ސަރުކާރުގެ ކުންފުނިތަކުގެ ހަރަދުތައް ކުޑަކުރުމާއެކު ހިންގުން ހަރުދަނާކުރުމަށް އަޅަން އަންގާފައިވާ ފިޔަވަޅުތަކަކީ މިވަގުތު ކޮންމެހެން އަޅަންޖެހޭ ފިޔަވަޅުތަކެއްކަމަށް މިނިސްޓްރީ އޮފް ފިނޭންސްއިން ހާމަކޮށްފިއެވެ. މިނިސްޓްރީން މިކަން ހާމަކުރީ ކުންފުނިތަކުގެ މަސައްކަތް ހަރުދަނާކޮށް، މާލީ ގޮތުން ދެމެހެއްޓެނިވި ގޮތެއްގައި ހިންގުން ބިނާކުރުމަށް ބާރުއެޅުމުގެ ގޮތުން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އަށް ފޮނުވި ސިޓީއެއްގައެވެ.
ފިނޭންސް މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ، ކުންފުނިތަކުގެ މާލީ ހިންގުން ހަރުދަނާކޮށް ހަރަދު ކުޑަކުރުމުގެ ގޮތުން ކުންފުނިތަކުގެ މުވައްޒަފުންގެ 33 އިންސައްތަ ވަޒީފާ މަދުކުރުމަށް އިރުޝާދު ދީފައިވާނެ ކަމަށެވެ. މީގެ އިތުރުން ވަޒީފާ ދިނުމުގައި އަމަލުކުރަންވީ ގޮތްތަކުގެ އިރުޝާދު ކުންފުނިތަކަށް ދިނުމަށްވެސް ޕީސީބީއަށް ވަނީ އަންގާފައެވެ.
ވަޒީފާއަށް މީހުން ނެގުމުގެ ނިޒާމު ހަރުދަނާކޮށް، ތައުލީމާއި ތަޖުރިބާއާއި ހުނަރަށް ބަލައިގެން މީހުން އައްޔަންކުރާ އުސޫލު ހަރުދަނާކުރުމަށްވެސް މިނިސްޓްރީން ވަނީ އިރުޝާދު ދީފައެވެ. “މިއީ އެންމެ އެކަށީގެންވާ ފަރާތްތައް ވަޒީފާތަކަށް ހޮވައި، ކުންފުނިތަކުގެ މަސައްކަތްތައް އެންމެ ފުރިހަމަ ގޮތުގައި ކުރިއަށް ގެންދިއުމަށް މަގުފަހިކުރުމުގެ ގޮތުން ނިންމާފައިވާ ނިންމުމެއް،” ފިނޭންސް މިނިސްޓްރީން ބުނެފައިވެއެވެ.
މި ފިޔަވަޅުތަކަކީ ކުންފުނިތައް ދިގު މުއްދަތަކަށް ދެމެހެއްޓެނިވި ގޮތެއްގައި ހިންގުމަށާއި، ދައުލަތުގެ މާލީ އަދި ހިންގުމުގެ ސިޔާސަތުތަކާ އެއްގޮތަށް މަސައްކަތްތައް ބައްޓަންކުރުމަށްޓަކައި މިވަގުތު ކޮންމެހެން އަޅަންޖެހޭ މުހިންމު ފިޔަވަޅުތަކެއް ކަމަށް އެ ވުޒާރާއިން ފާހަގަކުރެއެވެ. އަދި މި ފިޔަވަޅުތައް ތަންފީޒުވަމުންދާ މިންވަރު މޮނީޓާކޮށް، އެ މައުލޫމާތު މިނިސްޓްރީއާ ހިއްސާކުރުމަށްވެސް ޕީސީބީއަށް ވަނީ އަންގާފައެވެ.
މީގެ ކުރިންވެސް ޕީސީބީން ވަނީ ކުންފުނިތަކުގެ ހަރަދު ކުޑަކުރުމަށް ގިނަ ފިޔަވަޅުތަކެއް އަޅަން އަންގާފައެވެ. އޭގެ ތެރޭގައި މުސާރައާއި އިނާޔަތްތައް ކޮންޓްރޯލް ކުރުމާއި، ކޮންމެހެން ބޭނުންވާ ހާލަތްތަކުގައި ފިޔަވައި އައު މުވައްޒަފުން ނެގުމާއި މަގާމުގެ ކުރިއެރުން ދިނުން ހުއްޓާލުން ހިމެނެއެވެ. އަދި އިތުރުގަޑީގެ މަސައްކަތް ހަނިކުރުމާއި، ކޮންމެހެން ބާއްވަން ނުޖެހޭ ހަރަކާތްތަކާއި ދަތުރުފަތުރުގެ ހަރަދުތައް ކުޑަކުރުންވެސް މީގެ ތެރޭގައި ހިމެނެއެވެ.