މިއަހަރުގެ ޙައްޖުގެ މާތް އަޅުކަން އަދާކުރުމަށް ރާއްޖެއިން މައްކާއަށް ދާ ދިވެހި ޙައްޖުވެރިންނަށް ފުރިހަމަ އިންތިޒާމުތަކެއް ހަމަޖެހޭނެކަމުގެ ޔަގީންކަން، ދިވެހި ޙައްޖުވެރިންނަށް ޚިދުމަތް ފޯރުކޮށްދިނުމުގައި އެހީތެރިކަން ފޯރުކޮށްދޭ ސައުދީގެ މުޠައްވިފް، ރަވާފް މިނާއިން ދީފިއެވެ. މި ޔަގީންކަން ދީފައިވަނީ ޙައްޖު މިޝަނާއި ރަވާފް މިނާއާ ދެމެދު ބޭއްވުނު މުހިންމު ބައްދަލުވުމެއްގައެވެ.
މައްކާގައި ބޭއްވުނު މި ބައްދަލުވުމުގައި ރަވާފް މިނާގެ ފަރާތުން ބައިވެރިވެވަޑައިގެންނެވީ އެ ކުންފުނީގެ ސީއީއޯ ޒުހައިރް ޢަބްދުލް ޙާމިދް ސަދަޔޯއެވެ. ދިވެހިރާއްޖޭގެ ފަރާތުން ބައިވެރިވެވަޑައިގެންނީ ރާއްޖެއިން މައްކާގައި ޙައްޖުވެރިންނަށް ޚިދުމަތް ދެއްވުމަށް ޤާއިމުކުރާ އޮފީހުގެ ވެރިޔާ އައްޝައިޚް އިމްތިޠާއު ޢައްބާސް އާއި ޙައްޖު މިޝަންގެ މެންބަރުންނެވެ.
މި ބައްދަލުވުމާ ގުޅޭގޮތުން މަޢުލޫމާތު ދެއްވަމުން އައްޝައިޚް އިމްތިޠާއު ޢައްބާސް ވިދާޅުވީ، “މުޠައްވިފް ހަމަޖައްސަވަންޖެހޭ އެންމެހާ އިންތިޒާމްތައް ސަޢޫދީއިން ދީފައިވާ މުޙުލަތުތަކަށް ދަނީ ގެންދަމުން. ފުރިހަމަ އިންތިޒާމްތަކެއް މި ޙައްޖު މޫސުމުގައިވެސް ލިބޭނެކަމުގެ ޔަގީންކަން ދެއްވި” ކަމަށެވެ. މި ބައްދަލުވުމުގައި ޙާޖީން މައްކާއަށް އަންނަ ދުވަސްތަކަށް ތައްޔާރުވުމުގެ މަސައްކަތްތަކާއި އެންމެހާ މަޝާއިރުތަކުގެ އިންތިޒާމްތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނެވެ.
މުޠައްވިފުންނަކީ ޙައްޖުގެ އަޅުކަމަށް މައްކާއަށް ދާ ކޮންމެ ޙާޖީއެއްގެ ދަތުރު ފަސޭހަކޮށްދީ، މަގު ދައްކައިދޭ ޚާއްޞަ އެހީތެރިންނެވެ. ސަޢުދީ ޢަރަބިއްޔާގެ ޙައްޖާއި ޢުމްރާ ވުޒާރާއިން ދިވެހިރާއްޖެއަށް ކަނޑައަޅުއްވާފައިވާ މުޠައްވިފަކީ ރަވާފް މިނާއެވެ. ޙާޖީންގެ ދުޅަހެޔޮކަމާއި ބޭނުންތައް ބެލެހެއްޓުމުގެ އިތުރުން، ދަތުރުފަތުރާއި، ކެއިންބުއިމާއި، ޞިއްޙީ ޚިދުމަތްތައް ފޯރުކޮށްދިނުމުގައި މުޠައްވިފުން މުހިންމު ދައުރެއް އަދާކުރެއެވެ.
މީގެއިތުރުން، ޙާޖީންގެ ރައްކާތެރިކަމަށް ދޭ ރަސްމީ ހުއްދަ ކާޑު ކަމަށްވާ “ނުސުކް ކާޑު” އާއި ސެކިއުރިޓީ ބޭންޑް ހަވާލުކުރުމަކީވެސް މުޠައްވިފުންގެ ޒިންމާއެކެވެ. ޢަރަފާތު ބިމާއި މިނާގައި ފޭލިގެތައް ހަމަޖެއްސުމާއި، މައްކާ، މަދީނާ އަދި ޖިއްދާއާ ދެމެދު ކުރެވޭ ދަތުރުފަތުރުގެ އިންތިޒާމުތައްވެސް ބަލަހައްޓާނީ އެފަރާތުންނެވެ. ކުއްލި ޞިއްޙީ ޙާލަތްތަކުގައި އެމްބިއުލެންސްގެ ޚިދުމަތް ހަމަޖައްސައިދިނުމާއި، ޙާޖީން ދީނީގޮތުން ހޭލުންތެރިކުރުމުގެ މަސައްކަތްވެސް މުޠައްވިފުން ކުރިއަށް ގެންދާނެއެވެ.
ޙާޖީން މައްކާއަށް ދާ ހިސާބުން ފެށިގެން ދަތުރު ނިމެންދެން މުޠައްވިފުންގެ ޚިދުމަތް ލިބިގެންދާނެއެވެ. މި އިންތިޒާމުތައް ތާވަލުކުރެވި، ރޭވުންތެރިކަމާއެކު ކުރިއަށްދާތީ، މިއަހަރުގެ ޙައްޖުވެރިންނަށް ބޮޑު ހިތްހަމަޖެހުމެއް ލިބިގެންދާނެ ކަމަށް ބެލެވެއެވެ.