ސްރީލަންކާގެ ބާޒާރުގައި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ އުފެއްދުންތަކަށް ބޮޑު ތަރުހީބެއް އޮތްކަން ހާމަވެފައިވާތީ، އެ ޤައުމަށް މަހުގެ ބާވަތްތައް އެކްސްޕޯޓް ކުރުމަށް ޚާއްސަ ކޯޓާއެއް ހޯދުމުގެ މަސައްކަތް ސަރުކާރުން ރަސްމީކޮށް ފަށައިފިއެވެ. މިކަން ހާމަކުރެއްވީ ރައީސުލްޖުމްހޫރިއްޔާ ލަންކާއަށް ކުރެއްވި ފުރަމާނަ ދަތުރުފުޅާ ގުޅޭގޮތުން މައުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައެވެ.
ރައީސުލްޖުމްހޫރިއްޔާގެ އޮފީހުގެ ތަރުޖަމާން މުޙައްމަދު ޙުސައިން ޝަރީފް ވިދާޅުވީ، ލަންކާއަކީ ބޭރުގެ އުފެއްދުންތަކަށް ފުރުސަތު ހަނި ޤައުމަކަށް ވީނަމަވެސް، ރާއްޖޭގެ މަހުގެ އުފެއްދުންތައް އެ ޤައުމަށް އެތެރެކުރުމަށްޓަކައި ޚާއްސަ ކޯޓާއެއް ހޯދުމަށް ރައީސްގެ ދަތުރުފުޅުގައި އެދިވަޑައިގެންފައިވާ ކަމަށެވެ. މިއީ މިފްކޯގެ ވެލިއު-އެޑެޑް އުފެއްދުންތައް ބައިނަލްއަޤުވާމީ މާކެޓުގައި އިޝްތިހާރުކޮށް ވިޔަފާރި ފުޅާކުރުމަށް ކުރެވޭ މުހިންމު މަސައްކަތެކެވެ.
ލަންކާއަކީ ފޮރިން އިންވެސްޓްމަންޓްތަކާއި ބޭރުގެ މުދަލަށް ވަކި އުސޫލުތަކެއް ކަނޑައަޅާފައިވާ ޤައުމަކަށް ވުމުން، ޚާއްސަކޮށް މަހުގެ އުފެއްދުންތަކާއި ދަޅުމަހުގެ ބާވަތްތައް އެ ޤައުމަށް އެތެރެކުރެވެނީ ކޯޓާއެއްގެ ދަށުންނެވެ. “މިފްކޯއަށް ކޯޓާއެއް ދެއްވާށޭ ދަޅު މަސް ވަކި ސައިޒެއްގެ ދަޅު އެކްސްޕޯޓް ކުރަން. އެއީ ސްރީލަންކާގައި ޑިމާންޑެއް އެބަ އޮތް” ކަމަށް ތަރުޖަމާން ވިދާޅުވިއެވެ.
ތަރުޖަމާން އިތުރަށް ފާހަގަކުރެއްވި ގޮތުގައި، ލަންކާގެ ރައްޔިތުންގެ މެދުގައި ކަޅުބިލަމަސް މަޝްހޫރުވެފައިވަނީ “މޯލްޑިވްސް ފިޝް” ގެ ގޮތުގައެވެ. މި މަޤުބޫލުކަމުގެ ސަބަބުން ދިވެހި މަހުގެ އުފެއްދުންތަކަށް އެ ޤައުމުގައި ބޮޑު މާކެޓެއް އޮތްކަން ސަރުކާރުން ޤަބޫލުކުރެއެވެ.
މިފްކޯގެ ވިޔަފާރި ބޭރުގެ ބާޒާރުތަކުގައި ފުޅާކުރުމަކީ ސަރުކާރުގެ އަމާޒެކެވެ. ލަންކާއިން މިފަދަ ކޯޓާއެއް ލިބުމަކީ ދިވެހި މަސްވެރިކަމުގެ ސިނާއަތަށް ލިބޭނެ ބޮޑު ކުރިއެރުމެއްގެ ގޮތުގައި ސަރުކާރުން ސިފަކުރެއެވެ.