ސަރުކާރުގެ ކެބިނެޓަށް އަންނަމުންދާ ބޮޑެތި ބަދަލުތަކުގެ ތެރެއިން، މިއަދު އިތުރު 4 ވަޒީރަކު މަގާމުން އިސްތިއުފާ ދެއްވައިފިއެވެ.
މިއަދު މަގާމުން އިސްތިއުފާ ދެއްވާފައިވަނީ މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. އަލީ ހައިދަރު، ޓޫރިޒަމް އެންޑް އެންވަޔަރަމެންޓް މިނިސްޓަރު ޠާރިޤް އިބްރާހިމް އަދި ހެލްތު މިނިސްޓަރު އަބްދުﷲ ނާޒިމް އިބްރާހީމް އަދި މިނިސްޓަރ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖްގެ މަޤާމުން އާދަމް ނަޞީރު އިބްރާހީމް އެވެ.
މައުލޫމާތު ލިބިފައިވާ ގޮތުގައި މި ތިން ބޭފުޅުންވެސް މަގާމުން އިސްތިއުފާ ދެއްވާފައިވަނީ މިއަދުގެ ވަގުތެއްގައެވެ. ނަމަވެސް، މި ބަދަލުތަކާ ގުޅޭގޮތުން ރައީސުލްޖުމްހޫރިއްޔާގެ އޮފީހުން ރަސްމީކޮށް އަދި އެއްވެސް ބަހެއް ވިދާޅެއް ނުވެއެވެ.
މިއަދުގެ ވަގުތެއްގައި މި ތިން ވަޒީރުންގެ އިތުރުން ޔޫތު މިނިސްޓަރ އިބްރާހީމް ފައިޞަލް (އަސްވާޑް) އާއި، ދަނޑުވެރިކަމާބެހޭ ވަޒީރު ޑރ. އައިޝަތު މާރިޔާ އަދި ދިފާއީ ވަޒީރު ޣައްސާން މައުމޫން ވެސް ވަނީ މަގާމުން އިސްތިއުފާ ދެއްވާފައެވެ. މީގެ އިތުރުން، ސިޓީސް މިނިސްޓަރ އާދަމް ޝަރީފް އުމަރާއި، ޖެންޑާ މިނިސްޓަރ ޑރ. އާއިޝަތު ޝިހާމް އަދި ޚާރިޖީ ވަޒީރު ޑރ. އަބްދުﷲ ޚަލީލް މިއަދު ވަނީ މަގާމުން ވަކިކުރައްވާފައެވެ.
މި ބަދަލުތަކާއެކު، ފާއިތުވި ދެ ދުވަހުގެ ތެރޭގައި ކެބިނެޓުން ވަކިވި އަދި ވަކިކުރި ބޭފުޅުންގެ ޖުމްލަ އަދަދު މިވަނީ 9 އަކަށް އަރާފައެވެ. މީގެ ތެރޭގައި އިއްޔެ މަގާމުން އިސްތިއުފާ ދެއްވި ރައީސް އޮފީހުގެ މިނިސްޓަރ ޢަލީ އާރިފް ވެސް ހިމެނިވަޑައިގަންނަވައެވެ.
ސަރުކާރުގެ މަތީ ފަންތީގެ މަގާމުތަކަށް މިފަދަ ބޮޑެތި ބަދަލުތަކެއް އަންނަން ފަށާފައިވަނީ، ނިމިދިޔަ ހޮނިހިރު ދުވަހު ބޭއްވުނު ފެންނަ ނުފެންނަ ވޯޓަށްފަހު، ސަރުކާރުގެ ހިންގުން ހަރުދަނާކުރުމަށް ގެންނަ އިސްލާހީ ބަދަލުތަކުގެ ތެރެއިން ކަމަށް ބެލެވެއެވެ.