ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި އއ. ރަސްދޫގެ ޕީއެންސީ ކެންޑިޑޭޓުން ހޯދި ބޮޑު ކާމިޔާބީ ފާހަގަކުރުމަށްޓަކައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ހަވީރު އެރަށަށް ވަޑައިގެންފިއެވެ. މިއީ އިންތިހާބުގެ ކާމިޔާބީ ފާހަގަކުރުމަށް ބާއްވާ ހަރަކާތެއްގައި ބައިވެރިވެވަޑައިގަތުމަށް ރައީސް ރަށަކަށް ކުރެއްވި ފުރަތަމަ ދަތުރުފުޅެވެ.
އިލެކްޝަންސް ކޮމިޝަނުން އާންމުކޮށްފައިވާ ދާއިމީ ނަތީޖާއިން ދައްކާގޮތުގައި، ރަސްދޫ ކައުންސިލްގެ ހުސްވެފައިވާ ތިން ގޮނޑީގެ އިތުރުން އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ހުރިހާ ގޮނޑިއެއް ވެސް ކާމިޔާބުކޮށްފައިވަނީ ސަރުކާރު ހިންގާ ޕީއެންސީންނެވެ. މިއީ ރަސްދޫގެ ސިޔާސީ ތާރީހުގައި އިދިކޮޅު އެމްޑީޕީއަށް ލިބުނު އެންމެ ބޮޑު ނާކާމިޔާބީގެ ގޮތުގައި ފާހަގަކުރެވެއެވެ.
ރައީސް ޑރ. މުއިއްޒު ރަސްދޫއަށް ވަޑައިގަތުމުން އެރަށުން ވަނީ ވަރަށް ހޫނު މަރުހަބާއެއް ދަންނަވާފައެވެ. ރަށުގެ ބަނދަރު ސަރަހައްދު ޕީއެންސީގެ ރަސްމީ ކުލަ ކަމަށްވާ “ވިލު ނޫ” ކުލައިން ޒީނަތްތެރިކޮށްފައިވާއިރު، ރަށުގެ ގިނަ އަދަދެއްގެ ރައްޔިތުން ވަނީ އެ ކުލައިގެ ހެދުމުގައި ރައީސަށް މަރުހަބާ ކިޔުމަށް ބަނދަރަށް ޖަމާވެފައެވެ. މިއީ ރާއްޖޭގެ ވެރިކަން ކުރެއްވި ބޭފުޅަކަށް އެރަށުން މިހާތަނަށް ކީ އެންމެ ހޫނު މަރުހަބާކަން ފާހަގަކުރެވެއެވެ.
މި ދަތުރުފުޅުގައި ރައީސްގެ އަރިހުގައި އެމަނިކުފާނުގެ އަނބިކަނބަލުން ސާޖިދާ މުހައްމަދާއި، ވަޒީރުންގެ އިތުރުން ޕީއެންސީގެ އިސް ބޭފުޅުން ބައިވެރިވެވަޑައިގެންނެވިއެވެ. ރައީސް ވަނީ ބަނދަރު ސަރަހައްދަށް އެއްވި ރައްޔިތުންނާ ސަލާމްކުރައްވައި، ފޮޓޯ ނަންގަވައިފައެވެ.
ޕީއެންސީން ހޯދި މި ކާމިޔާބީ ފާހަގަކުރުމަށްޓަކައި މިރޭ ރަސްދޫގައި ހާއްސަ އިވެންޓެއް ބޭއްވުމަށް ވަނީ ހަމަޖެހިފައެވެ. މި އިވެންޓުގެ ތެރެއިން އުފާފާޅުކުރުމުގެ ގޮތުން ހަވާ އެރުވުން ވެސް ކުރިއަށްދާނެ ކަމަށް މައުލޫމާތު ލިބެއެވެ.