މާލެ ސިޓީ ގްރޫޕް އޮފް ހޮސްޕިޓަލްސްގެ ދަށުން ހިންގާ ހޮސްޕިޓަލްތަކުގެ ކަރަންޓުގެ ކެޕޭސިޓީ އިތުރުކުރުމަށްޓަކައި ސްޓެލްކޯއާ ގުޅިގެން މުހިއްމު މަސައްކަތްތަކެއް ފަށާފައިވާ ކަމަށް އެ ގްރޫޕްގެ ސީއީއޯ އިބްރާހީމް ޢަބްދުއްރައްޒާޤް ހަލީމް ވިދާޅުވެއްޖެއެވެ. މި މަސައްކަތުގެ މައިގަނޑު ބޭނުމަކީ މާލެއިން ކަރަންޓު ކެނޑޭ ވަގުތުތަކުގައިވެސް ހޮސްޕިޓަލްގެ ޚިދުމަތްތައް މެދުނުކެނޑި ފޯރުކޮށްދިނުން ކަމަށް އޭނާ ފާހަގަކުރެއްވިއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން ސީއީއޯ ވިދާޅުވީ، އައިޖީއެމްއެޗާއި ދަރުމަވަންތަ ހޮސްޕިޓަލުގައި މިހާރުވެސް ކަރަންޓު ބެކަޕް ސިސްޓަމްތައް ހުރި ނަމަވެސް، އެ ސިސްޓަމްތައް ބޭނުންކުރެވެނީ ހަމައެކަނި އެންމެ މުހިއްމު ސަރަޙައްދުތަކަށް ކަމަށެވެ. އެހެންކަމުން، މުޅި ހޮސްޕިޓަލަށް ޚިދުމަތް ލިބޭނެހެން މި ނިޒާމު ފުޅާކުރުމަކީ އަމާޒެއް ކަމަށް އޭނާ ވިދާޅުވިއެވެ.
“މިވީ ދެ އަހަރެއްހާ ދުވަހުގެ ތެރޭގައި އައިޖީއެމްއެޗަށް ގެނައި ކުރިއެރުންތަކާއެކު ކަރަންޓު ބޭނުންކުރާ އަދަދުވެސް ވަނީ އިތުރުވެފައި. އެހެންކަމުން މިހާރު ހުރި ބެކަޕް ބޮޑުކުރަންޖެހޭކަމާއި މިހާރު ހުރި ސާމާނު ޒަމާނީ ތަކެއްޗަށް ބަދަލުކޮށް އަޕްގްރޭޑް ކުރަންޖެހިފައިވޭ،” ސީއީއޯ ވިދާޅުވިއެވެ.
މި މައްސަލައަށް އަވަސް އަދި ދާއިމީ ހައްލެއް ހޯދުމަށްޓަކައި މި މަހުގެ ތެރޭގައި ސްޓެލްކޯއާއެކު ވަނީ މަޝްވަރާ ބައްދަލުވުމެއް ބާއްވާފައެވެ. މި ބައްދަލުވުމުގައި ހޮސްޕިޓަލްތަކަށް ދިމާވެފައިވާ ކަރަންޓުގެ މައްސަލަތަކަށް އަވަސް ހައްލެއް ހޯދުމާއި، ދިގު މުއްދަތަކަށް ދެ ފަރާތް ގުޅިގެން ކުރެވިދާނެ ކަންކަމާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނު ކަމަށް މާލެ ސިޓީ ގްރޫޕް އޮފް ހޮސްޕިޓަލްސްއިން ބުނެއެވެ.
މި މަސައްކަތްތަކުގެ ތެރޭގައި އައިޖީއެމްއެޗާއި ދަރުމަވަންތަ ހޮސްޕިޓަލުގެ އިތުރުން، މާލެ ސަރަޙައްދުގައި ހުރި ސަރުކާރުގެ އެހެނިހެން ޞިއްޙީ މަރުކަޒުތަކުގެ ކަރަންޓުގެ މައްސަލަތައް ހައްލުކުރުންވެސް ހިމެނެއެވެ. މީގެ ސަބަބުން މާލެ ސަރަޙައްދުގެ ޞިއްޙީ ޚިދުމަތުގެ ފެންވަރު ރަނގަޅުވެ، އިތުބާރު ބޮޑުވެގެންދާނެ ކަމަށް ބެލެވެއެވެ.