އިންޑިއާގެ ތަމިލް ނާޑޫ ސްޓޭޓްގެ އައު ޗީފް މިނިސްޓަރު ކަމުގެ ހުވާ، މަޝްހޫރު ފިލްމީ ތަރި ސީ. ޖޯސެފް ވިޖޭ (ތަލަޕަތީ ވިޖޭ) މިއަދު ކުރައްވައިފިއެވެ. މިއީ އެ ސްޓޭޓްގެ ސިޔާސީ ތާރީޚަށް އައި ބޮޑު ބަދަލެއްގެ ގޮތުގައި ފާހަގަކުރެވެއެވެ.
ވިޖޭގެ ސިޔާސީ ޕާޓީ، ތަމިލަގަ ވެއްޓި ކަޒަގަމް (ޓީވީކޭ) އިން ވަނީ 2026 ވަނަ އަހަރުގެ އެސެމްބްލީ އިންތިޚާބުގައި އެންމެ ގިނަ ގޮނޑި ކާމިޔާބުކޮށް، ފާއިތުވި އެތައް އަހަރެއްވަންދެން އެ ސްޓޭޓްގައި އޮތް ޑީއެމްކޭ އަދި އޭއައިއޭޑީއެމްކޭގެ ބާރު ނިމުމަކަށް ގެނެސްފައެވެ.
ޗެންނާއީގެ ޖަވާހަރްލާލް ނެހުރޫ ސްޓޭޑިއަމްގައި ބޭއްވި މި ހުވާކުރުމުގެ ރަސްމިއްޔާތުގައި ސިޔާސީ އިސްވެރިންނާއި، ފިލްމީ ތަރިންގެ އިތުރުން އެތައް ހާސް ސަޕޯޓަރުންނެއް ބައިވެރިވިއެވެ. ވިޖޭ ހުވާ ކުރައްވާފައިވަނީ ތަމިލް ނާޑޫގެ 22 ވަނަ ޗީފް މިނިސްޓަރުގެ ގޮތުގައެވެ. އޭނާ ސަރުކާރު އެކުލަވާލާފައިވަނީ ކޯލިޝަން ޕާޓީތަކާއި މިނިވަން މެންބަރުންގެ ތާއީދާ އެކުގައެވެ.
ޗީފް މިނިސްޓަރު ކަމުގެ ހުވާ ކުރެއްވުމަށްފަހު ދެއްވި ފުރަތަމަ ތަގުރީރުގައި ވިޖޭ ވިދާޅުވީ، އޭނާގެ ސަރުކާރުން އިސްކަންދޭނީ “ހަގީގީ، ސެކިއުލާ އަދި އިޖުތިމާއީ އަދާލަތު” ގާއިމުކުރުމަށް ކަމަށެވެ. އަދި ދެފުށް ފެންނަ ވެރިކަމަކާއި ތަރައްގީއަށް އަމާޒުކުރެވިފައިވާ ސިޔާސަތުތަކެއް ރައްޔިތުންނަށް ފޯރުކޮށްދޭނެ ކަމަށް ވައުދުވެވަޑައިގަތެވެ.
މި ކާމިޔާބީއަކީ ތާރީޚީ ކާމިޔާބީއެއްގެ ގޮތުގައި ބެލެވެނީ، ފާއިތުވި 60 ވަރަކަށް އަހަރު ތެރޭގައި ތަމިލް ނާޑޫގެ ވެރިކަމަށް އައި “ޑްރެވިޑިއަން” ނޫން ފުރަތަމަ ޕާޓީއަށް ޓީވީކޭ ވުމުންނެވެ. ސިޔާސީ ދިރާސާވެރިން ބުނާ ގޮތުގައި ވިޖޭގެ ފިލްމީ މަގުބޫލުކަމާއި ޒުވާނުންގެ ބޮޑު ތާއީދަކީ މި ކާމިޔާބީގެ މައިގަނޑު ސަބަބެވެ.
މި ރަސްމިއްޔާތަށްފަހު އިންޑިއާގެ ގައުމީ އަދި ސަރަހައްދީ ގިނަ ލީޑަރުން ވިޖޭއަށް މަރުހަބާ ކިޔާފައިވާއިރު، ތަމިލް ނާޑޫގެ އެކި ކަންކޮޅުތަކުގައި ސަޕޯޓަރުން ދަނީ އުފާފާޅުކުރަމުންނެވެ. ގިނަ ބަޔަކު ސިފަކުރާ ގޮތުގައި މިއީ އެ ސްޓޭޓަށް އައި އައު ސިޔާސީ ދައުރެއްގެ ފެށުމެވެ.