ދިވެހި ފިލްމީ އުފެއްދުންތަކަށް ލޯބިކުރާ ފަރާތްތަކުން އިންތިޒާރު ކުރަމުންދިޔަ މުހައްމަދު ހިލްމީގެ އައު ފިލްމު "ލަމްހާ" މިހާރު އޮލިމްޕަސް ސިނަމާގައި އަޅުވަމުންދާއިރު، މި ފިލްމަކީ އުމުރުން 15 އަހަރުން މަތީގެ ކުދިންނަށް ވަރަށް ރަނގަޅު މެސެޖެއް ލިބިގެންދާނެ ފިލްމެއް ކަމަށް ފިލްމްގެ ޕްރޮޑަކްޝަން ހައުސް އިން ބުނެފިއެވެ.
މި ފިލްމުގައި ދައްކުވައިދެނީ އެކަނިވެރި މައެއްގެ ދަރިއެއް ސްކޫލެއްގައި ކިޔަވަމުންދާއިރު، ކުއްޖާއަށް ދިމާވާ ކަމަކުން އޭނާގެ ދިރިއުޅުމަށް އަންނަ ބަދަލު ތަކެވެ.
"ލަމްހާ" އަކީ އާއިލީ އަދި އިޖުތިމާއީ މައްސަލަތަކެއްގެ މައްޗަށް ބިނާކޮށް އުފައްދާފައިވާ އަސަރުގަދަ ފިލްމެކެވެ. މި ފިލްމުގެ މައިގަނޑު މަގްސަދަކީ ދިވެހި މުޖުތަމައުގައި ހުރި ބައެއް ހަގީގީ މައްސަލަތަކަށް އަލިއަޅުވާލައި، މުނިފޫހިފިލުވުމުގެ ތެރެއިން މުހިންމު މެސެޖުތަކެއް ފޯރުކޮށްދިނުމެވެ.
ފިލްމު "ލަމްހާ" ގެ މަންޒަރެއް—
ފިލްމުގެ ޑައިރެކްޓަރު ހިލްމީ ބުނި ގޮތުގައި، މި ފިލްމަކީ ވަރަށް ގިނަ ދުވަހުގެ ބުރަ މަސައްކަތުން އުފެއްދި ފިލްމެއް ކަމަށާއި، ބެލުންތެރިންނަށް މި ފިލްމު ކަމުދާނެ ކަމަށް އުންމީދު ކުރާ ކަމަށެވެ. ފިލްމުގެ ފުރަތަމަ ޝޯއަށް ފަހު ބެލުންތެރިންގެ ފަރާތުން ބޮޑު ތަރުހީބެއް ލިބެމުންދާކަން އޭނާ ފާހަގަކުރިއެވެ.
ހިލްމީ ލިޔެ، ޕްރޮޑިއުސްކޮށް އަދި ޑައިރެކްޓްކުރި ފިލްމުގެ ޓައިޓްލް ރޯލު ކުޅެފައި ވަނީ އައިޝާ އަލީ އެވެ. ލަމްހާގެ މައިގަނޑު ކާސްޓްގައި އޭނަގެ އިތުރުން ހިމެނެނީ އަހުމަދު ޝާރިފާއި ނުޒުހަތު ޝުއައިބްގެ އިތުރުން އަހުމަދު އީސަ (އާނަންދު) އެވެ.
ފިލްމުގެ ޓިކެޓް މިހާރު އޮލިމްޕަހުން ލިބެން ހުންނާނެ ކަމަށާއި، ކުރިއަށް އޮތް ދުވަސްތަކުގައި ފިލްމުގެ އިތުރު ޝޯތައް ދައްކާނެ ކަމަށް ފިލްމު އުފެއްދި ފަރާތުން މައުލޫމާތު ދެއެވެ.
މުހައްމަދު ހިލްމީއަކީ މީގެ ކުރިންވެސް ކާމިޔާބު ގިނަ މަސައްކަތްތަކެއް ފިލްމީ ދާއިރާއަށް ގެނެސްދީފައިވާ ފަރާތެއްކަން ފާހަގަކޮށްލެވެއެވެ.