އެއްވުންތައް ކަވަރކުރުމުގައި ޙަރަކާތްތެރިވާ ނޫސްވެރިންނަށް ސަލާމަތީ ބާރުތަކުގެ ޚާއްސަ ޙިމާޔަތް ލިބިދޭގޮތަށް ނޫސްވެރިން އެކްރެޑިޓްކުރުމުގެ އައު ގަވާއިދެއް މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން އެކުލަވާލައިފިއެވެ. މި ގަވާއިދުގެ މައިގަނޑު މަޤްސަދަކީ ޤާނޫނުއަސާސީން ކަށަވަރުކޮށްދޭ ނޫސްވެރިކަމުގެ މިނިވަންކަން ދެމެހެއްޓުމާއި، ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނުގެ ދަށުން އެއްވުންތައް ކަވަރުކުރާ ނޫސްވެރިންނަށް އެންމެ ފުޅާ ދާއިރާއެއްގައި އެ ފުރުސަތު ފަހިކޮށްދިނުމެވެ.
މި ގަވާއިދުގެ ދަށުން އެއްވުންތައް ކަވަރުކުރުމުގައި ޙަރަކާތްތެރިވާ ނޫސްވެރިންނަށް ސަލާމަތީ ބާރުތަކުގެ ފަރާތުން ބޭނުންވާ ޙިމާޔަތާއި އެއްބާރުލުން ކަށަވަރުކޮށްދިނުމަށް ވަނީ ހަމަޖެހިފައެވެ. މީގެ އިތުރުން، އެއްވުންތައް ކަވަރުކުރާ އެންމެހައި މީޑިއާތަކަށް ހަމަހަމަ ފުރުސަތު ފަހިކޮށްދިނުމާއި، އެއްވެއުޅުމާ ގުޅޭ މަޢުލޫމާތު ފެތުރުމަށް ޙަރަކާތްތެރިވާ ނޫސްވެރިން އެކްރެޑިޓް ކުރުމުގެ ހަރުދަނާ އުސޫލެއް މި ގަވާއިދުން ކަނޑައަޅައެވެ.
އެކްރެޑިޓްކުރެވިފައިވާ ނޫސްވެރިންނަށް ލިބިދޭ އިމްތިޔާޒުތަކުގެ ތެރޭގައި ސަލާމަތީ ބާރުތަކުގެ ޚާއްސަ ޙިމާޔަތް ލިބިގެންދިޔުމާއި، ހަލަބޮލި ހާލަތްތައް ހިނގާ ސަރަޙައްދުތަކަށް ދެވޭ “އެކްސެސް” ނުވަތަ ވަނުމުގެ ހުއްދަ ލިބުން ހިމެނެއެވެ. އަދި ސަލާމަތީ ބާރުތަކުން މަޢުލޫމާތު ހޯދުމުގައި ލުއިފަސޭހަތަކެއް ލިބިގެންދާނެ ކަމަށްވެސް ގަވާއިދުގައި ބަޔާންކޮށްފައިވެއެވެ.
މި ގަވާއިދުގެ ދަށުން އެކްރެޑިޓްކޮށްދޭ މުއްދަތުތަކަށް ބަލާއިރު، ދިވެހި މީޑިއާތައް ތަމްސީލުކުރާ ފަރާތްތަކަށް އެކްރެޑިޓްކޮށްދެވެނީ 1 އަހަރު ދުވަހުގެ މުއްދަތަށެވެ. ބައިނަލްއަޤުވާމީ މީޑިއާ ތަމްސީލުކުރާ ފަރާތްތަކަށް 3 މަސް ދުވަހުގެ މުއްދަތެއް ދޭއިރު، ފްރީލާންސްކޮށް މަސައްކަތްކުރާ ނޫސްވެރިން އެކްރެޑިޓްކޮށްދެނީ 6 މަސްދުވަހުގެ މުއްދަތަށެވެ.
މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން ވިދާޅުވީ، ޤާނޫނުއަސާސީގައި ބަޔާންކުރާ އެއްވެ އުޅުމުގެ މިނިވަންކަމުގެ ދަށުން އެކި ސަރަޙައްދުތަކަށް އެއްވާ އެއްވުންތައް ކަވަރުކުރުމުގައި މި ގަވާއިދުގެ ސަބަބުން ނޫސްވެރިންނަށް ބޮޑެތި ފަސޭހަތަކެއް ލިބި، ނޫސްވެރިކަމުގެ މިނިވަންކަން އިތުރަށް ހަރުދަނާވެގެންދާނެ ކަމަށެވެ.