ޔުނައިޓެޑް އެރަބް އެމިރޭޓްސް (ޔޫއޭއީ) އިން ތެޔޮ އުފައްދާ ގައުމުތަކުގެ ޖަމިއްޔާ، އޯޕެކް އިން ވަކިވާން ނިންމާފައިވާކަން އިއުލާނުކޮށްފިއެވެ. މި ނިންމުމަކީ ދުނިޔޭގެ ހަކަތައިގެ ބާޒާރަށް ބޮޑު ލޮޅުމެއް އަރާނެ ކަމެއްގެ ގޮތުގައި މުހައްލިލުން ދަނީ ސިފަކުރަމުންނެވެ. ޔޫއޭއީ އިން އޯޕެކް އަދި އޯޕެކް ޕްލަސް އިން ވަކިވާނީ 1 މެއި 2026 އިން ފެށިގެންނެވެ.
ޔޫއޭއީ އަކީ ސައުދީ އަރަބިއްޔާ އާއި އިރާގަށް ފަހު އޯޕެކްގައި ހިމެނޭ ތިންވަނައަށް އެންމެ ގިނައިން ތެޔޮ އުފައްދާ ގައުމެވެ. އޯޕެކްގެ ކޯޓާގެ ސަބަބުން ޔޫއޭއީ އަށް ދުވާލަކު އުފެއްދެނީ 3.2 މިލިއަން ފީފާ ތެލެވެ. ނަމަވެސް އެ ގައުމަކީ ދުވާލަކު 5 މިލިއަން ފީފާ ތެޔޮ އުފެއްދުމުގެ ގާބިލުކަން ހުރި ގައުމެކެވެ. ޖަމިއްޔާއިން ވަކިވުމާއެކު، އިތުރަށް އުފައްދާ ތެލުގެ ސަބަބުން ދުނިޔޭގެ ބާޒާރުގައި ތެލުގެ އަގު ދަށްވުމުގެ ފުރުސަތު ބޮޑުވާނެ ކަމަށް ސީއެންއެން އިން ރިޕޯޓުކޮށްފައިވެއެވެ.
މި ނިންމުމާ ގުޅޭގޮތުން ޔޫއޭއީގެ ރިޔާސީ މުޝީރު އަންވަރު ގަރްގާޝް ވަނީ ގަލްފް ކޯޕަރޭޝަން ކައުންސިލް (ޖީސީސީ) ގެ ބައެއް ގައުމުތަކަށް ފާޑުވިދާޅުވެފައެވެ. އޭނާ ވިދާޅުވީ އީރާނުން ދެމުންދާ ހަމަލާތަކާ ދެކޮޅަށް އެ ގައުމުތަކުން ދައްކާ ސަފުތައް ބަލިކަށި ކަމަށެވެ. މީގެ އިތުރުން، ޔޫއޭއީގެ މި ނިންމުމަކީ އެ ގައުމުގެ ދިގު މުއްދަތުގެ އިގްތިސާދީ ތަސައްވަރުގެ ދަށުން، ހަކަތައިގެ ދާއިރާއަށް ކުރާ އިންވެސްޓްމަންޓްތައް އަވަސްކުރުމަށް ނިންމި ނިންމުމެއް ކަމަށްވެސް ރިޕޯޓުތައް ބުނެއެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ ޔޫއޭއީގެ މި ނިންމުމަށް މަރުހަބާ ވިދާޅުވެފައެވެ. ޓްރަމްޕް މީގެ ކުރިން ވަނީ އޯޕެކް އިން ތެލުގެ އަގު މަތިކޮށްގެން ދުނިޔޭގެ އެހެން ގައުމުތަކަށް ގެއްލުންދޭ ކަމަށް ތުހުމަތު ކުރައްވާފައެވެ. ޔޫއޭއީ އިން ވަކިވާން ނިންމި ނިންމުމާއެކު، އެމެރިކާގެ ޑަބްލިއުޓީއައި ސާފުނުކުރާ ތެލުގެ ފީފާއެއްގެ އަގު ވަނީ ގާތްގަނޑަކަށް 102 ޑޮލަރަށް އުފުލިފައެވެ.
ތެލުގެ އަގު ދަށްވާނެ ކަމަށް ބެލެވުނު ނަމަވެސް، މި ބަދަލު ވަގުތުން ފެންނާނެ ކަމަށް ނުބެލެވެއެވެ. ސަބަބަކީ އީރާނުގެ މައްސަލަތަކާ ގުޅިގެން ހޯރްމޫޒް ކަނޑުއޮޅި ބަންދުވެފައި އޮތުމުން ދުވާލަކު 10-12 މިލިއަން ފީފާ ތެޔޮ ބާޒާރަށް ނުނިކުމެ ހިފެހެއްޓިފައި ހުރުމެވެ. ނަމަވެސް ކަނޑުއޮޅި ހުޅުވި، ޔޫއޭއީގެ އުފެއްދުންތައް ބާޒާރަށް ނުކުންނަން ފެށުމުން އަގުތައް ތިރިވާނެ ކަމަށް ލަފާކުރެވެއެވެ.
އޯޕެކްގެ ނުފޫޒު ފާއިތުވި އަހަރުތަކުގައި ވަނީ ކުޑަވާން ފަށާފައެވެ. ކުރިން 16 މެންބަރުން ތިބި ނަމަވެސް، އިކުއެޑޯ، އިންޑޮނޭޝިއާ، ގަތަރު އަދި އެންގޯލާ ވަކިވުމުން މިހާރު އެ ޖަމިއްޔާގައި ތިބީ 12 މެންބަރުންނެވެ. ޔޫއޭއީ އަކީ 1971 އިން ފެށިގެން އޯޕެކްގެ މުހިންމު މެންބަރެކެވެ.