ދުނިޔޭގެ މަޝްހޫރު ޚަބަރު ފަތުރާ ވަސީލަތް، ސީއެންއެން (CNN) ގެ ބާނީ ޓެޑް ޓާނަރ، އުމުރުފުޅުން 87 އަހަރުގައި އަވަހާރަވެއްޖެއެވެ. އޭނާ އަވަހާރަވި ސަބަބު މިހާތަނަށް ރަސްމީކޮށް ހާމަކޮށްފައި ނުވި ނަމަވެސް، 2018 ވަނަ އަހަރުގެ ތެރޭގައި އޭނާއަށް ނާރުގެ ބައްޔެއް ކަމަށްވާ ލިއުވީ ބޮޑީ ޑިމެންޓިއާ ޖެހިފައިވާ ކަމަށް އޭނާ ވަނީ ކުރިން ހާމަކުރައްވާފައެވެ.
1938 ވަނަ އަހަރު އެމެރިކާގެ ސިންސިނާތީއަށް އުފަންވެވަޑައިގެންނެވި ޓާނަރަކީ ޅަފަތުގެ ދުވަސްވަރުން ފެށިގެން ތަޢުލީމީ އަދި އަސްކަރީ ދާއިރާތަކުގައި ފާހަގަކޮށްލެވުނު ބޭފުޅެކެވެ. އޭނާ ވަނީ ބްރައުން ޔުނިވަސިޓީގައި ކިޔަވައިވިދާޅުވެ، ބަހުޘްކުރުން ފަދަ ހަރަކާތްތަކުގައި ބޮޑު ކުރިއެރުމެއް ހޯއްދަވާފައެވެ. ޓާނަރ ބިލިއަނަރެއްގެ ލަޤަބު ހޯއްދެވީ އޭނާގެ ބައްޕާފުޅުގެ ބިލްބޯޑު ވިޔަފާރިއާ ޙަވާލުވެވަޑައިގަތުމަށްފަހު، އެ ވިޔަފާރި އިތުރަށް ފުޅާކުރައްވައިގެންނެވެ.
ޓެޑް ޓާނަރ މީޑިޔާގެ ދާއިރާއަށް ވެދެވަޑައިގަތީ 1970 ވަނަ އަހަރު އެޓްލާންޓާގެ ނާކާމިޔާބު ޓީވީ ސްޓޭޝަނެއް ބައްލަވައިގަނެ، ސެޓެލައިޓް މެދުވެރިކޮށް އެ ސްޓޭޝަން ކާމިޔާބު ސްޓޭޝަނަކަށް ބަދަލުކުރެއްވުމުންނެވެ. ނަމަވެސް އޭނާގެ އެންމެ ބޮޑު ކާމިޔާބީއަކީ 1980 ވަނަ އަހަރު ސީއެންއެން އުފެއްދެވުމެވެ. ސީއެންއެންއަކީ ދުނިޔޭގައި 24 ގަޑިއިރު މެދުނުކެނޑި ޚަބަރު ފަތުރަން ފެށި ފުރަތަމަ ޗެނަލެވެ. މީގެ އިތުރުން ކުޅިވަރާއި މުނިފޫހިފިލުވުމުގެ ދާއިރާއަށް ވެސް އޭނާގެ ވިޔަފާރި ފުޅާކުރައްވައި، 1996 ވަނަ އަހަރު އޭނާގެ ޓާނަރ ބްރޯޑްކާސްޓިންގ ސިސްޓަމް ވަނީ ޓައިމް ވާނާއާ އެއްކޮށްލާފައެވެ.
ޓާނަރަކީ އިންސާނިއްޔަތަށް އެހީވުމުގައި ނަމޫނާ ބޭފުޅެކެވެ. އެގޮތުން 1997 ވަނަ އަހަރު ތިމާވެއްޓާ ގުޅުންހުރި މަސައްކަތްތަކަށް އެހީވުމަށް އދ. އަށް އެއް ބިލިޔަން އެމެރިކާ ޑޮލަރު ހަދިޔާ ކުރެއްވިއެވެ. ޓާނަރ ސިފަކުރެއްވި ގޮތުގައި އެއީ އޭނާ މިހާތަނަށް ކުރެއްވި އެންމެ މުހިންމު އިންވެސްޓްމަންޓެވެ. އޭނާ ވަނީ ތިމާވެށީގެ ދާއިރާއިން މަސައްކަތްކުރާ އެކި ޖަމްޢިއްޔާތަކަށް ވެސް ދީލަތި އެހީތައް ފޯރުކޮށްދެއްވާފައެވެ.