި މަހުގެ 26، 27 އަދި 28 ގައި ބޭއްވުމަށް ނިންމާފައިވާ ކަމަށެވެ. މި ޖަލްސާތަކުގެ މައިގަނޑު ބޭނުމަކީ އިމާރާތްތަކުގެ ކަންކަން ބެލެހެއްޓުން ފަސޭހަކުރުމަށްޓަކައި މެނޭޖްމަންޓް ކޯޕަރޭޝަންތައް އެކުލަވާލައި، އެ ކޯޕަރޭޝަންތައް ހިންގާނެ ކައުންސިލެއް އިންތިހާބު ކުރުމެވެ
ކޮންމެ ސްޓްރާޓާއެއް ނުވަތަ އެއްމެދު އިމާރާތަކަށް ވަކިން އިންތިހާބުކުރާ މި ކައުންސިލްގައި ހިމެނޭނީ ކައުންސިލްގެ ރައީސް، ހަޒާންދާރު، ސެކްރެޓަރީ އަދި އެއް އާންމު މެންބަރެވެ. އިންތިހާބުކުރެވޭ ކައުންސިލާ އެ ސްޓްރާޓާއެއްގައި ހިމެނޭ އިމާރާތްތައް ބެލެހެއްޓުމުގެ ފުރިހަމަ ޒިންމާ ހަވާލުކުރެވޭނެއެވެ. ފުރަތަމަ އަހަރީ ޖަލްސާގައި ޔުނިޓުތަކުގެ ވެރިންގެ އިތުރުން އެޗްޑީސީ އަދި ހައުސިންގ މިނިސްޓްރީގެ ބޭފުޅުން ބައިވެރިވާނެއެވެ.
ވިނަރެސްގެ ޓަވަރުތައް ބެހިފައިވާ 3 ސްޓްރާޓާ އަކީ:
ސްޓްރާޓާ 1: ޓަވަރު 1 އިން 4 (564 ރެސިޑެންޝަލް ޔުނިޓް)
ސްޓްރާޓާ 2: ޓަވަރު 5 އިން 8 (492 ރެސިޑެންޝަލް ޔުނިޓް)
ސްޓްރާޓާ 3: ޓަވަރު 9 އަދި 10 (288 ރެސިޑެންޝަލް ޔުނިޓް)
އެޗްޑީސީން އިތުރަށް ބުނީ ވިނަރެސް ފްލެޓުތަކުގެ މެނޭޖްމަންޓް ކޯޕަރޭޝަންތައް އެކުލަވާލައި ނިމުމުން، ހުޅުމާލޭގެ އެހެން އެއްމެދު އިމާރާތްތަކުގެ މަސައްކަތްވެސް ފަށާނެ ކަމަށެވެ. މިއީ އިމާރާތްތަކުގެ އާންމު ހިދުމަތްތައް މެދުނުކެނޑި ފޯރުކޮށްދިނުމަށާއި، ދިގުމުއްދަތަކަށް އިމާރާތްތައް ބެލެހެއްޓުން ހަރުދަނާކުރުމަށް އެޅޭ މުހިންމު ފިޔަވަޅެއް ކަމަށް އެ ކޯޕަރޭޝަނުން ފާހަގަކުރެއެވެ.