ރައްޔިތުންގެ ޝަކުވާތައް ހުށަހެޅުމަށް ރައީސުލްޖުމްހޫރިއްޔާގެ އޮފީހުގައި ގާއިމުކުރައްވާފައިވާ “ސިޓިޒަންސް ކޮމްޕްލެއިންޓްސް ބިއުރޯ” ގެ ބޭނުން އެންމެ ފުރިހަމަގޮތުގައި ހިފޭނީ ރައްޔިތުންގެ ޝަކުވާތައް ހުށަހަޅައިގެން ކަމަށްވާތީ، އެ ޝަކުވާތައް ހުށަހެޅުމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުހައްމަދު ހުސެއިން ޝަރީފް (މުންދު) އިލްތިމާސްކުރައްވައިފިއެވެ. ދައުލަތުގެ މީޑިއާގައި ވާހަކަފުޅު ދައްކަވަމުން މުންދު ވަނީ ރައްޔިތުން ހުށަހަޅާ ޝަކުވާތަކަށް ސަރުކާރުން ފުރިހަމައަށް ޖަވާބުދާރީވާނެކަމުގެ ޔަގީންކަން ދެއްވާފައެވެ.
މުންދު ވިދާޅުވީ މި ބިއުރޯއަކީ ރައްޔިތުންގެ ކަންބޮޑުވުންތައް ގާތުން އަޑުއެއްސެވުމުގެ މަގުޞަދުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުފެއްދެވި މުހިންމު އިދާރާއެއް ކަމަށެވެ. އަދި މިއީ ހަމައެކަނި ނަމެއްގައި އުފެއްދި ތަނެއް ނޫން ކަމަށާއި، މިއީ ދުނިޔޭގެ ތަހުޒީބީ މުޖުތަމައުތަކާއި ޑިމޮކްރަސީގެ ހަޔާތުގައި ވެސް މުހިންމު ދައުރެއް އަދާކުރާނެ ނިޒާމެއްކަން އޭނާ ފާހަގަކުރެއްވިއެވެ.
“މިއީ ޑިމޮކްރަސީއެއްގައި ރައްޔިތުންގެ ބާރާއެކުގައި ވެރިކަމެއްް ހިންގުމުގައި ނިޒާމާ ކައިރިން ރައްޔިތުންނަށް އެ ބާރުވެރިކަން ދިނުމަށްޓަކައި ބޭނުންކުރާނެ ނިޒާމެއް. މި ކާމިޔާބު ޕްލެޓްފޯމަކަށްވާނީ ރައްޔިތުން މީގެ ބޭނުން ހެޔޮ ގޮތުގައި ހިތްޕަވައިގެން ވަޑައިގެންނެވީމަ،” މުންދު ވިދާޅުވިއެވެ. އޭނާ އިތުރަށް ވިދާޅުވީ ސަރުކާރުގެ ހިދުމަތަކާ މެދު ނުވަތަ ސިޔާސަތަކާ މެދު ހިތްހަމަނުޖެހޭ ކަންކަން މި ބިއުރޯ މެދުވެރިކޮށް ހުށަހެޅުމުގެ ފުރުސަތު އޮންނާނެ ކަމަށެވެ.
ސިޓިޒަންސް ކޮމްޕްލެއިންޓްސް ބިއުރޯއަކީ ރައްޔިތުންގެ ޝަކުވާތަކަށް 24 ގަޑިއިރު ހިދުމަތް ދިނުމަށް ގާއިމުކުރާ އޮފީހެކެވެ. މި އޮފީސް އުފައްދަވާނެކަން ރައީސުލްޖުމްހޫރިއްޔާ އިއުލާން ކުރެއްވީ މިއަހަރުގެ ފެބުރުވަރީ މަހުގެ ފަސްވަނަ ދުވަހު ރިޔާސީ ބަޔާން އިއްވަވަމުންނެވެ. މި ބިއުރޯގެ މައިގަނޑު މަސައްކަތަކީ ޑިޖިޓަލް ސިސްޓަމެއްގެ ތެރެއިން ޝަކުވާތައް ބަލައިގަނެ، ކަމާބެހޭ އިދާރާތަކުން މައުލޫމާތު ހޯދައި ރައްޔިތުންނަށް ޖަވާބުދާރީވުމެވެ.
މި ބިއުރޯގެ އަމަލީ މަސައްކަތްތައް މިއަހަރުގެ މެދުތެރޭގައި ފެށުމަށް ތައްޔާރުވަމުންދާއިރު، މިހާރު ކުރިއަށްދަނީ އިދާރީ އިންތިޒާމުތައް ހަމަޖެއްސުމާއި މުވައްޒަފުން ހޯދުމުގެ މަސައްކަތެވެ. މި ހިދުމަތުގެ ދަށުން 24 ގަޑިއިރު ހިދުމަތް ފޯރުކޮށްދޭ ކޯލް ސެންޓަރެއް ވެސް ގާއިމުކުރެވިގެންދާނެއެވެ.