މާލޭގައި ބޭއްވި ސިޔާސީ އެއްވުމެއްގެ ތެރެއިން މާލެ ސިޓީގެ މޭޔަރު އާދަމް އާޒިމަށް ދޭން އުޅުނު ހަމަލާ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންމެ ހަރުކަށި އިބާރާތުން ކުށްވެރިކުރައްވައިފިއެވެ.
ރައީސް އޮފީހުން މިކަމާ ގުޅިގެން ނެރުއްވި ބަޔާނެއްގައި ރައީސުލްޖުމްހޫރިއްޔާ ވިދާޅުވީ، ރައްޔިތުންގެ ވޯޓުން އިންތިޚާބުކޮށްފައިވާ ބޭފުޅުންނަށާއި ސިޔާސީ ލީޑަރުންނަށް ހަމަލާދީ، އެބޭފުޅުންގެ މަސައްކަތަށް ހުރަސްއެޅުމަކީ އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމަށެވެ. އަދި ކޮންމެ ރައްޔިތަކަށްމެ ބިރުވެރިކަމެއް ނެތް އަމާން މާހައުލެއް ގާއިމުކޮށްދިނުމަކީ ސަރުކާރުގެ އިސް އަމާޒެއް ކަމަށާއި، އެކަމަށް އަބަދުވެސް މަސައްކަތް ކުރައްވާނެ ކަމުގެ ޔަގީންކަން އެމަނިކުފާނު ދެއްވިއެވެ.
މި ހާދިސާއާ ގުޅިގެން މޭޔަރު އާޒިމް ކުރައްވާ ތުހުމަތުތަކަށް ސަރުކާރުގެ ތަރުޖަމާނު މުޙައްމަދު ޙުސައިން ޝަރީފް ވަނީ ރައްދު ދެއްވާފައެވެ. ތަރުޖަމާނު ވިދާޅުވީ، މިއީ ސަރުކާރުން ކުރުވި ކަމެއް ކަމަށް ބުނެ މޭޔަރު ކުރައްވާ ތުހުމަތުތަކަކީ އެއްވެސް އަސާސެއް ނެތް ދޮގު ވާހަކަތަކެއް ކަމަށެވެ. އަދި މިފަދަ ކަންކަމަކީ ސަރުކާރާ އެއްވެސް ގުޅުމެއް އޮތް ކަންކަން ނޫން ކަމަށާއި، ސިޔާސީ ބޭނުމަކަށްޓަކައި މިފަދަ ދަށު ދަރަޖައިގެ ތުހުމަތުތައް ކުރުމަކީ އިންތިހާއަށް ކަންބޮޑުވާ ކަމެއް ކަމަށްވެސް އޭނާ ފާހަގަކުރެއްވިއެވެ.
ތަރުޖަމާނު އިތުރަށް ވިދާޅުވީ، މި ހާދިސާ ހިނގި ފަހުން އެއްވެސް ރަސްމީ ފަރާތަކުން ނުވަތަ އިދިކޮޅު އެމް.ޑީ.ޕީ އިން ވެސް ފުލުހުންނަށް މައްސަލަ ރިޕޯޓުކޮށްފައި ނުވާ ކަމަށެވެ. ނަމަވެސް، ސޯޝަލް މީޑިއާގައި ދައުރުވި ވީޑިއޯ ފެނުމާއެކު، މައްސަލައިގެ ސީރިއަސްކަމުން ފުލުހުން އަމިއްލަ އިސްނެންގެވުމަށް މިހާރު މި މައްސަލަ ތަހުގީގު ކުރަން ފަށާފައިވާ ކަމަށް އޭނާ ވިދާޅުވިއެވެ.
މާލެ ސިޓީގެ މޭޔަރަކީ އެދިވަޑައިގެންފިނަމަ ދައުލަތުން ސެކިއުރިޓީ ލިބޭނެ ބޭފުޅެއްކަން ފާހަގަކުރައްވައި، ތަރުޖަމާނު ވިދާޅުވީ ދައުލަތުގެ އިސް މަގާމުތަކުގައި ތިއްބަވާ ބޭފުޅުންގެ ރައްކާތެރިކަން ކަށަވަރުކުރުމަށް ފުލުހުން އަބަދުވެސް "ތްރެޓް އެސެސްމަންޓް" ތައް ހަދަމުންދާނެ ކަމަށެވެ. އަދި އެއްވެސް ބޭފުޅަކަށް ނުރައްކަލެއް އޮތް ކަމަށް ފާހަގަކުރެވިއްޖެނަމަ، ފުލުހުން އިސްވެ ސެކިއުރިޓީގެ ކަންކަން ހަމަޖައްސައިދޭނެ ކަމުގެ ފުރިހަމަ ޔަގީންކަން ސަރުކާރުން ވަނީ ދެއްވާފައެވެ.