މިނިވަން ނޫސްވެރިކަމަކީ މަދަނީ ބައިވެރިވުން ވަރުގަދަކޮށްދޭ ކަމެއްގެ އިތުރުން ތެދު މަޢުލޫމާތު ރައްކާތެރިކޮށްދޭ ވަސީލަތެއްކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު ފާހަގަކުރާ ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި ފޮނުއްވި ތަހުނިޔާގެ ޚިޠާބުގައެވެ.
ރައީސުލްޖުމްހޫރިއްޔާގެ ޚިޠާބުގައި، ރައްޔިތުން ބާރުވެރިކުރުވުމާއި ހާމަކަންބޮޑު ޑިމޮކްރެޓިކް ވެށްޓެއް ކަށަވަރުކުރުމުގައި ޒިންމާދާރު ނޫސްވެރިކަމުގެ ދައުރު ވަރަށް މުހިންމުކަން ފާހަގަކުރެއްވިއެވެ. އަދި ނޫސްވެރިކަމަކީ ދައުލަތުގެ ބާރުތައް ގުޅުވައިދޭ “ހަތަރުވަނަ ބާރު” ކަމުގައި އެމަނިކުފާނު ސިފަކުރެއްވިއެވެ.
ޚިޔާލުފާޅުކުރުމުގެ މިނިވަންކަމާ ގުޅޭގޮތުން ވާހަކަފުޅު ދައްކަވަމުން، އެއީ އިސްލާމްދީނުގައި ފުރުޞަތު ދީފައިވާ ކަމެއް ނަމަވެސް، އެކަމުގައި ހިފަހައްޓަންޖެހޭ އިންތަކެއް ހުންނަންވާނެކަން ރައީސް ހަނދުމަފުޅުކޮށްދެއްވިއެވެ. އެގޮތުން އަޚުލާޤީ މިންގަނޑުތަކަށް ތަބަޢަވުމާއި، މުޖުތަމަޢުގެ މަޞްލަޙަތާއި، އިންސާނީ ކަރާމަތަށް ރައްކާތެރިވުމުގެ މުހިންމުކަން އެމަނިކުފާނު ފާހަގަކުރެއްވިއެވެ.
ނޫސްވެރިންނަށް ރައްކާތެރި މާހައުލެއް ޤާއިމުކޮށްދިނުމަކީ ސަރުކާރުގެ އިސް އަމާޒެއްކަމަށާއި، ޤާނޫނު އަސާސީން ލިބިދޭ ޙައްޤުތައް އެންމެ ފުރިހަމައަށް ކަށަވަރުކޮށްދެއްވާނެކަމުގެ ޔަޤީންކަން ރައީސް އެރުއްވިއެވެ. އަދި ސަރުކާރުގެ “މޯލްޑިވްސް 2.0” ތަޞައްވުރުގެ ދަށުން ނޫސްވެރިންނަށް މިހާރަށްވުރެ ފަހި މާހައުލެއް ތަނަވަސްވެގެންދާނެކަމަށްވެސް އެމަނިކުފާނު ވިދާޅުވިއެވެ.
މީގެއިތުރުން، ނޫސްވެރިކަމަކީ އަބުރުވެރި ދިރިއުޅުމެއް ބިނާކުރެވޭނެ ދާއިރާއަކަށް ހެދުމަށާއި، މީޑިއާ ހިންގުމުގައި ހުރި ގޮންޖެހުންތަކަށް ޙައްލު ހޯދައިދީ، ޢިލްމީ ޖީލެއް ބިނާކުރުމަކީ ސަރުކާރުގެ މުހިންމު އަމާޒެއްކަމަށް ރައީސުލްޖުމްހޫރިއްޔާ ވިދާޅުވިއެވެ. މި ސަރުކާރުން މީޑިއާގެ ދާއިރާއަށް ޚާއްޞަ ސަމާލުކަމެއް ދެއްވާކަމަށާއި، އެ ދާއިރާގެ ތަރައްޤީއަށް ވެވަޑައިގެންނެވި ވަޢުދުތައް ފުއްދަވަމުން ގެންދަވާކަން އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ޚިޠާބު ނިންމަވާލެއްވީ، ރާއްޖޭގައި ހޭލުންތެރި އަދި ހަރުދަނާ މުޖުތަމަޢެއް ބިނާކުރުމަށްޓަކައި މީޑިއާއަށް އިންވެސްޓްކޮށް، މަޢުލޫމާތު ލިބޭނެ މަގުތައް ފަހިކޮށްދިނުމަށް ސަރުކާރުން މަސައްކަތް ކުރަމުންދާނެކަމުގެ ޔަޤީންކަން ދެއްވަމުންނެވެ. އަދި ނޫސްވެރިކަމުގެ ހަމަތަކާއެކު ރައްޔިތުންނަށް ޚިދުމަތްކުރުމުގައި ދެމިތިބުމަށް ހުރިހާ ނޫސްވެރިންނަށް އެމަނިކުފާނު އިލްތިމާސްކުރެއްވިއެވެ.