ފަޅު ހިއްކުމާއި ފުންކުރުމުގެ މަޝްރޫޢުތަކަށް ދޫކޮށްފައިވާ ހުއްދަތަކާއި ޚިލާފަށް މަސައްކަތް ކުރާ ފަރާތްތަކާމެދު ޤާނޫނީ ގޮތުން ފިޔަވަޅު އަޅާނެ ކަމަށް އެންވަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އިން ވިދާޅުވެއްޖެއެވެ. އެ އޮތޯރިޓީން މިހެން ވިދާޅުވީ، ރާއްޖޭގެ އަތޮޅުތަކުގައި ހިންގާ ފަޅު ހިއްކުމާއި ފުންކުރުމުގެ މަޝްރޫޢުތަކާ ގުޅިގެން ލިބިފައިވާ ގިނަ އަދަދެއްގެ ޝަކުވާތަކާ ގުޅިގެން ނެރުނު ބަޔާނެއްގައެވެ.
އީޕީއޭއިން ވިދާޅުވި ގޮތުގައި، ލިބިފައިވާ ޝަކުވާތަކުގެ ތެރޭގައި ތިމާވެށްޓަށް ކުރާ ނޭދެވޭ އަސަރުތައް ކުޑަކުރުމަށް އަޅަންޖެހޭ ފިޔަވަޅުތައް ފުރިހަމައަށް ނާޅާ މަސައްކަތް ކުރިއަށް ގެންދިއުން ހިމެނެއެވެ. އެގޮތުން، ހިއްކުމުގެ މަސައްކަތުގެ ސަބަބުން ފަޅުތެރޭގައި އުފެދޭ ސެޑިމެންޓޭޝަން ކުޑަކުރުމަށް ބޭނުންވާ ބަންޑްވޯލް އަދި ސިލްޓް ސްކްރީން ޤާއިމް ނުކުރުމާއި، ހުއްދަ ދީފައިވާ ސަރަހައްދުން ބޭރުން ވެލި ނެގުމުގެ މައްސަލަތައް ވަނީ ފާހަގަކުރެވިފައެވެ.
މީގެ އިތުރުން، މޫސުން ގޯސްވެ ރީނދޫ ސަމާލު ނެރެފައިވާ ދުވަސްވަރުގައިވެސް މަސައްކަތް ކުރަމުން ދިއުމާއި، ރަށްރަށާއި ރިސޯޓުތަކުގެ ހައުސް ރީފާ މާ ކައިރިން ވެލި ނެގުމުގެ ޝަކުވާތައް ލިބެމުންދާ ކަމަށް އެ އޮތޯރިޓީން ބަޔާންކުރެއެވެ. އެހެންކަމުން، މަޝްރޫޢުތަކަށް ފާސްކޮށްފައިވާ އީއައިއޭ ރިޕޯޓުތަކުގައިވާ ފިޔަވަޅުތައް ފުރިހަމައަށް ތަންފީޒު ކުރުމަށް އީޕީއޭއިން ވަނީ އަންގާފައެވެ.
އީޕީއޭއިން ކަނޑައަޅާފައިވާ އުސޫލުތަކުގެ ތެރޭގައި، އަތޮޅުތެރެއިން ވެލިނަގާނަމަ މީހުން ދިރިއުޅޭ ރަށްރަށާއި ރިސޯޓުތަކުގެ ހައުސް ރީފްއިން ފެށިގެން މަދުވެގެން 500 މީޓަރުގެ ދުރުމިނެއް ބެހެއްޓުން ހިމެނެއެވެ. އަދި ފަރުތަކާއި ނާޒުކު ސަރަހައްދުތަކާ ދުރުން ކަނޑައެޅިފައިވާ ޑްރެޖަރ ރޫޓުތައް ބޭނުން ކުރުމަށާއި، ރީނދޫ ސަމާލު ނެރެފައިވާ ވަގުތުތަކުގައި މަސައްކަތް މަޑުޖައްސާލުމަށްވެސް ވަނީ އިރުޝާދު ދީފައެވެ.
އެ އޮތޯރިޓީން އިތުރަށް ވިދާޅުވީ، ހުށަހެޅޭ ޝަކުވާތަކަށް ޚާއްސަ އިސްކަމެއްދީގެން ވަރަށް ގާތުން ބަލަމުންދާ ކަމަށެވެ. އަދި ކަނޑައެޅިފައިވާ ގަވާއިދުތަކާއި ހުއްދަތަކާ ޚިލާފަށް މަސައްކަތް ކުރާ ފަރާތްތަކާ މެދު ލަސްނުކޮށް ފިޔަވަޅު އަޅާނެ ކަމުގެ އިންޒާރުވެސް އެ ބަޔާނުގައި ވަނީ ދީފައެވެ.