ސްވިޒަލޭންޑުގެ މަޝްހޫރު އެއަރލައިނެއް ކަމަށްވާ އެޑަލްވިސްއިން، ކުރިއަށް އޮތް “ސަމަރ” މޫސުމުގެ ދުވަސްވަރު ރާއްޖެއަށް ކުރާ ދަތުރުތައް އިތުރުކުރުމަށް ނިންމައިފިއެވެ. މިއީ ރާއްޖޭގެ ފަތުރުވެރިކަމުގެ މާކެޓަށް ލިބިގެންދާނެ ބޮޑު ކުރިއެރުމެކެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން މައުލޫމާތު ދޭގޮތުގައި، މިހާރު ކުރަމުންދާ ދަތުރުތަކުގެ އިތުރުން، ޖުލައި މަހުގެ 4 ވަނަ ދުވަހުން ފެށިގެން ސެޕްޓެމްބަރު މަހުގެ 13 ވަނަ ދުވަހުގެ ނިޔަލަށް ކޮންމެ ހަފުތާއަކު ދެ ފްލައިޓް އިތުރަށް ބޭއްވުމަށް ވަނީ ހަމަޖެހިފައެވެ. މި ދަތުރުތައް ކުރުމަށް ތާވަލުކޮށްފައިވަނީ ކޮންމެ ހަފުތާއެއްގެ ބުދަ އަދި ހޮނިހިރު ދުވަހުއެވެ.
މި އިތުރުކުރެވޭ ދަތުރުތަކާއެކު، އެ މުއްދަތުގެ ތެރޭގައި ޖުމްލަ 21 ފްލައިޓް އިތުރަށް ރާއްޖެއަށް އަންނާނެއެވެ. އެޑަލްވިސް އަކީ ސްވިޒަލޭންޑުގެ ތިންވަނައަށް އެންމެ ބޮޑު އެއަރލައިން ކަމަށްވާއިރު، އެ އެއަރލައިނަކީ ރާއްޖޭގެ ފަތުރުވެރިކަމުގެ ބާޒާރުގައި މުހިންމު ދައުރެއް އަދާކުރާ އެއަރލައިނެކެވެ.
އެޑަލްވިސްއިން ރާއްޖެއަށް ދަތުރުތައް ފަށާފައިވަނީ 4 ނޮވެމްބަރު 2000 ގައެވެ. މިއަހަރަކީ އެ އެއަރލައިނުން ރާއްޖެއަށް ދަތުރުކުރާތާ 25 އަހަރު ފުރޭ ރިހި ޔޫބީލް އަހަރެވެ. މި ދިގު މުއްދަތުގައި އެ އެއަރލައިނުން ވަނީ މެދުކެނޑުމެއްނެތި ރާއްޖެއާއި ސްވިޒަލޭންޑާ ދެމެދު ވައިގެ ދަތުރުފަތުރުގެ ޚިދުމަތް ފޯރުކޮށްދީފައެވެ.
މި ނިންމުމަކީ މެދުއިރުމަތީގެ ހަނގުރާމައާއި ގުޅިގެން ރާއްޖެއަށް ފްލައިޓްތައް އަންނަ ޑިމާންޑް ވަގުތީގޮތުން މަދުވެފައިވާ ދުވަސްކޮޅެއްގައި، ރާއްޖެއަށް އަންނަ ފަސިންޖަރުންގެ އަދަދު އިތުރުވުމަށް މަގުފަހިވެގެންދާނެ މުހިންމު ފިޔަވަޅެއް ކަމަށް ދާއިރާގެ މާހިރުން ދެކެއެވެ.