ހުޅުމާލެ ފަޅު ބޭރުގައި އަޅާފައި އޮތް ސަފާރީއެއްގައި މިއަދު ހަވީރު އަލިފާނުގެ ހާދިސާއެއް ހިނގައި، އެ އުޅަނދުގެ ދެ ފަޅުވެރިއަކަށް ހުޅުމާލެ ހޮސްޕިޓަލުގައި ފަރުވާދޭން ފަށައިފިއެވެ. މި ހާދިސާ ހިނގާފައިވަނީ މިއަދު ހަވީރު 16:55 އެހައިކަންހާއިރު ކަމަށް ފުލުހުން މައުލޫމާތު ދެއެވެ.
އެމްއެންޑީއެފް އިން ހާމަކޮށްފައިވާ ގޮތުގައި، އަލިފާން ރޯވެފައިވަނީ ކުރުނބާ މޯލްޑިވްސް އާއި ހުޅުމާލެއާ ދޭތެރޭގައި އޮތް “އެމްޕެރަރ އެކްސްޕްލޯރާ” ކިޔާ ސަފާރީއެއްގައެވެ. މި ހާދިސާގެ ރިޕޯޓް ލިބުމާއެކު ހުޅުމާލެ ފަޔާ ސްޓޭޝަނުން ދަނީ އަލިފާން ނިއްވުމުގެ މަސައްކަތުގައި ހަރަކާތްތެރިވަމުންނެވެ.
މި ހާދިސާގައި އަނިޔާވި ދެ ފަޅުވެރިންނަށް ހޮސްޕިޓަލުގައި ފަރުވާދެމުންދަނީ ދުމުގެ އަސަރުކުރުމާ ގުޅިގެންނެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކާއި ފޮޓޯތަކުން ފެންނަ ގޮތުގައި، އެ ސަފާރީގައި ވަރަށް ބޮޑަށް ރޯވެ، ބޯކޮށް ދުން އަރަމުންދެއެވެ.
މިއީ މިއަދު ރާއްޖޭގެ ކަނޑުގެ ސަރަހައްދުގައި ހިނގި އަލިފާނުގެ ދެވަނަ ހާދިސާއެވެ. މިއަދުގެ ކުރީގެ ވަގުތެއްގައި ގުޅީފަޅު ކައިރީގައި އޮތް ދޯންޏެއްގައިވެސް ވަނީ އަލިފާނުގެ ހާދިސާއެއް ހިނގައިފައެވެ. މި ހާދިސާއާ ގުޅިގެން ފުލުހުންނާއި ކަމާބެހޭ ފަރާތްތަކުން ދަނީ އިތުރަށް ހަރަކާތްތެރިވަމުންނެވެ.