މި ސަރުކާރު ވެރިކަމާ ހަވާލުވިއިރު ސިފައިންގެ ކަންކަން އޮތް ނިކަމެތި ހާލަތުން އަރައިގަތުމަށް ރައީސުލްޖުމްހޫރިއްޔާގެ އިރުޝާދުގެ މަތިން ކުރަން އެންގެވި މަސައްކަތްތައް ކުރުމުގައި ދެމިހުންނަވާނެ ކަމަށް ދިފާޢީ އަދި ވަޠަނީ ޚިދުމަތާ ބެހޭ ވަޒީރު ޙަސަން ރަޝީދު ވިދާޅުވެއްޖެއެވެ. ވަޒީރު މިހެން ވިދާޅުވީ ދިވެހި ސިފައިންގެ 134 ވަނަ އަހަރީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.
ދިފާޢީ ވަޒީރުގެ ވާހަކަފުޅުގައި، ދިވެހި ސިފައިން ރާއްޖޭގެ ރައްކާތެރިކަމާއި ރައްޔިތުންގެ ސަލާމަތަށްޓަކައި ކުރައްވާ ބުރަ މަސައްކަތާއި ވެފައިވާ ގުރުބާނީގެ އަގު ވަޒަންކުރުމަކީ މިފަދަ ދުވަހެއް ފާހަގަކުރުމުގެ އެންމެ މުހިންމު މަގުސަދުކަން ފާހަގަކުރެއްވިއެވެ. އަދި ސިފައިންނަކީ ހިތްވަރުގަދަ ބައެއްކަން އަމިއްލަ ތަޖުރިބާއިން ފެނިވަޑައިގެންފައިވާ ކަމަށްވެސް އެމަނިކުފާނު ވިދާޅުވިއެވެ.
ވަޒީރު ހާމަކުރެއްވި ގޮތުގައި، ރައީސުލްޖުމްހޫރިއްޔާއާ ބައްދަލުކުރެއްވި ފުރަތަމަ ދުވަހުވެސް ސިފައިންގެ ހާލަތު ރަނގަޅުކުރުމަށް ރައީސް ވަނީ އިރުޝާދު ދެއްވާފައެވެ. “އަޅުގަނޑަށް ވަޒީރުކަން ހަވާލުކުރެއްވުމަށްފަހު ބޭއްވި އެންމެ ފުރަަތަމަ ބައްދަލުވުމުގައި ރައީސް އަޅުގަނޑާއި ދެއްކެވި ވާހަަކަފުޅު ހަނދުމައެބަހުރި. އެގޮތުން ސިފައިންގެ އޮޕަރޭޝަންތަކަށް ބޭނުންވާ އާލާތްތަކާއި، ސިފައިންގެ މަރުކަޒުތަކާއި، ބެރެކްތަކުގެ ހާލަތު ރަނގަޅުކުރުމާއި، ސިފައިންގެ ޔުނީފޯމާއި ސޭފްޓީ އިކުއޮޕްމެންޓް އާކުރަމުން ގެންދިއުމަށް ވަގުތުން ވިދާޅުވި،” ވަޒީރު ވިދާޅުވިއެވެ.
ސިފައިންގެ ކަންކަން ރަނގަޅުކުރުމަށް ރައީސް ދެއްވި އިރުޝާދުގެ މަތިން މިހާރު މަސައްކަތްތައް ފަށާފައިވާ ކަމަށާއި، އިތުރަށް ރަނގަޅު ކުރަންޖެހޭ ކަންކަން ދެނެގަތުމަށް ސިފައިންގެ ޓެކްނިކަލް ޓީމަކުން މަސައްކަތް ކުރަމުންދާ ކަމަށް ވަޒީރު ވިދާޅުވިއެވެ. މި މަސައްކަތުގައި އެހެން ވުޒާރާތަކާއި ސަރުކާރު ކުންފުނިތަކުން ދޭ އެއްބާރުލުމަށް ވަޒީރު ވަނީ ޝުކުރު އަދާކުރައްވާފައެވެ.
ދިފާޢީ ވަޒީރު އިތުރަށް ވިދާޅުވީ، ރައީސް ޑރ. މުޢިއްޒު އެންމެ އިސްކަމެއް ދެއްވަނީ ރާއްޖޭގެ ފަސްގަނޑު ދިފާޢުކޮށް، ގައުމުގެ އިސްތިގުލާލާއި ސިޔާދަތީ ބާރު ނެގެހެއްޓުމަށް ކަމަށެވެ. އަދި ދިވެހިންނަކީ ކަނޑުގެ ދަރިން ކަމަށްވާތީ، އިންޑިއާ ކަނޑުގެ އެންމެ ޒަމާންވީ އެއް ހަޟާރަތުގެ ހައިސިއްތަތުން ދިވެހިންނަށް ހައްގުވާ މިންވަރު ހޯދުމަށް ރައީސް ގެންގުޅުއްވާ އިޚްލާޞްތެރި ނިޔަތް ހާސިލްކުރުމަށް ގަދައަޅައި މަސައްކަތް ކުރައްވާނެ ކަމުގެ ޔަގީންކަން ވަޒީރު ދެއްވިއެވެ.