ސްރީލަންކާގައި ދިރިއުޅޭ ދިވެހި ރައްޔިތުންނަށް ވިސާ ހޯދުމުގައި ކުރިމަތިވާ ދަތިތަކަށް ދާއިމީ ޙައްލެއް ލިބޭނެ ކަމުގެ ފުރިހަމަ ޔަޤީންކަން ލިބިފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ ސްރީލަންކާއަށް ކުރެއްވި ރަސްމީ ދަތުރުފުޅުގެ ތެރެއިން އެ ޤައުމުގެ ރައީސާއެކު ބޭއްވެވި މުހިއްމު މަޝްވަރާތަކަށް ފަހުގައެވެ.
ރައީސުލްޖުމްހޫރިއްޔާ ފާހަގަކުރެއްވި ގޮތުގައި، މި ބައްދަލުވުންތަކުގައި ވިސާގެ މައްސަލައަށް ބޮޑު އިސްކަމެއް ދެއްވާފައިވާނެއެވެ. އަދި ކުރިއަށް އޮތް ތަނުގައި ވިސާގެ ކަންކަމުގައި ކުރިއަށްވުރެ ބޮޑެތި ލުއިތަކެއް ދިވެހިންނަށް ލިބިގެންދާނެ ކަމުގެ އުންމީދު ބޮޑުކަމަށް އެމަނިކުފާނު ވިދާޅުވިއެވެ. މީގެ އިތުރުން، ދެ ޤައުމުގެ ދެމެދުގައި ވިޔަފާރިއާއި އިންވެސްޓްމަންޓްގެ ދާއިރާއިން ގުޅުން ބަދަހިކުރުމަށް މުހިއްމު އެއްބަސްވުންތަކެއްގައި ވަނީ ސޮއިކޮށްފައެވެ.
މި ދަތުރުފުޅުގެ ތެރެއިން ރައީސް ދެއްވި އެންމެ އުންމީދީ އެއް ޚަބަރަކީ ބޭންކް އޮފް މޯލްޑިވްސް (ބީއެމްއެލް) ގެ ބްރާންޗެއް ސްރީލަންކާގައި ހުޅުވުމުގެ މަސައްކަތް ކުރިއަށްދާ ކަމުގެ ޚަބަރެވެ. “ބޭންކް އޮފް މޯލްޑިވްސްގެ ބްރާންޗެއް ލަންކާގައި ހުޅުވުމުގެ އުންމީދީ މަގެއް ފެނިފައިވޭ، ލަސްތަކެއްނުވެ އެކަން ހަމަޖެހިގެންދާނެ،” ރައީސް ވިދާޅުވިއެވެ. މީގެ ސަބަބުން ލަންކާގައި އުޅޭ ދިވެހިންނަށާއި ރާއްޖޭގައި އުޅޭ ލަންކާ ރައްޔިތުންނަށް މާލީ މުޢާމަލާތްތައް ހިންގުމުގައި ބޮޑެތި ފަސޭހަތަކެއް ލިބޭނެކަން އެމަނިކުފާނު ފާހަގަކުރެއްވިއެވެ.
ލަންކާގައި ހުންނަ ދިވެހި ސަޤާފީ މަރުކަޒު، ސޯސަންވިލާގެ ޙާލަތު ރަނގަޅު ކުރުމަކީވެސް ރައީސްގެ މި ދަތުރުފުޅުގައި ޚާއްޞަ އަހަންމިއްޔަތުކަމެއް ދެއްވި ކަމެކެވެ. އެތަނުގެ އިމާރާތް މަރާމާތުކުރުމާއި، ކިޔަވައިދޭ ކްލާސްރޫމްތަކާއި ކުޅިވަރުގެ ވަޞީލަތްތައް އިތުރަށް ތަރައްޤީ ކުރަންޖެހޭކަން ރައީސް ފާހަގަކުރެއްވިއެވެ. އެގޮތުން ރާއްޖޭގެ ރަށްރަށުގައި މިހާރު ތަރައްޤީކުރާ ފަދަ އިންޑޯ ސްޕޯޓްސް ކޮމްޕްލެކްސްއެއް ސޯސަންވިލާގައި ޤާއިމުކުރުމުގެ ވިސްނުންފުޅު ހުރިކަންވެސް ހާމަކުރެއްވިއެވެ.
ރައީސް ވިދާޅުވީ ރާއްޖެއަށް އެނބުރި ވަޑައިގަތުމަށްފަހު ސޯސަންވިލާގެ ޚިދުމަތްތައް ވަރުގަދަކޮށް، އެތަނުގެ ވަޞީލަތްތައް އިތުރުކުރުމުގެ މަސައްކަތަށް އިސްކަންދެއްވާނެ ކަމަށެވެ. މިއީ ލަންކާގައި ދިރިއުޅޭ ދިވެހި އާއިލާތަކަށް އިޖުތިމާޢީ ގޮތުންނާއި ތަޢުލީމީ ގޮތުން ލިބޭނެ ބޮޑު ކުރިއެރުމެއްގެ ގޮތުގައި ބެލެވެއެވެ.