ރާއްޖެއަށް މަސްތުވާތަކެތި އެތެރެކުރާ ބިދޭސީންގެ ތެރޭގައި މި ފަހުން އިންޑިއާގެ ރައްޔިތުން އިތުރުވަމުންދާތީ، އެ ގައުމުގެ ނާކޮޓިކްސް ކޮންޓްރޯލް ބިއުރޯ (އެންސީބީ) އިން ކަންބޮޑުވުން ފާޅުކޮށް ހާއްސަ އެޑްވައިޒަރީއެއް ނެރެފިއެވެ. މި އެޑްވައިޒަރީ ނެރެފައިވަނީ ރާއްޖޭގައި މަސްތުވާތަކެއްޗާ ދެކޮޅަށް ހަދާފައިވާ ގާނޫނުތައް ހަރުކަށިކޮށް، ބައެއް ކުށްތަކަށް މަރުގެ އަދަބު ދޭން ނިންމާފައިވާ ދަނޑިވަޅެއްގައެވެ.
އެންސީބީން ނެރުނު “ހައި-ޕްރިއޮރިޓީ އެޑްވައިޒަރީ” ގައި ބުނެފައިވަނީ، ގައުމެއްގެ ގާނޫނު ނޭނގުމަކީ ކުށުން ބަރީއަވުމަށް ދެއްކޭނެ އުޒުރެއް ނޫން ކަމަށެވެ. އެހެންކަމުން، ރާއްޖޭގައި އޮތް ހަރުކަށި އަދަބުތަކުން ސަލާމަތްވުމަށްޓަކައި އެ ގައުމުގެ ގާނޫނުތަކަށް ފުރިހަމައަށް ބޯލެނބުމަށް އިންޑިއާގެ ރައްޔިތުންނަށް ވަނީ އިލްތިމާސްކޮށްފައެވެ. މީގެ އިތުރުން، އެއާޕޯޓްތަކާއި ބަނދަރުތަކުގައި އުޅޭއިރު ގޮތް ނޭނގޭ މީހުން ދޭ ތަކެއްޗާ ހަވާލު ނުވުމަށާއި، އަމިއްލަ ދަބަސްތަކަށް ސަމާލުވުމަށް ވެސް ވަނީ ލަފާދީފައެވެ.
މި މައްސަލައާ ގުޅިގެން ރާއްޖޭގައި ހުންނަ އިންޑިއާގެ ހައި ކޮމިޝަނުން ވެސް ވަނީ ދަތުރުވެރިންނަށް ހާއްސަ ސަމާލުކަމެއް ދިނުމަށް އެދިފައެވެ. ރާއްޖޭގެ ގާނޫނުތައް ހަރުކަށިކަން ހަނދާންކޮށްދެމުން، ހައި ކޮމިޝަނުން ވެސް ވަނީ ގާނޫނާ ހިލާފު އެއްވެސް އަމަލެއް ނުހިންގުމަށް އިލްތިމާސްކޮށްފައެވެ.
ފާއިތުވި މަދު ދުވަސްކޮޅެއްގެ ތެރޭގައި އިންޑިއާގެ ގިނަ ބަޔަކު ވަނީ މަސްތުވާތަކެއްޗާއެކު ރާއްޖެއިން ހައްޔަރުކޮށްފައެވެ. އެގޮތުން މިދިޔަ މަހު އެކަނިވެސް އިންޑިއާގެ ފަސް މީހަކު ހައްޔަރުކުރިއިރު، އޭގެ ތެރޭގައި ވެލާނާ އެއާޕޯޓުން 6.7 ކިލޯގެ ހަޝިޝް އޮއިލްއާ އެކު އަތުލައިގަތް މީހުންނާއި، އައްޑޫ ސިޓީއަށް ވައިގެ މަގުން މަސްތުވާތަކެތި އެތެރެކުރަން އުޅުނު މީހަކު ހިމެނެއެވެ. އަދި މި މަހުގެ ތެރޭގައި ވެސް ޖުމްލަ 4.5 ކިލޯއަށް ވުރެ ގިނަ މަސްތުވާތަކެއްޗާއެކު އިންޑިއާގެ އިތުރު ހަތަރު މީހަކު ވަނީ ހައްޔަރުކޮށްފައެވެ.
މަސްތުވާތަކެތީގެ ވިޔަފާރިކުރާ ވިއުގަތައް ނައްތާލުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ވަރަށް ބޮޑު އިސްކަމެއް ދެއްވާ ކަމެކެވެ. ރައީސް މީގެ ކުރިން ވިދާޅުވެފައިވަނީ، މަސްތުވާތަކެތީގެ ވިޔަފާރިކުރާ ފަރާތްތަކަށް “މަރުގެ އަދަބު ހިމެނޭހެން ބޮޑެތި އަދަބުތައް ކަނޑައެޅުމަށް” ނިންމަވާފައިވާ ކަމަށެވެ. މިހާރުގެ ގާނޫނު އޮތްގޮތުން މަސްތުވާތަކެތީގެ ކުޑަ މިންވަރެއް ފެނުނު ނަމަވެސް ބޮޑެތި އަދަބުތައް ލިބޭއިރު، ސީރިއަސް ކުށްތަކަށް އުމުރަށް ޖަލަށްލުމާއި މަރުގެ އަދަބު ދިނުން ހިމެނެއެވެ.