ރާއްޖޭން ހަންޓާވައިރަސްގެ އެއްވެސް ވޭދަނައެއް (ކޭސްއެއް) މިހާތަނަށް ފެނިފައި ނުވާ ކަމަށާއި، މި ބަލީގެ ނުރައްކާ ނުވަތަ ހިރާސް ރާއްޖެއަށް އޮތީ ވަރަށް ކުޑަކޮށް ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ.
ދުނިޔޭގެ ބައެއް ގައުމުތަކުން ހަންޓާވައިރަސްގެ ކޭސްތައް ފެންނަމުންދާ މި ދަނޑިވަޅުގައި، އެޗްޕީއޭއިން ބުނީ މި ވައިރަސް އެންމެ ފުރަތަމަ ފެނިފައިވަނީ ދެކުނު އެމެރިކާ ސަރަހައްދުގައި ދަތުރުކުރާ ކްރޫޒްލައިނާއަކުން ކަމަށެވެ. މި ބަލި ފެތުރެމުންދާ ގޮތް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އާ ގުޅިގެން ވަރަށް ގާތުން މޮނިޓާ ކުރަމުންދާ ކަމަށް ވެސް އެ އެޖެންސީން ވަނީ ހާމަކޮށްފައެވެ.
އެޗްޕީއޭއިން މިރޭ ނެރުނު ބަޔާނެއްގައި ބުނީ، ރާއްޖޭން މިހާތަނަށް މި ބަލި ޖެހިފައިވާ މީހަކު ނުވަތަ ބަލި ޖެހިފައިވާ މީހަކާ ދިމާވި މީހަކު ވެސް ފެނިފައި ނުވާ ކަމަށެވެ. “ރާއްޖެއަށް މި ބަލީގެ ރިސްކު އޮތީ ވަރަށް ކުޑަކޮށް،” އެޗްޕީއޭއިން ހާމަކޮށްފައިވެއެވެ.
މީގެ އިތުރުން، މި ބައްޔާ ގުޅޭގޮތުން ދުނިޔޭގެ ސިއްހީ މައިދާނުގައި ހިނގަމުންދާ ކަންކަމާއި ލިބޭ ފަހުގެ މައުލޫމާތުތައް ރައްޔިތުންނާ ހިއްސާ ކުރަމުންދާނެ ކަމުގެ ޔަގީންކަން ވެސް އެޗްޕީއޭއިން ވަނީ ދީފައެވެ.