ނުކުޅެދުންތެރިކަން ހުންނަ ފަރާތްތަކުގެ ބަދަލުގައި އެފަރާތްތަކުގެ ބެލެނިވެރިންނަށް ބޯހިޔާވަހިކަމަށް އެދި ހުށަހެޅުމުގެ ފުރުޞަތު މި ހިނގާ މެއި މަހުގެ 20 ވަނަ ދުވަހު ހުޅުވާލުމަށް ސަރުކާރުން ނިންމައިފިއެވެ. ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން ހާމަކުރި ގޮތުގައި، މި ފުރުޞަތުގެ ދަށުން އަންނަ މަހުގެ 15 ވަނަ ދުވަހާ ހަމައަށް ފޯމު ހުށަހެޅުމުގެ ފުރުޞަތު އޮންނާނެއެވެ.
މި ބަދަލަކީ ނުކުޅެދުންތެރިކަން ހުންނަ ފަރާތްތަކުގެ ތެރެއިން އަމިއްލައަށް ފޯމު ފުރުމަށް ދަތިވާ ފަރާތްތަކާއި، 18 އަހަރު ފުރިފައިނުވާ ކުދިންގެ ހައްގުގައި އެފަރާތްތަކުގެ ބެލެނިވެރިންނަށް ކުރިމަތިލެވޭ ގޮތަށް ގެނައި އިޞްލާޙެކެވެ. މިގޮތަށް ކުރިމަތިލެވޭނީ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގައި ރަޖިސްޓްރީވެފައިވާ ބެލެނިވެރިންނަށެވެ. މިފަދަ ބަދަލެއް ގެންނަވާނެކަން ބިނާރާއި ގެދޮރުވެރިކަމާ ބެހޭ ވަޒީރު އެންމެ ފުރަތަމަ ހާމަކުރެއްވީ މިދިޔަ އެޕްރީލް މަހުގެ ތެރޭގައެވެ.
ސަރުކާރުގެ “ބޯހިޔާވަހިކަން އެންމެންނަށް” ސިޔާސަތުގެ ދަށުން ނުކުޅެދުންތެރިކަން ހުންނަ ފަރާތްތަކަށް ޚާއްޞަ ކެޓަގަރީއެއް ހުޅުވާލާފައިވަނީ މިދިޔަ އެޕްރީލް މަހުގެ 1 ވަނަ ދުވަހުއެވެ. މި ކެޓަގަރީން ފްލެޓަށް އެދޭ ފަރާތްތަކުން އެންސްޕާއިން ދޫކޮށްފައިވާ ނުކުޅެދުންތެރިކަން ހުންނަ ފަރާތެއްކަން އަންގައިދޭ ކާޑުގެ ކޮޕީ ހުށަހަޅަންޖެހެއެވެ. މީގެ ކުރިން އޮތް އުސޫލާ ޚިލާފަށް، މިދިޔަ ފެބުރުވަރީ މަހު ގެނައި ބަދަލާއެކު ނުކުޅެދުންތެރިކަން ހުންނަ މީހުންނަށް ބޯހިޔާވަހިކަމަށް ޝަރުތު ހަމަވުމަށް ބަލާ މުއްދަތު ވަނީ ކުޑަކޮށްދީފައެވެ.
މިހާރު އޮތް އުސޫލުގެ ދަށުން، ނުކުޅެދުންތެރިކަން ހުންނަ ފަރާތްތަކުން ފްލެޓަށް އެދި ހުށަހެޅޭނީ މާލޭ ސަރަހައްދުގައި މެދުނުކެނޑި 5 އަހަރު ދިރިއުޅެފައިވާ ފަރާތްތަކަށެވެ. ނަމަވެސް، ރަށުން ނުވަތަ އަތޮޅުން ފަރުވާ ލިބެން ނެތުމުގެ ސަބަބުން މާލެ ސަރަހައްދަށް ބަދަލުވާންޖެހޭ ފަރާތްތަކަށް ލުއިތަކެއް ވަނީ ދީފައެވެ. އެގޮތުން، ފަރުވާ ހޯދުމަށްޓަކައި ވޭތުވެދިޔަ 1 އަހަރު ދުވަހު ގްރޭޓަރ މާލެ ސަރަހައްދުގައި ދިރިއުޅެފައިވާ ފަރާތްތަކަށްވެސް މި ކެޓަގަރީއަށް ހުށަހެޅުމުގެ ފުރުޞަތު ލިބިގެންދާނެއެވެ.
ސަރުކާރުގެ މި ޕްރޮގްރާމަކީ “އާއިލީ ބޯހިޔާވަހިކަން” ކަށަވަރުކޮށްދިނުމަށް ކުރިއަށްގެންދާ މުހިންމު މަސައްކަތެކެވެ. ބޯހިޔާވަހިކަމުގެ ފުރަތަމަ ސްކީމަށް ހުށަހެޅުމުގެ ފުރުޞަތު މިދިޔަ ޖަނަވަރީ މަހު ހުޅުވާލާފައިވާއިރު، މިހާރު ގެނެވުނު ބަދަލުތަކާއެކު ނުކުޅެދުންތެރިކަން ހުންނަ ގިނަ އާއިލާތަކަކަށް ބޯހިޔާވަހިކަމުގެ ފުރުޞަތު ފަހިވެގެންދާނެ ކަމަށް ބެލެވެއެވެ.