ވެލާނާ އިންޓަރނޭޝަނަލް އެއާޕޯޓުގެ ޓާމިނަލް 2 ގެ ސަރަހައްދުގައި ކުރިއަށްދާ ކޮންސްޓްރަކްޝަން މަސައްކަތްތަކަކަށްޓަކައި، އެ ސަރަހައްދުގެ އެރައިވަލް ރޯޑުން ބައެއް ވަގުތީ ގޮތުން ބަންދުކުރުމަށް މޯލްޑިވްސް އެއާޕޯޓްސް ކޮމްޕެނީ (އެމް.އޭ.ސީ.އެލް) އިން ނިންމައިފިއެވެ.
މި މަސައްކަތް ކުރިއަށް ގެންދިއުމަށް ހަމަޖެހިފައިވަނީ 23 އޭޕްރީލް 2026 އިން ފެށިގެން 30 އޭޕްރީލް 2026 ގެ ނިޔަލަށް، ކޮންމެ ދުވަހެއްގެ ރޭގަނޑު 00:00 އިން ފަތިހު 05:00 އަށެވެ. މި ވަގުތުތަކުގައި އެ ސަރަހައްދުގެ މަގުގެ ބައެއް ބަންދުވާނެތީ ދަތުރުފަތުރުގެ އިންތިޒާމުތަކަށް ބަދަލުތަކެއް އަންނާނެ ކަމަށް އެ ކުންފުނިން މަޢުލޫމާތުދެއެވެ.
ދަތުރުފަތުރުގެ އިންތިޒާމުތަކަށް އަންނަ ބަދަލުތައް
އެމް.އޭ.ސީ.އެލް އިން ހާމަކުރި ގޮތުގައި، މަގު ބަންދުކުރާ ވަގުތުތަކުގައި ޓެކްސީތަކުން ފަސިންޖަރުން ބޭލުމަށާއި ގޮވައިގެން ދިއުމަށް ބޭނުންކުރަން ޖެހޭނީ ޓާމިނަލް 1 ގެ ޕިކަޕް އެންޑް ޑްރޮޕް ސަރަހައްދެވެ. އަދި ވީ.އައި.ޕީ ޚިދުމަތް ހޯއްދަވާ ފަރާތްތަކުގެ ކާރުތައް މަޑުކުރުމަށް އެރައިވަލް ރޯޑުގައި ޚާއްޞަ ސަރަހައްދެއް މިހާރު ވަނީ ކަނޑައަޅާފައެވެ.
މީގެ އިތުރުން އާރް.ޓީ.އެލް ބަހުގެ ޚިދުމަތަށް ވެސް ބަދަލުތަކެއް އަންނާނެއެވެ. އެގޮތުން އެއާޕޯޓަށް އަންނަ ބަސްތައް މަޑުކުރާނީ ޓާމިނަލް 1 ގެ ބަސް ހުއްޓިއަށެވެ. ނަމަވެސް އެއާޕޯޓުން ފުރާ ބަސްތައް މަޑުކުރާނީ ޓާމިނަލް 2 ކައިރީގައިވާ ބަސް ހުއްޓިއަށެވެ.
މި މަސައްކަތް ކުރިއަށްދާ ވަގުތުތަކުގައި ދިމާވެދާނެ ދަތިތަކަށް އެމް.އޭ.ސީ.އެލް އިން މާފަށް އެދެއެވެ. އަދި އެއާޕޯޓުން ދޭ އިރުޝާދުތަކާ އެއްގޮތަށް އަމަލުކުރުމަށް ހުރިހާ ފަރާތްތަކަކަށް އެ ކުންފުނިން ވަނީ އިލްތިމާސްކޮށްފައެވެ.