“ޓެކްސީ ނަފާ” ލޯނު ސްކީމްގެ ދަށުން ލިބިފައިވާ ކާރުތައް ރަޖިސްޓަރީ ނުކުރެވި ލަސްވާ މައްސަލައާއި، ލޯނު އަނބުރާ ދެއްކުމުގައި ދިމާވެފައިވާ ދަތިތަކަށް އިންސާފުވެރި އަވަސް ހައްލެއް ހޯއްދަވައިދެއްވާނެ ކަމުގެ ޔަގީންކަން އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ދެއްވައިފިއެވެ.
ވަޒީރު ސަޢީދު މިކަމުގެ ޔަގީންކަން ދެއްވީ، ހއ. ދިއްދޫ، މުތީގޭ، އަލްފާޟިލް އާދަމް ސަލީމް މީސްމީޑިއާގައި ޝާއިޢުކުރެއްވި ސިޓީއަކަށް ދެއްވި ޖަވާބުގައެވެ. އާދަމް ސަލީމް ހުށަހެޅުއްވި ސިޓީގައި ފާހަގަކޮށްފައިވަނީ، ލޯނު ސްކީމްގެ ދަށުން ލިބުނު ކާރުތައް ރަޖިސްޓަރީ ނުކުރެވި ލަސްވުމުގެ ސަބަބުން ވިޔަފާރި ނުފެށި، ނަމަވެސް ލޯނު ދައްކަން މަޖުބޫރުވަމުންދާތީ ރައްޔިތުންނަށް ބޮޑެތި ތަކްލީފުތަކެއް ކުރިމަތިވަމުންދާ ކަމަށެވެ.
މިކަމާ ގުޅިގެން ވަޒީރު ސަޢީދު ވިދާޅުވީ، އެ ސިޓީގައި ފާހަގަކޮށްފައިވާ ކަންކަން އިންސާފުވެރިކަމާއެކު ބަލައި، ކުރިއަށް ދެވޭނެ އެންމެ އަވަސް މަގުތަކާއި ހައްލުތައް ހޯދުމަކީ އެމަނިކުފާނުގެ އެންމެ އިސް އެއް ވާޖިބު ކަމުގައި ދެކެވަޑައިގަންނަވާ ކަމަށެވެ. އަދި މި މައްސަލަތައް ބަލައިދިނުމަށް އެދި ޓްރާންސްޕޯޓްގެ ކަންކަން ބެލެހެއްޓެވުމާ މަސްއޫލުވެ ތިއްބެވި ބޭފުޅުންނަށް މިހާރު ދަންނަވާފައިވާނެ ކަމަށްވެސް ވަޒީރު ވިދާޅުވިއެވެ.
ވަޒީރު އިތުރަށް ފާހަގަކުރެއްވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ މައިގަނޑު އަމާޒަކީ ރައްޔިތުންނާ ވީހާވެސް ގާތުން ޚިދުމަތް ދިނުމެވެ. އަދި ރައްޔިތުން އެދޭ މިފަދަ ކަންކަމުގައި ގާނޫނާއި ގަވާއިދުތަކުގެ ތެރެއިން އަވަސް ހައްލު ހޯދައިދީ، ރައްޔިތުންގެ އަޑު އެހުމަކީ ރައީސް މުޢިއްޒުގެ ވަރަށް ބޮޑު އެދިވަޑައިގަތުމެއް ކަމަށްވެސް ސަޢީދު ވިދާޅުވިއެވެ.
އާދަމް ސަލީމްގެ ސިޓީގައި ވަނީ ކާރުތައް ރަޖިސްޓަރީ ވަންދެން ލޯނު ދެއްކުން ފަސްކޮށްދިނުމަށާއި (މޮރެޓޯރިއަމް)، ރަޖިސްޓްރޭޝަންގެ ކަންކަން އަވަސްކޮށްދިނުމަށް އެދިފައެވެ.